Tito 1

1Ndime Paulo, ndemuzike wa-Leza, nde apostolo wa-Jesu Kristo wakuyaka lusyomo lwabasalwa ba-Leza aluzibo lwinilwini lujanene akukomba,

2Ndalangila buumi butamani, mbwaakasyomezya Leza, uutabeji, kalekale kakutana kuba ciindi, 3#Ef 1:9,10; 1 Tim 1:1,11eno kuciindi cakwe ncaakalisalila wakayubununa makani aakwe mukukambauka oku nkundakasyomezegwa mebo kumaanza aa-Leza Mufutuli wesu. 4#2 Kor 8:23; Gal 2:3; 2 Tim 4:10; 1 Tim 1:2Ndakujuzya Tito, mwanaangu mwinimwini silusyomoma. Ube aluzyalo aluumuno luzwa kuli-Leza Taateesu akuliJesu Kristo Mufutuli wesu.

Milimo njaakasiilwa Tito mu-Krete

5Nkakaambo ako ncendakakusiila mu-Krete, kuti umanizye kubamba oonse makani, akusala baalu muminzi yoonse, mbubonya mbundakakulailila, 6#1 Tim 3:2-7kufumbwa nkojana muntu uutakwe butongo, uugaminide mwanakazi omwe luzutu, alimwi kajisi bana bazumina, batajisi mulandu wabudakwi nokuba kutaba bana batalabulaye. 7#1 Kor 4:1; 1 Pet 5:2; 2 Tim 2:24Nkaambo bishopo uleelede kuba muntu uutakwe butongo, mbali mubanzi wa-Leza. Atabi sikazundozundo, nokuba kuba sikanyetunyetu, nokuba kuba mukolwi na kuyandisya kulwana, nokuba kuunya kulubono lwaansi ano. 8Uleelede kuba sicimwa beenzu, uuyandisya kululama, uulibatamika, uuluzi, uutakwe kampenda, sikulyeendelezya, 9#Tit 2:1; 1 Tim 1:10; 2 Tim 4:3alimwi abe sikujatisya makani aasyomeka aayeme kulwiisyo lwesu, kuti akonzye kukombelezya beenzinyina kulwiisyo lwinilwini, alimwi azunde basikukazyanya.

Makani aabaiyi babeji baku-Krete

10Nkaambo mpobali banjibanji bantu batalabalaya, baamba majwi aabuyo aakweena, kwaambisya abo basikupalulwa. 11#Tit 3:6; Joh 10:12; 1 Pet 5:2Aba mbabeelede kuti milomo yabo isinkwe, nkaambo batubinganya maanda aabamwi kukufundisya zintu ziteelede nkaambo kakuunya kulubono lwaansi. 12Umwi musinsimi wabo beni wakati, Lyoonse bantu ba-Krete mbasikubeja, mbabi mbuli banyama, alimwi mbasindya batolo. 13#2 Tim 4:2Makani aya ngakusinizya. Nkaambo kaako ubatapatile canguzu, kuti bakale kabotu mulusyomo, 14#1 Tim 4:7bataswiilili zyamankwangwaalizya aa-Bujuda amilao yabantu baleede kumakani menimeni. 15#Mt 15:11; Rom 14:20Kubantu basalala zyoonse zintu zilasalala, pele kubantu basofweede abatazumini takukwe cintu niciba comwe cisalala, nkaambo kuyeeya kwabo amyoyo yabo zyoonse zilisofweede. 16#2 Tim 3:5Balalyaamba kuti, Tulizi Leza, anu kumilimo yabo balamukazya. Mbasesemyi, batamvwi, bateeledwe milimo mibotu nuuba omwe.

Currently Selected:

Tito 1: Ibbaib63

Highlight

Copy