KAINGKUALAN 34
34
Ruo batu pamatikan nakabagu
(Sag. 10:1-5)
1Indagu boo Tuhan ri Musa, “Pangukir ra ruo batu pamatikan koson ragili. Ra batu pamatikan no, tulisin Ku ragu ra mogondo' am ragu ondo' soroi ra batu pamatikan ondo' kasaa', ondo' pinopol muli. 2Tampos ra susuab no ra iosusuab, am pagaloi ra Gunung Sinai muma' Raki' giu' ra tampak ru gunung no. 3Kolondo' sangulun pana makaaloi mabaya' rirun, kapoam makito ra ati pana tampilon ru gunung no; domba kapoam sapi' kalo pongkotopon ra lonson toojo ru gunung no.” 4Pangukir i Musa ra ruo batu pamatikan koson ragili, am riminondom ra suabon no ibito' no batu pamatikan no, am nagaloi ra Gunung Sinai koson ra nanusuban ru Tuhan.
5Tuun Tuhan ralalom ru gaun; bigor Io am i Musa ra intok raginio am nanabit ra inggalan Nano ondo' matulai, iono Tuhan. 6 Pansail boo Tuhan ra saang ri Musa am indagu, “Aku Tuhan i Aki Kapuuno' ondo' napanu' ra asi' am kimasi'; kalo mataki' Aku sumangit, mapakito Aku ra togom am gagaya' ondo' maayo. 7Suguton Ku bantu' Kuno ra riribu papag, am niayuk mangampun ra kalaatan am tula, kaa' kalo mapalabus Aku ra ulun makasala intor ra ukuman. Mangukum Aku niayuk ra anak am akupu nilo, saboi ra papag ra katalu am ra kaapat, sabap ra tula ru matuo nilo.”
8Paat raginio niayuk i Musa siminamba. 9Kono, “Tuhan, amon ru totopot Kou maansayan raki', kitaakon Tokou maya' ramon. Bambalingatan ulun ragitilo, kaa' ampuno' noyo kalaatan am niayuk tula mai, am apuo' akai koson ra ulun Muno galama'.”
Nabantuan tinalimbaguan
(Kai. 23:14-19; Sag. 7:1-5; 16:1-17)
10Indagu Tuhan ri Musa, “Raino mambaal Aku rondo' nabantuan ra ulun ru Israil. Gino ra saang min, mambaal Aku ra baal mangaayo, ondo' kalo igondo' baalo' ra gino ngai' ru bansa' no ra titikop ru tana' ti. Makito ru ngaangai' bansa' ondo' maalap kabaal ru Aku, Tuhan, sabap ra baalin Ku akau ra baal mangaayo. 11Gagayaa' noyo ukum ondo' taakin Kuno ramuyun ra orou raiti'. Pagiruon Ku ulun ru Amori, Kanaan, Git, Piris, Giwi am Jibusi paat ra akau mongoi ra giu'. 12Pai' pambaal ra nabantuan ra ulun giu' ra pagun ayanan mino, sabap ra baal raginio masauk ra pamalandak ondo' mangkinibit ra kapusaan min. 13 Lunsayo' noyo altar nilono; umoko' lugu'-lugu' karamat nilo am tagaro' tatandu' Asyira, sinungkalalaing nilo.
14“Pai' samba ra tuhan-tuhan ra bokon, sabap ra Aku, Tuhan kalo masaga' pogondoon ra atan pana. 15Pai' pambaal ra nabantuan ra ulun giu' ra pagun no, sabap ra paat ra ilo sumamba ra tuhan nilono am mapataak ra taak simbalui ra tuhan raginio, mangkimait ilo ramuyun. Maambi' kau mangakan ra akanon pataakon nilo ra tuhan raginio. 16Anak ungkuyon mino maaru' maguot ra anak ruandu' nilono, ondo' mangkinibit ra anak ungkuyon mino kalo boo gumagaya' Raki', am sumamba ra tuhan ra bokon.
17 “Pai' pambaal ra tuhan-tuhan ra bokon intor ra basi', am pai' samba ra tuhan-tuhan ra bokon no.
