1 JUANIS 5
5
Pangintapatan magibit ritakau makaanggal ra kalaatan ru tana' ti
1Ulun ondo' nangintopot ra i Jisus noyo Mamamayag ondo' sinusub ri Aki Kapuuno', io no anak ri Aki Kapuuno'. Ulun ondo' motogom ra sangulun ama', motogom niayuk ra anak nano. 2Gitio noyo napandayan takau ra itakau ti motogom ra anak-anak ri Aki Kapuuno': Motogom takau ri Aki Kapuuno' am mintopot ra susuban Nano. 3 Motogom ri Aki Kapuuno', arati' no, gumagaya' ra susuban Nano. Susuban Nano kalo niayuk mapagon baalon takau, 4sabap ra moonong anak ri Aki Kapuuno' makaanggal ra kalaatan ru tana' ti. Am ra pangintapatan takau ri Aki Kapuuno' naanggal takau noyo kalaatan ru tana' ti. 5Osoi kia makaanggal ra kalaatan ru tana' ti? Ilo ayuk ondo' nangintopot ra i Jisus noyo Anak ri Aki Kapuuno'.
Kaintutunan intor ri Jisus Kristus
6I Jisus Kristus noyo ondo' minatong ra tana' ti nabaya' ra timug pinampariu' Riso am raraa' ru pinatayan Nali. Minatong Io sala' ka nabaya' ra timug, kaa' nabaya' ra timug am raraa'. Ambiluo ri Aki Kapuuno' galama' mapaintutun ragitio motopot, sabap ra Ambiluo raginio niayuk motopot. 7-8Mokoondo' talu kaintutunan: Ambiluo ri Aki Kapuuno', timug am raraa'. Kaintutunan ru katalu-talu ragitio rondo' ayuk. 9Mangintopot takau ra kaintutunan ru ulun, kaa' mulu' poyo toojo ra kaintutunan ri Aki Kapuuno'. Ginio noyo kaintutunan ri Aki Kapuuno' intor ra Anak Nano, i Jisus Kristus. 10Ginio ra osoi ayuk mangintopot ra Anak ri Aki Kapuuno', nakaapu io noyo ra kaintutunan ragitio ralalom ru guang nano. Kaa' osoi ayuk kalo mangintopot ri Aki Kapuuno', manguu' io ri Aki Kapuuno' magabau, sabap ra kalo nangintopot io ra atan ondo' rinagu ri Aki Kapuuno' intor ra Anak Nano, i Jisus Kristus. 11 Gitio noyo kaintutunan i: nangani' noyo i Aki Kapuuno' ritakau ra kaayagan motopot am mantilayun am Anak Nano puun ru kaayagan ti. 12Osoi ayuk mokoondo' ra Anak, mokoondo' io poyo ra kaayagan ragitio. Kaa' osoi ayuk kolondo' ra Anak, kolondo' io poyo ra kaayagan ragitio.
Kaayagan motopot am mantilayun
13Tulisin ku gitio ramuyun ondo' mangintopot ra Anak ri Aki Kapuuno', maa' raginio mapandayan min ra akau no mokoondo' ra kaayagan motopot am mantilayun. 14Makakau' takau muma' ri Aki Kapuuno', sabap ra mangintopot takau ra rongogon No pakiasian takau amon ru makiasi' maya' ra kasagaan Nano. 15Nakapandai takau ra rongogon No paat ra itakau makiasi' Riso. Ginio ra nakapandai takau ragitio motopot, mapandayan takau niayuk ra mangani' Io ritakau ra atan ayuk kitaakon takau Riso.
16Amon ru makakito kau ra osoi ayuk pabukat min mambaal ra tula ondo' kalo magibit ra kapatayan, pakiasi' kano ri Aki Kapuuno' maa' raginio bayagon boo ulun no ri Aki Kapuuno', ioginio ulun ondo' tula nilono kalo magibit ra kapatayan. Kaa' mokoondo' niayuk tula ondo' magibit ra kapatayan, am kalo mindagu aku ra musiti' kau makiasi' ri Aki Kapuuno' koson raginio. 17Ngaangai' baal makasala no tula. Kaa' mokoondo' tula kalo magibit ra kapatayan.
18Nakapandai takau ra ngaangai' ulun ondo' nasauk ra anak ri Aki Kapuuno' kalo marayus mambaal ra tula, sabap ra Anak ri Aki Kapuuno' mangampin riso am Tingganai ru riwato no kalo makaguut riso. 19Nakapandai takau ra itakau ti intor ri Aki Kapuuno', kabalu' pana ngaangai' ulun ru tana' ti kinuasa' ru Tingganai ru riwato.
20Nakapandai takau ra minatong noyo Anak ri Aki Kapuuno' am nangani' ritakau ra kaintutunan koson makaulig takau ri Aki Kapuuno'. Maayag takau sumimpung ri Aki Kapuuno' am niayuk i Jisus Kristus. Io noyo i Aki Kapuuno' ondo' motopot, am gitio noyo kaayagan motopot am mantilayun.
21Pabukat kau ngaangai', inggalur kano intor ra sinungkalalaing binaal-baal no!
Currently Selected:
1 JUANIS 5: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
