Ba-Roma 5
5
Zyoolwe zipati zizwa mukululamikwa
1 #
Rom 3:24,28; 4:24; Is 53:5 Lino mbuli mbutululamikwa kulusyomo, atube aluumuno a-Leza muli Jesu Kristo Mwami wesu, 2#Ef 3:12; Rom 3:23Mulinguwe mutujene lunjililo lwamu luzyalo olu mutubede, alimwi tulatangala mukulangila bulemu bwa-Leza, 3#Jak 1:2,3; 1 Pet 1:5-7Nkabela teensi aya luzutu, pele alimwi atutangale mumafwabi esu, nkaambo tulizi kuti mafwabi alaleta lukakatilo, 4alwalo lukakatilo lulaleta ziimbo zisunke, azyalo ziimbo zisunke zilaleta bulangizi, 5#Int 22:5; 25:20; Heb 6:18,19nkabela bulangizi tabuusyi bweeme, nkaambo kakuti luyandisyo lwa-Leza lulapaya mumyoyo yesu kuzwa ku-Muuya Uusalala ngutwapegwa. 6Nkaambo nitwakacikompeme, kuciindi ceelede Kristo wakafwida basikasampusampu. 7Nciyumu kumuntu kufwida muntu uululeme, nekubaboobo na wabona kuti muntu mubotu, inga ulazumina kumufwida, 8#Joh 3:16; 1 Joh 4:10Pele Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida. 9#Rom 1:18; 2:5,8Nkabela lino mbutwalulamikwa kubulowa bwakwe, mulinguwe alimwi mututi inde loko kufutulwa kubukali, 10#Rom 8:7Nkaambo kuti kuciindi ncitwakali basinkondonyina twakayanzanisigwa kuli-Leza kulufu lwamwanaakwe, elyo kuciindi ecino ncituyanzanisisidwe kale tulainda kufutulwa kubuumi bwakwe. 11Nkabela teensi boobo luzutu, pele alimwi tulatangala muli-Leza nkaambo ka-Mwami wesu Jesu Kristo, ikuti kumaanza aakwe nkutujene luyanzano.
Adamu wakaletela bantu lufu, Kristo wakabaletela buumi
12 #
Matl 3:6; 2:17; 3:19; Rom 6:23 Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya. 13#Rom 4:15Ikuti mane kusikila kuciindi ca-Mulao kakuli cibi munyika, pele cibi taceelezegwi ciindi ncikutakwe Mulao. 14#1 Kor 15:21,22,45,55Pele lufu lwakali abwami kuzwa kuli-Adamu kusikila kuli-Musa, nikuba kulibaabo batakaina kucita zibi zikozyenye alusotoko lwa-Adamu, nguwenya cikozyano casikuciza. 15Pele cipo tacili mbubonya mbuli mulandu pe. Nkaambo bantu banji bakafwa nkaambo kamulandu wamuntu omwe buyo, pele luzyalo lwa-Leza lwakainda loko kupaya, acalo cipo camuluzyalo camumuntu omwe Jesu Kristo, kubantu banji. 16Nkabela cipo taceensi mbuli cakumaanza aamuntu omwe iwakabisya. Nkaambo olo lubeteko lwamuntu omwe ndululeta mulandu, pele cipo cizwa kunsotoko zinji cilaleta lululamiko. 17Nkaambo kulusotoko lwamuntu omwe lufu lwakaba abwami kumaanza aamuntu oyo omwe, elyo abo batambula lupayo lwaluzyalo alwacipo cabululami, abo balainda kuba abwami bwamubuumi kumaanza aamuntu omwe, nguwenya Jesu Kristo. 18#1 Kor 15:22Mbubo, mbuli kulusotoko lwamuntu omwe kwakazida bantu boonse mulandu, mbubonya obo kubululami bwamuntu omwe kulazida bantu boonse lululamiko lwabuumi. 19#Is 53:11Nkaambo mbuli kukutaswiilila kwamuntu omwe banji bakaba basizibi, mbubonya obo kukuswiilila kwamuntu omwe banji balaba baluleme. 20#Rom 4:15; 7:8; Gal 3:19Lino Mulao wakanjila kuti lusotoko lukomene. Pele cibi nkucakavula, nkukonya oko luzyalo nkulwakainda kuvula. 21#Rom 6:23Kuti mbubonya mbuli cibi cakaba abwami bwamulufu, alwalo luzyalo lube abwami bwabululami buleta buumi butamani bwamuli-Jesu Kristo Mwami wesu.
Currently Selected:
Ba-Roma 5: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
