Zekariya 7
7
Bululami aluzyalo nzeziyandwa kwiinda kuliimya kulya
1Lino mumwaka wane wamwami Dariyo, ijwi lya-Jehova lyakasikila Zekariya, mubuzuba bwane bwamwezi wamusanu aine, nkukuti mwezi wa-Kisilevi. 2Bantu ba-Beteli bakalitumide Syarezeri a-Regemeleki abantu bakwe kuti bakatontozye busyu bwa-Jehova, 3#Dt 17:9; Mal 2:7akubuzya bapaizi bamuŋanda ya-Jehova wamakamu abasinsimi kuti, Sa tuleelede kulila akuliimya kulya mumwezi wasanu, mbubonya mbutwakali kucita myaka minji yakamana? 4Mpawo ijwi lya-Jehova wamakamu lyakandisikila, lyakati, 5#Zek 1:12; Is 58:4; Mt 6:16; Rom 14:6Ambila bantu boonse banyika abapaizi kuti, Ciindi eco nimwakali kuliimya kulya akulila mumwezi wasanu amumwezi wamusanu aibili, eyi myaka yoonse iili makumi aali musanu aabili, sa ncobeni nkaambo kangu ncimwakali kuliimya kulya? 6Alimwi nimulya akunywa, teensi ndinywe nubeni nimulilida animulinywida? 7#Jer 17:26Sa aya teensi majwi Jehova ngaakaamba kumulomo wabasinsimi baciindi, Jerusalemu nuukacikedwe bantu akukala caluumuno, aminzi yawo iizyungulukide, anyika yakumusanza acisi catulundulundu zyoonse zyakalikedwe bantu?
8Lino ijwi lya-Jehova lyakasikila Zekariya, lyakati, 9Mbuboobu mbwaamba Jehova wamakamu. Amubeteke imbeta zyabuswini. Amucitile umwi aumwi mweenzinyina luse aluzyalo. 10Mutapenzyi banabutema abamusyaala amweenzu abatengwana. Kutabi uukanza mumoyo wakwe kucitila mweenzinyina bubi, 11Pele bakakaka kuswiilila, bakamufutatila cakukataazya, akuyumya matwi aabo kuti bataswiilili. 12Myoyo yabo bakaiyumya mbuli ibbwe liyuma nta, kuti bataswiilili mulao amajwi Jehova wamakamu ngaakatuma kunguzu zyamuuya wakwe kumilomo yabasinsimi baciindi. Nkaambo kako kwakabuka bukali bupati kuzwa kuli-Jehova wamakamu. 13Lino mbubonya mbundakaita mebo pele teebakamvwa, bayooita abalo pele nsikooyoobamvwa, mbwaamba Jehova wamakamu. 14Nkabela ndakabamwaisya akambizi akati kamisyobo yoonse yabantu njibatezi. Aboobo nyika yakaba matongo buyo, katakwe muntu iwakali kweendeenda nanka kukala mulinjiyo. Nyika imbotu bakainyonyoona buyo.
Currently Selected:
Zekariya 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
