2 RAJA'-RAJA' 25
25
Naratuan ru Jirusalim
(2 Tun. 36:13-21; Jir. 52:3b-11)
1 Giminuor Raja' Jidikia ra Raja' Nibukadnijar intor ra Babilonia. Ginio ra namulunsar Raja' Nibukadnijar ra Jirusalim nabaya' ra ngaangai' saujor nano ra orou koopor, sila' koopor, bilor kasiam ru pamarintaan ru Raja' Jidikia. Nangkim ilo giu' ra liwar ru Jirusalim am nambaal ra timbok koson magawang ra bandar no. 2Narayus ilo nagawang ra bandar no saboi ra bilor koopor am rondo' ra pamarintaan ru Raja' Jidikia. 3Paat ra orou kasiam, sila' kaapat ru bilor raginio, bulintok bitilan giu' ra bandar no najanjayan kaga' saboi ra mamagun ru Jirusalim kolondo' boo akanon, 4 timbok ru bandar pinasut ru pantula'. Kabalu' pana bandar no inawangan ru ulun ru Babilonia, ngaangai' saujor ru Jiuda nakaingkual intor ra bandar no. Nagigiru' ilo paat ra rondom am minaya' ra ralan mansail ra taman ru istana am kulobon garabang ra lolot ru ruo timbok. Nagiru' ilo sumuku' ra Limayak Jordan. 5Kaa' saujor ru Babilonia nangilou ra Raja' Jidikia am namparakop riso giu' ra tana' malimparang mamaar ra Jiriko. Nakapaat raginio ngaangai' ru saujor ru Raja' Jidikia nangiruan riso. 6Raja' Jidikia inibit ru Raja' Nibukadnijar, ondo' bulintok ragili soroi giu' ra Ribla. Giu' no nangukum Raja' Nibukadnijar ra Raja' Jidikia. 7 Pinatoi anak-anak ungkuyon ri Jidikia ra talupak ru mato nano. Kopongo raginio mato nano boo kiniul. Rinantai io boo am inibit ra Babil.
Nalunsayan ru Baloi ru Tuhan
(Jir. 52:12-33)
8Paat ra orou katulu', sila' kalimo, bilor koopor am siam ra pamarintaan ru Raja' Nibukadnijar intor ra Babilonia, i Nibujaradan, iono panglima ru saujor am maminson ra raja', siminubol ra Jirusalim. 9 Sinolob ri Nibujaradan Baloi ru Tuhan, istana am baloi ru ulun mauligan kaga' giu' ra Jirusalim. 10Napalunsai saujor-saujor nano ra timbok ru bandar. 11Kopongo raginio nagibit Nibujaradan ra mamagun ondo' lakat poyo minayan ra bandar no ra Babilonia, iono ulun manukang ra mapandai kaga' ondo' lakat poyo natatang am ulun ondo' minaya' ra ulun ru Babilonia. 12Kaa' nanatang i Nibujaradan ra santayaran intor ra mamagun ondo' musikin toojo giu' ra Jiuda, ilo ondo' kolondo' rapu'. Nanusub io risilo mangandoi giu' ra umo ru anggur am giu' ra umo-umo.
13 Nangumok ulun ru Babilonia ra lugu'-lugu' gangsa', tangki' gangsa' am ngaangai' kurita' kuda ondo' soroi giu' ra Baloi ru Tuhan. Inibit nilo ngaangai' gangsa' no ra Babil. 14 Inibit nilo niayuk sukup-sukup am papaulian ra kaau ondo' pinakai koson mangimpasau ra altar, kuliamos ru lampung, mangkuk-mangkuk koson papaulian ra raraa' ru bibiag ondo' sinimbalui, mangkuk-mangkuk koson monolob ra kaminyan, am ngaangai' kuliamos gangsa' ra bokon ondo' pinakai ra upacara sambayang giu' ra Baloi ru Tuhan. 15Inalap nilo ngaangai' kuliamos ondo' binaal intor ra mas am pirok, nakaaya' mangkuk-mangkuk boborok am intok papaulian ra baa. 16Kuliamos-kuliamos gangsa' ondo' binaal ru Raja' Salomo, iono ruo ngantaun lugu', ngaangai' ru kurita' kuda, am tangki' ondo' maayo, maagat kaga' saboi kalo matimbang. 17Ruo ngantaun ra lugu' no nogondo' gayo no: moonong santaun 8 ngamito sawat no, am ulu ru lugu' 1.3 ngamito sawat no. Moonong ulu ru lugu' no mokoondo' binatu ra gangsa' ondo' binungaan ra kawa' dalima' intor ra tambaga'.
