Ba-Roma 2

Ba-Juda mbubakali kubisya abalo. Boonse buyo bali amulandu kumeso aa-Leza

1 # Mt 7:1; Lk 6:37; Joh 8:7 Nkaambo kaako tojisi buliinsyo, omuntu kufumbwa noli buti obeteka, ikuti mumakani ayo ngobeteka mweenzinyoko ulalipa mulandu omwini nkaambo ulacita mbubonya, ayebo obeteka. 2Tulizi kuti lubeteko lwaLeza lwakusinizya lulawida alimbabo bacita milimo iili boobo. 3Pele ulayeeya buti, muntu obeteka bamwi bacita milimo iili boobo anukuti ulaicita mbubonya ayebo omwini? Sa uyooyokoka kulubeteko lwa-Leza? 4#2 Pet 3:15Alimwi sa ulasampaula bunji bwaluzyalo lwakwe abusicamba bwakwe abukaliki bwamoyo wakwe, kukutaziba kuti luzyalo lwa-Leza ndolukweenzya kukweempwa? 5Pele mbuli buyumu bwako amoyo wako uuteempwi ulaliyobweda bukali mubuzuba bwabukali mbuluzooyubununwa lubeteko lululeme lwa-Leza. 6#Int 62:12; Tus 24:12; Mt 16:27; Joh 5:29; 2 Kor 5:10Nkaambo uzooabila boonse mbuli milimo yabo. 7Abo ibacita kabotu cabusungu akuyandaula mbubonya bulemu akulemekwa akutafwa, ulabaabila buumi butamani. 8#2 Tes 1:8Pele abo ibakazyanya akutaswiilila lusinizyo, anukuti baswiilila kutalulama, ulabaabila lunyemo abukali. 9#Rom 1:16; 3:9Kulaba mapenzi amafwabi kuliboonse bantu bacita bubi, nibaba ba-Juda kukusaanguna nibaba ba-Helene, 10pele bulemu akulemekwa aluumuno kuliboonse bacita bubotu, nibaba ba-Juda kukusaanguna nibaba ba-Helene, 11#Dt 10:17; Inc 10:34; 1 Pet 1:17Nkaambo kwa-Leza takulangililwi ciwa pe, 12Nkaambo boonse babisya mukubula Mulao balafwidilila mukubula Mulao, nkabela boonse babisya mu-Mulao balabetekwa nkukonya ku-Mulao. 13#Mt 7:21; 1 Joh 3:7; Jak 1:22,25Nkaambo abo baswiilila Mulao teensi mbabo baluleme kumeso aa-Leza, pele abo bacita Mulao mbimbabo bazoolulamikwa, 14#Inc 10:35Nkaambo bamasi batakwe Mulao nibacita camumoyo makani aamu-Mulao, elyo aba batakwe Mulao balibeda Mulao beni, 15#Rom 1:32Aba balatondezya mulimo wa-Mulao uulembedwe mumyoyo yabo, nkabela kuciindi nciconya manjezeezya aabo aalo alazumina, amiyeeyo yabo ilabapa milandu nanka kubalubusya 16#2 Tim 2:8mubuzuba obo mbwazoobeteka Leza makani aasisidwe aabantu muli-Jesu Kristo, mbuli Makani Mabotu nginkambauka mebo.

Paulo ulakazyanya abasikuupaupa ameso akati kaba-Juda

17 # Jak 2:19 Pele kuti kolibanda mu-Juda, akusyoma mu-Mulao, akulikankaizizya Leza, 18#Flp 1:10akuziba luyando lwakwe, akusalaula zintu zyaandeene kukwiiyigwa mu-Mulao, 19#Mt 15:14; Lk 18:9alimwi kuti koliyeeya kuti ndime mweenzi waboofu, amumuni wabo bali mumudima, 20#2 Tim 3:5amusolozi wabatayide, amwiiyi wabana, kukuba aluzibo alusinizyo luboneka mu-Mulao, 21#Int 50:16-21; Mt 23:3,4ino yebo oiisya mweenzinyoko sa toliisyi omwini? Yebo okambauka kutabba, sa ulabba? 22Yebo oamba kutacita bumambi, sa ulacita bumambi? Yebo osesemwa mituni, sa ulasaala intempele 23Yebo olikankaizizya Mulao, sa ulaubaansya Leza kukusotoka Mulao 24#Is 52:5; Ezk 36:20Nkaambo izina lya-Leza lilasampaulwa akati kabamasi nkaambo kandinywe, mbubonya mbukulembedwe.

Bupalule bwinibwini

25 # Jer 4:4; 9:24,25 Nkaambo bupalule bulagwasya kuti kolomya Mulao, pele kuti koli sikusotoka Mulao bupalule bwako bwaba lulomo. 26#Gal 5:6Lino kuti silulomo kalomya milimo iiluleme yamu-Mulao, sa lulomo lwakwe talukooyooambwa mbuli bupalule? 27Alimwi oyo silulomo uulomya Mulao camumoyo sa takooyoobeteka nduwe ojisi malembe abupalule anukuti uli sikusotoka Mulao? 28#Joh 8:15,39; 7:24Nkaambo oyo wakumeso aabantu engwe mu-Juda, abwalo bupalule embo bwakunyama kumeso aabantu. 29#Dt 30:6; Matl 49:8; Kol 2:11Oyo wamumoyo ngumuJuda, abwalo bupalule mbwamumoyo, ngemakani aamuuya, teensi makani aabulembe buyo, Oyu tatembauliki kubantu pele kwa-Leza.

Currently Selected:

Ba-Roma 2: Ibbaib63

Highlight

Copy