1 TUNUNG RU BANSA' ISRAIL 5
5
Papag ri Rubin
1 Gitilo noyo papag ri Rubin, anak katuaan ri Jakub. (Sabap ra rinulug ri Rubin sangulun ruandu' parulug ru ama' nali, io pana natatakan ra tungkuson no koson ra anak katuaan. Tungkuson raginio tinaakan ri Jusup. 2 Kabalu' pana raginio, bansa' ru Jiuda nasauk ra bansa' ondo' maikang kaga', am intor ra bansa' raginio sangulun nasauk ra mamarinta ra titikop ru bansa' ru Israil.) 3I Rubin, anak katuaan ri Jakub, mokoondo' apat anak ungkuyon: Ginok, Palu, Gijron am Karmi.
4-6 Gitilo noyo suang ru inggalan ru papag ri Joil: Simaya, Gog, Simii, Mika, Riaya, Baal am Biira, sangulun tingganai ru bansa' ru Rubin. Rinakop i Biira ru Raja' Tiglat-Pilisir intor ra Asyur, i Biira pana pinatiran ra pagun.
7Ralalom ru tinulisan ra suang ru inggalan, nakaaya' niayuk tingganai-tingganai ru bansa' ru Rubin ondo' gitilo: Jiyil, Jakaria, 8am Bila anak ri Ajas, akupu ri Sima intor ra bansa' ru Joil. Bansa' ragitio minayan giu' ra Aroir am giu' ra wilayah ondo' timinalimpuun intor ra Aroir mongoi ra tampilon ralayo giu' ra Nibo am Baal-Mion. 9Mokoondo' ilo ra masuang kaga' bibiag tinambiag giu' ra libung Giliad. Ginio ra minayan ilo ra tana' giu' ra tampilon sirangon saboi ra tana' kaagisan, ondo' malimparang saboi ra Sungoi Iprat.
10Paat ra Raja' Saul, bansa' ru Rubin namulunsar am nangala ra ulun ru Gagri, am minayan ilo ra tana' nilo giu' ra tampilon sirangon ru Giliad.
Papag ri Gad
11Bansa' ri Gad minayan giu' ra tampilon ralayo wilayah ru bansa' ru Rubin, giu' ra tana' Basan, saboi ra kinaalur ru Salka giu' ra tampilon sirangon. 12I Joil kinamatuaan ru bansa' ondo' nauligan kaga' ralalom bansa' ru Gad; i Sapam kinamatuaan ru bansa' ondo' karuo maatang. I Janai am i Sapat kinamatuaan ru bansa' ra bokon giu' ra Basan. 13Ulun ra bokon ra bansa' ru Gad nakaaya' ralalom ru tulu' bansa' ragitilo: Maikol, Misulam, Syiba, Jorai, Jakan, Jiya am Ibir. 14Ilo no papag ri Abiail anak ri Guri. Gitilo am suang ru inggalan nilo ondo' inimpuun toojo: Abiail, Guri, Jaroa, Giliad, Maikol, Jisisai, Jado, Bus. 15Tingganai ru bansa' raginilo iono i Agi anak ri Abdiil, akupu ri Guni. 16Bansa' raginilo minayan giu' ra wilayah Basan am Giliad, am giu' ra bandar-bandar giu' ra wilayah raginio, am niayuk giu' ra titikop ru padang ru sakot Saron. 17Suang ru inggalan ragitilo tinimung paat ra pamarintaan ru Raja' Jotam giu' ra Jiuda am Raja' Jirobiam II giu' ra Israil.
Saujor ru bansa'-bansa' giu' ra tampilon sirangon ru Sungoi Jordan
18Bansa' ru Rubin, bansa' ru Gad, am bansa' ru Manasi Sirangon mokoondo' 44,760 ngaulun saujor ondo' naila' toojo am mapandai toojo mamakai ra perisai, ilang am busur. 19Nangayou ilo ra bansa' ru Jitur, Napis am Nodab, iono bansa' ralalom bansa' ru Gagri. 20Saujor-saujor no mangintopot ri Aki Kapuuno' am nakiindangan Riso, i Aki Kapuuno' pana nangiou ra kinitaak nilo. Nangani' Io ra kamanangan ra bansa' ru Gagri am paguum nilo ra saujor-saujor no. 21Ginaau nilo 50,000 ngainan unta, 250,000 ngainan domba am 2,000 ngainan kaladai intor ra pantula' am namparakop ra 100,000 ngaulun. 22Namatoi ilo ra masuang pantula' sabap ra pangayawan no nasauk siminugut ra kasagaan ri Aki Kapuuno'. Ilo pana namagun giu' ra wilayah no saboi ra paat ilo pinatiran ra pagun.
Ulun intor ra bansa' ru Manasi Sirangon
23Ulun intor ra bansa' ru Manasi Sirangon namagun giu' ra wilayah Basan saboi ra ralayo ra kinaalur ru Baal-Girmon, Sinir am Gunung Girmon. Suang nilo riminuang. 24Gitilo noyo tingganai-tingganai ru bansa' nilo: Gipir, Jisii, Iliil, Ajriil, Jirimia, Godawya am Jadiil. Ilo ngaangai' saujor ondo' mapanggol, am niayuk tingganai ru bansa' ondo' nauligan kaga'.
Bansa'-bansa' giu' ra tampilon sirangon ru Sungoi Jordan pinatiran ra pagun
25Ulun ru Israil kalo giminagaya' ri Aki Kapuuno' ondo' sinamba ru kinamatuaan nilai. Iniruanan nilo Io am siminamba ra dewa-dewa ondo' sinamba ru bansa'-bansa' ondo' pinagiru' ri Aki Kapuuno' intor ra tana' raginio. 26 Ginio sabap ri Aki Kapuuno' nambuir ra guang ru Raja' Pul intor ra Asyur koson mamulunsar ra pagun nilo. Raja' Pul niayuk nauligan ra Raja' Tiglat-Pilisir. Bansa' ru Rubin, bansa' ru Gad am bansa' ru Manasi Sirangon pinatiran ra pagun giu' ra Galag, Gabor, Gara am giu' ra rondo' intok mamaar ra Sungoi Gojan. Namagun ilo ra giu' no saboi orou raiti'.
Currently Selected:
1 TUNUNG RU BANSA' ISRAIL 5: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