Mamagun ru Jiuda pinatiran giu' ra Babilonia
(Jir. 52:24-27)
18Suai raginio i Nibujaradan, iono panglima ru saujor, namparakop ra Tingganai Maayo Imam Siraya am mangindangan nano, iono Imam Jipanya, am niayuk talu ngaulun pagawai masawat ru Baloi ru Tuhan. 19Intor ra Bandar no namparakop i Nibujaradan ra sangulun panglima saujor, limo ngaulun maminson galama' ra raja' ondo' lakat poyo giu' ra bandar no, mangindangan ra panglima ondo' manalingapu ra kaupisan ru saujor, am onom ngoopor ngaulun tingganai ra bokon. 20Nagibit i Nibujaradan risilo ra raja' ru Babilonia, ondo' bulintok ragili soroi giu' ra Ribla 21giu' ra wilayah Gamat. Giu' no inimbolo' ilo am tauli no inukum ra matoi.
Koon raginio noyo mamagun ru Jiuda rinakop intor ra tana' nilo am pinatiran ra pagun.
I Gidalia, gabenor ru Jiuda
(Jir. 40:7-9; 41:1-3)
22 Raja' Nibukadnijar intor ra Babilonia nampalantik ri Gidalia anak ri Agikam, iono akupu ri Sapan, nasauk ra gabenor ru pagun Jiuda. Io namarinta ra ngaangai' ulun ondo' kalo inibit ra Babilonia. 23Paat ra pagawai-pagawai ru saujor am saujor ru Jiuda ondo' kalo nakirakop ra ulun Babilonia nokorongog ra baal raginio, naguguum ilo ri Gidalia giu' ra Mijpa. Pagawai raginio iono i Ismail anak ri Nitania, i Joganan anak ri Karia, i Siraya anak ri Tanumit intor ra bandar Nitopa am i Jajanya intor ra Maakga. 24Kon ri Gidalia risilo, “Pai' kalaa' ra pagawai-pagawai ru Babilonia. Ayan no ra pagun ti am pangandoi no ra raja' ru Babilonia, am akau pana maayag.”
25 Kaa' paat ra sila' katulu' bilor raginio, i Ismail anak ri Nitania, iono akupu ri Ilisama, sangulun makararaa' ru raja', minongoi ra Mijpa nababaya' ra mopor ngaulun ra bokon. Namulunsar ilo ri Gidalia am namatoi riso. I Ismail niayuk namatoi ra ulun ru Israil am ulun ru Babilonia ondo' soroi ra giu'. 26 Kopongo raginio ngaangai' ulun ru Jiuda, ondo' langkaya' am niayuk musikin, nababaya' ra pagawai-pagawai ru saujor, nangiruan ra intok no am nagiru' ra Misir sabap ra malaa' ilo ra ulun ru Babilonia.
Raja' Joyakin pinaingkual intor ra pangaputan
(Jir. 52:31-34)
27Paat ra bilor ru Raja' Iwil-Mirodak nasauk ra raja' ru Babilonia, makaasi' io ra Raja' Joyakin intor ra Jiuda, am nampaingkual riso intor ra pangaputan. Baal ragitio nasauk ra orou karuo ngoopor am tulu', sila' koopor am ruo, talu ngoopor am tulu' kalupus Raja' Joyakin rinakop. 28Moonsoi pinamakuan ru Raja' Iwil-Mirodak ra Raja' Joyakin am nangani' riso ra pangkat masawat poyo intor ra ondo' tinaakan ra raja'-raja' ra bokon ondo' pinatiran ra Babilonia. 29Raja' Joyakin kalo boo nambayang ra bayang ru pangaputan am mangakan io giu' ra mija' ru raja' ra buoi ru bayag nano. 30Moonong orou, buoi ru bayag ru Raja' Joyakin, inanian io ra ruit koson ra pakuan ru kaayagan nano.
Currently Selected:
2 RAJA'-RAJA' 25: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