18 “Iantakon Pangiantakan ra Ruti' Kalo Linatakan ra Ragi. Koson ra nanusuban Kuno ramuyun, pangakan ra ruti' kalo linatakan ra ragi buoi katuluan ra bulan Abib, sabap ra bulan raginio akau nangiruan ra Misir.
19 “Moonong anak ungkuyon ra katuaan am anak ungkuyon ra kasaa' ra bibiag tinambiag Aku tatangan. 20 Kaa' musiti' min pulion moonong anak ra kasaa' ru kaladai min ra sanginan domba koson ra pamalit no. Amon ru kalo pulion min kaladai no, pandako' liog no. Musiti' min pulion moonong anak ra katuaan min.
Kolondo' sangulun pana makauma' Raki' amon ru kalo magibit ra taak.
21 “Mokoonom ngoorou kau mangandoi, kaa' pai' pangandoi ra orou katulu', kabalu' pana makapaat ra mamparadu' kapoam mangkumos.
22 “Iantakon Pangiantakan Mangkumos paat ra akau tumalimpuun mangkumos ra ampos kasaa' ru gandum min. Antakon niayuk Pangiantakan Mangkalukub ra Raun bulintok raun matutu', paat ra akau mangupu ra kikinawa'.
23“Intalu sambilor musiti' ngaangai' ungkuyon matong samba Raki' Tuhan i Aki Kapuuno' ru Israil. 24Mopongo Ku pagiruon bansa'-bansa' intor ra saang min am mapalangka' ra wilayah min, kolondo' sangulun pana makakinam manalingaau ra pagun min paat ra talu pangiantakan no.
25 “Pai' pataako' ruti' ondo' linatakan ra ragi paat ra akau mapataak ra bibiag koson taak simbalui Raki'. Suwo ru bibiag ra sinimbalui paat ra Pangiantakan Paska kalo buliin saboi ra susuab ru suabon no.
26 “Moonong bilor, ibito' ampos kasaa' intor ra tana' min ra baloi ru Tuhan i Aki Kapuuno' min.
“Pai' ansako' anak domba kapoam anak kambing ra gatas ru indung no.”
27Indagu Tuhan ri Musa, “Tulisi' noyo ragu ragitio, sabap ra mimpuun ra ragu no mambaal Aku ra nabantuan rirun am bansa' ru Israil.” 28Soroi i Musa ra intok no nabaya' ra Tuhan buoi apat ngoopor ngoorou am apat ngoopor ngorondom, kalo nangakan am nanginum. Nanulis i Musa ra ragu nabantuan no ra batu pamatikan no.
Timinuun i Musa intor ra Gunung Sinai
29 Pakatuun i Musa intor ra Gunung Sinai liliwa' nagibit ra Mopor Ukum no, simininda bulos nano sabap ra nagindagu io ra Tuhan, kaa' i Musa galama' kalo nakapandai ra makasinda bulos nano. 30Nakito ri Arun am ngaangai' ulun ra makasinda bulos ri Musa. Ginio ra malaa' ilo minggaar ri Musa, 31kaa' piawo' ilo ri Musa. Inggaar boo i Arun nabaya' ra tingganai ru ulun no, am pakimansunur i Musa risilo. 32Kopongo raginio, timung ngaangai' ulun ru Israil ra liput ri Musa. Ilo napasabayan ri Musa ra ngaangai' ukum ondo' tinaakan ru Tuhan riso giu' ra Gunung Sinai. 33Pakaindagu i Musa risilo, silii' no bulos nano ra rundung. 34Moonong mumpos i Musa ra Kim ru Tuhan mindagu ra Tuhan, sukiapon ri Musa rundung nano. Makaingkual i Musa, mapasaboi io ra ngaangai' nanusuban ru Tuhan ra ngaangai' ulun ru Israil, 35am makito nilo makasinda bulos nano. Siliin boo saguli' ri Musa bulos nano saboi ra paat nano mindagu poyo ra Tuhan.
Currently Selected:
KAINGKUALAN 34: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
