Ba-Roma 11

Paulo ulasyoma kuti Ba-Juda abalo bayoofutuka ciindi ciboola

1 # Flp 3:5; Int 94:14; 1 Sam 12:22; Jer 31:37 Lino ndabuzya kuti, Sa Leza ulicitakatide cisi cakwe? Ne! Ambebo ndi mu-Israyeli, ndazwa kumbuto zya-Abrahamu, akumukowa wa Benjamini. 2#1 Bam 19:10,14Leza tatakatide cisi cakwe pe, cisi cakwe ncaakazibide kale! Sa tamuzi mbwaamba malembe aa-Eliya? Ulabikila Israyeli kaambo kubusyu bwa-Leza, kakuti, 3#1 Bam 19:10,14Jehova, basinsimi bako balibajayide, azipaililo zyako balizimwayide, ambebo ndasyaala endike, alimwi buumi bwangu balabuvwima, bandinyanzye. 4#1 Bam 19:18Pele Leza wamuvwiila buti? Wati, Ndililiyobwedede bantu bali zyuulu zili musanu azibili bamu-Israyeli abatana kufugamina Baala, 5#Rom 9:27Mbubonya boobo, akwalo kuciindi casunu kuli cisyaalizyo cisalwa kuluzyalo, 6#Gal 3:18Pele kuti ncaluzyalo, nkukwaamba kuti teensi cancito, cita luzyalo talucili luzyalo pe.

7 # Rom 9:31 Lino nkutyeni? Eco ncibakali kuyandaula ba-Israyeli tabacijene pe, anukuti basale balicijene pele bamwi boonse baliyumidwe. 8#Dt 29:4; Is 29:10Mbubonya mbukulembedwe kuti,

Leza wabapa muuya waciŋonziŋonzi, Meso aakutabona, amatwi aakutamvwa,

kusikila kuciindi casunu.

9 # Int 69:22-23; 35:8 Alakwe Davida ulaamba kuti,

Intafule yabo ibe mbuli citezyo akakole,

Ibabede cilebyo alukomyo.

10Asizigwe meso aabo, bataboni.

Ongomeka masule aabo lyoonse.

11 # Dt 32:21; Inc 13:46; Rom 10:19 Lino ndabuzya kuti, Sa bakalebegwa cakuwididila? Ne! Pele kululeo lwabo bamasi nkubajene lufutuko, kuti babe acizubaazyo, 12Mbubo, pele luleo lwabo ndulwakabeda bantu baansi boonse buvubi, abwalo busweeki bwabo mbubwakabeda bamasi buvubi, elyo luzuzyo lwabo sa talukooyooinda loko lwalo?

Lufutuko lwaba-Juda lulaletela misyobo yoonse coolwe

13Ndamwaambila nywebo nubamasi mbuli mbwendi apostolo wabamasi, ndalemeka eyi milimo yangu njiyonya, 14#1 Tim 4:16kuti inga ndakonzya kuzubaazya basinyamama, cita nkafutule bamwi akati kabo, 15Nkaambo anooli busowe bwabo mbubwabeda bantu baansi boonse luyanzano, ino bulaba buti butambulwi bwabo? Inga bulaba mbuli buumi buzwa kulufu.

Bamasi tabeelede kulisumpula

16 # My 15:17-21 Anooli masomwa asalala, aalo maila oonse alasalala. Anooli muyanda wasalala, ayalo mitabi ilasalala. 17#Ef 2:11-19Pele mitabi imwi niyakagonkwa, elyo yebo noli kasonsela kamusokwe wakasimpikilwa akati kayo, kuti ukamantane ayo antoomwe kucisiko cini camusamu wa-olifa, 18#Joh 4:22utalitembauli kumitabi eyo. Nolitembaula, uleelede kwiibaluka kuti teensi nduwe onyampula cisiko pe, cisiko ncecikunyampula webo. 19Ulaamba kuti, Mitabi yakagonkwa, kuti nkasimpikilwe mebe. 20#Rom 12:16Mbukubede. Kutasyoma kwayo nkuyakagonkelwa, alimwi webo, kulusyomo lwako nkoimvwi. Nekubaboobo utalisumpuli pe, ulitole ansi buyo. 21Nkaambo Leza mbwaatakafwida mitabi ini-ini insoni, takooyookufwida insoni awebo. 22#Joh 15:2,4; Heb 3:14Amubone luzyalo lwa-Leza, alimwi abwalo buyumu bwakwe. Kulibaabo bawide muyumu, anukuti kulinduwe ngusiluzyalo, nkukwaamba kuti nokakatila kuluzyalo lwakwe, pele watacita obo, ayebo ulagonkwa. 23#2 Kor 3:16Abalo, kuti batakakatili kukutasyoma kwabo, balasimpikilwa. Leza ulakonzya kubweedela kubasimpikila. 24Ikuti webo, niwakagonkwa kumusamu uulimezya wamusokwe akusimpikilwa mumusamu mubotu cakutalimezya sa tiikooyooinda eyi mitabi iniini kusimpikilwa mumusamu wayo ini.

Kumamanino luzyalo lwa-Leza lulaboneka kubantu boonse

25 # Lk 21:24; Joh 10:16; Rom 12:16 Nubakwesu, nsiyandi kuti mutazibi aya makani aasisidwe, kuti mutalisumpuli mumiyeeyo yanu, aakuti buyumu bwa-Israyeli mbwacipanzi buyo, mane do unjile mweelwe woonse wabamasi, 26#Is 59:20; 27:9; Mt 23:39; Int 14:7nkabela elyo bazoofutuka ba-Israyeli boonse. Mbubonya mbukulembedwe kuti,

Kuzwa ku-Zioni kuzooza muvuni,

Nguwe uyootanda kasampusampu kakuli-Jakobo.

27 # Jer 31:33-34; Is 27:9 Nguwenya mulongo wangu kulimbabo

Ciindi ncinti gwisye zibi zyabo.

28Ku-Makani Mabotu mbobasinkondonyina Leza, nkaambo kandinywe, pele kubusale mbayandiki nkaambo kabawisaabo. 29Nkaambo zyaabilo zya-Leza abwiite bwakwe zyoonse tazilekeki pe. 30Nywebo kalekale mwakali basicinguni kuli-Leza, pele sunu mulijene lweetelelo nkaambo kacinguni cabaabo. 31Mbubonya obo sunu balo mbasicinguni, pele kukweetelelwa kwandinywe nkubazooetelelwa abalo. 32#Gal 3:22; 1 Tim 2:4Nkaambo Leza ulijalide bantu boonse mucinguni, kuti abeetelele boonse.

Paulo ulalumba Leza nkaambo kaluzyalo lwakwe lugambya

33 # Is 55:8; 45:15; Rom 9:23; 10:12 Ha! muli bulondo buteeli mubusongo bwa-Leza amuluzibo lwakwe! Ncobeni imbeta zyakwe tazilangiki, aziyanza zyakwe tazitobeleki!

34 # Is 40:13; Job 15:8; Jer 23:18; 1 Kor 2:16 Nkaambo nguni uubwene miyeeyo ya-Mwami?

Na nguni wakaba mukanzenyina?

35 # Job 41:11 Na nguni iwakasaanguna kumupa cintu, akaboozezegwe ncico? 36#1 Kor 8:6Ikuti kulinguwe nkuzizwida zintu zyoonse, alimwi mulinguwe muziponena, alimwi kulinguwe nkuzyeelela. Walo abe abulemu kube akutamani. Ameni!

Currently Selected:

Ba-Roma 11: Ibbaib63

Highlight

Copy