KAINGKUALAN 36

1I Bijalil, Ogoliab am ngaangai' tukang ondo' inanian ru Tuhan ra katasikan am pangaratian, iono ilo ondo' makapandai ra ralan mambaal ra ngaangai' ondo' gogoton koson mambaal ra Kim ru Tuhan, musiti' mambaal ra ngaangai' no koson ra ondo' nanusuban ru Tuhan.”

Nangani' ulun ru Israil ra taak masuang

2Pampiau i Musa ri Bijalil, Ogoliab am ngaangai' tukang ra bokon ondo' inanian ru Tuhan ra kapandayan, iono ilo ondo' masaga' mindangan; am susubo' ilo ri Musa manalimpuun ra kandoi no. 3Anii' ilo ri Musa ra ngaangai' ondo' pinataak ru ulun ru Israil koson kandoi mambaal ra Kim ru Tuhan. Kaa' lakat ayuk poyo marayus bansa' ru Israil magibit ra taak ri Musa ra moonong susuab ti. 4Ginio ra ulun-ulun manukang ondo' tatanga' mambaal ra kandoi no 5nambala' ri Musa, “Nangani' ulun nasailan intor ra gogoton ra kandoi ondo' nanusuban ru Tuhan.”

6Indagu boo i Musa ra ngaangai' ulun maa' raginio kalo boo pana magibit ra taak koson ra Kim ru Tuhan; ulun no pana kalo boo nangani' ra atan pana. 7Kuliamos ondo' tinaakan noyo nasailan naukop koson momongo ra ngaangai' ru kandoi no.

Mambaal ra Kim ru Tuhan

(Kai. 26:1-37)

8Ulun-ulun manukang ondo' mangatasik kaga' ra popolos ru ulun manukang no mambaal ra Kim ru Tuhan. Baalon nilo intor ra mopor ngaputul konoon linon molomos ondo' binaal intor ra konoon bulu makabatik motomou, matanggilung am malia' am niayuk sinulaman ra gambar kirub. 9Pinantutuku' moonong putul, gawar no 12 ngamito am pila' no 2 ngamito. 10Pikiton nilo limo ngaputul masauk ra tabir maawar, am limo ngaputul ra bokon baalon koson raginio niayuk. 11Pambaal ilo ra awis intor ra konoon motomou ra kiing tampilon ra liwar ru karuruo tabir. 12Pambaal ilo limo ngoopor awis ra rondo' tabir maawar am limo ngoopor awis ra tabir ra karuo, saboi makapagumbir. 13Pambaal ilo limo sangutan mas koson mapatunggul ra karuruo tabir maawar no.

14Ilo pana nambaal ra taap ru Kim intor ra mopor ngaputul konoon bulu kambing. 15Pinantutuku' moonong putul, gawar no 13 ngamito am pila' no 2 ngamito. 16Pampikit ilo limo ngaputul masauk rondo' layar am ondo' onom ngaputul poyo binaal niayuk koson raginio. 17Patakino' nilo limo ngoopor awis ra kiing ru putul ra pupus ra layar ondo' kasaa', am limo ngoopor awis ra kiing ru layar ondo' karuo. 18Pambaal ilo limo ngoopor sangutan gangsa' koson mapatunggul ra ruo layar no saboi masauk ra taap ru Kim. 19Pambaal ilo ruo poyo panaub; rondo' intor ra kungkung ru kambing gawayan ondo' kinalia', am rondo' poyo intor ra kungkung molomos koson pabingkalon tampilon ra rasawat.

20Pambaal ilo ra rangka mabanis intor ra tataun akasia ru Kim. 21Moonong rangka makagawar 4 ngamito am makapila' 66 ngasintimito. 22Moonong rangka binaalan ra sanggapan ondo' matanda' saboi rangka-rangka no makapatutunggul. 23Pambaal ilo ruo ngoopor rangka tampilon ra rabugus, 24am apat ngoopor antulan pirok ra rangka-rangka no; Ruo antulan ra ragana' ru moonong rangka koson manungka' ra karuruo sanggapan no. 25Pambaal ilo niayuk ruo ngoopor rangka tampilon ra ralayo, 26am apat ngoopor antulan pirok, ruo antulan ra ragana' ru moonong rangka. 27Tampilon ra tinaulian ru Kim ru Tuhan, tampilon ra kalasaan, pambaal ilo onom rangka 28am ruo ngabatang rangka ra pisuk-pisuk no. 29Rangka ru pisuk pinatunggul ra tayar ragana' saboi ra tayar rasawat. Karuo-ruo ngabatang rangka ondo' makapinisuk no binaal koson raginio. 30Ginio ra makabalu' rangka am mopor am onom antulan pirok: Ruo antulan tampilon ra ragana' ru moonong rangka.

31Pambaal ilo mopor am limo tataun bandayan intor ra tataun akasia, limo ngabatang ra rangka no giu' ra sapapa' ru Kim ru Tuhan, 32limo ra rangka no tampilon ra bokon, am limo poyo rangka tampilon ra kalasaan, tampilon ra tinaulian. 33Tataun bandayan no ondo' soroi ra tatanga' ru rangka no nakatiampal intor ra rondo' pompor ru Kim mongoi ra pompor ra bokon. 34Inangkupan nilo rangka no ra mas am patakino' golong mas no ra rangka no koson manungka' ra tataun bandayan, ondo' inangkupan niayuk ra mas.

35Pambaal ilo ra tabir intor ra konoon linon molomos ondo' binaal ra konoon bulu makabatik motomou, matanggilung am malia' am sinulaman ra gambar kirub. 36Pambaal ilo apat lugu' intor ra tataun akasia koson manungka' ra tabir no; lugu'-lugu' no inangkupan ra mas am tinakinan ra sangutan mas. Ilo pana nambaal ra apat antulan pirok koson manungka' ra lugu'-lugu' no. 37Ginio ra kulobon ru Kim ru Tuhan, pambaal ilo ra tabir intor ra konoon linon molomos ondo' binaal ra konoon bulu makabatik motomou, matanggilung am malia' ondo' binungaan ra sulaman. 38Ginio ra tabir no, pambaal ilo limo lugu' ondo' tinakinan ra sangutan no. Angkupi' nilo ra mas lugu' tampilon rasawat am tataun no. Pambaal ilo limo antulan intor ra gangsa' ra lugu'-lugu' no.

Currently Selected:

KAINGKUALAN 36: TMT

Highlight

Copy