Ciyubunuzyo 1

1 # Dan 2:28,29 Aya nceciyubunuzyo ca-Jesu Kristo ncaakapegwa kwa-Leza kuti atondezye bazike bakwe zintu zyeelede kufwambaana kuboola kuciindi ciza, nkabela wakatuma kujanza lyaangelo wakwe akuziyubunwida muzike wakwe Johane, 2#Ciy 6:9Alakwe Johane wakalungulula makani aa-Leza abukamboni bwa-Jesu Kristo azintu zyoonse nzyaakabona. 3#Ciy 22:7,10Uli acoolwe uubala, abaabo baswiilila majwi aabusinsimi obuno, akubamba zintu ezyo zilembedwe mulimbubo, nkaambo ciindi cili afwaafwi.

Johane ulajuzya imbungano zili musanu azibili zyamu-Asiya

4 # Kul 3:14,15; Is 41:4; Ciy 3:1; 4:5; 5:6 Johane ulajuzya imbungano zili musanu azibili zili mu-Asiya, Amube aluzyalo aluumuno kuzwa kulinguwe Uuliko, Uwakaliko, Uuyoobako, akuzwa kumyuuya iili musanu aibili iili kunembo lyacuuno cakwe, 5#Is 55:4; 40:2; Int 89:27,37; 130:8; Joh 18:37; Kol 1:18; Heb 9:14; Ciy 3:14; 7:14; 19:16akuzwa kuli-Jesu Kristo, ngukamboni uusyomeka, iwakasaanguna kuzyalwa kuzwa kubafu, alimwi ngumweendelezi wabami banyika. Kulinguwe iwakatuyanda, akutusanzya kuzibi zyesu mubulowa bwakwe mwini, 6#Kul 19:6; Ciy 5:10; 1 Pet 2:5,9; Is 61:6akutubika kuba bami abapaizi kuli-Leza Wisi, kulinguwe akube bulemu abwami lyoonse kukabe kutamani, Ameni, 7#Dan 7:13; Mt 24:30; Mk 13:26; Lk 21:27; 23:27,28; 1 Tes 4:17; Zek 12:10-14; Joh 19:34,37Amubone, uleza amakumbi, nkabela meso oonse ayoomubona, abaabo bakamuyasa, elyo mikowa yoonse yanyika iyoolila nkaambo kakwe. Akube boobo, Ameni, 8#Kul 3:14; Ciy 22:13; 4:8; 21:6; Is 41:4Ndime Alfa a-Omega, matalikilo amamanino, mbwaamba Jehova Uuliko, Uwakaliko, Uuyoobako, Singuzuzyoonse.

Cilengano ca-Johane ncaakabona mukasuwa kategwa Patmo

9Ndime johane, ndi mwanaakwanu amweenzinyoko wamumapenzi amu bwami bwa-Jesu Kristo amulukakatilo lwakwe. Ndakali mukasuwa kategwa Patmo nkaambo kamakani aa-Leza abumboni bwa-Jesu Kristo. 10Ndakali mu-Muuya kubuzuba bwa-Mwami, elyo ndakamvwa kusule lyangu ijwi ipati mbuli mweembo, 11#Ciy 2:8; 22:13lyakati, Ndime Alfa a-Omega, matalikilo amamanino, Aya makani ngoobona, uleelede kwaalemba mubbuku, akuliruma kumbungano zili musanu azibili zyamu-Asiya, nkukuti kuli-Efeso, akuli-Smuma, akuli-Perpamo, akuli-Tuaraira, akuli-Sarde, akuliFiladelfia, akuli-Laodikeva, 12Lino ndakacebuka kubona ijwi ilyakandaambila, nkabela mukucebuka kwangu ndakabona zibikilo zyamalampi zyangolida zili musanu azibili, 13#Dan 7:13; 10:5; Ezk 1:26; 8:2alimwi akati kazibikilo ezyo ndakabona umwi uuli mbuli Mwana a-Muntu, iwakasamide cikobela cilamfu, awakaangidwe kucamba lwambo lwanzolida. 14#Dan 7:9; 10:6; Ciy 2:18; 19:12Mutwe wakwe amasusu aakwe akali kutuba mbuli boya bwamhelele butuba, akatuba buu mbuli lukobo, ameso aakwe akali mbuli ibbalabala Ivamulilo. 15#Ezk 1:24; 43:2Maulu aakwe akali mbuli mukuba uusalalisya wapya mumulilo, amwaambo wakwe wakali mbuli ijwi lyamaanzi manjimanji. 16#Bab 5:31; Ciy 2:12,16; 19:15Kujanza lyakwe lyalulyo wakalijisi inyenyeezi zili musanu azibili, akumulomo wakwe kwakazwa ipanga libosya koonse koonse, nkabela busyu bwakwe bwakali kumweka mbuli izuba nolimweka canguzu zyalyo. 17#Is 44:6; 48:12; Ciy 2:8; 22:13; Dan 8:18; 10:15-19Lino nindakamubona, ndakawida kumaulu aakwe mbuli mufu, Elyo wakabika ijanza lyakwe lyalulyo alindime, wakandaambila kuti, Utayoowi. Ndime mutaanzi amusyaalizi. 18Ndime oyu uupona, nekubaboobo ndakalifwide. Lino amubone, akupona ndapona lyoonse mane kukabe kutamani, nkabela ndijisi zijaluzyo zyalufu azya-Gehena, 19#Is 48:6; Dan 2:29Lemba makani ngobwene, amakani aaliwo, makani aazoobawo, 20#Mal 2:7; Dan 2:29amakani aasisidwe aanyenyeezi zili musanu azibili nziwakabona mujanza lyangu lyalulyo, azibikilo zyamalampi zili musanu azibili. Inyenyeezi zili musanu azibili mbobaangelo bambungano zili musanu azibiti, azibikilo zyamalampi zili musanu azibili nziwakabona nzembungano zili musanu azibili.

Currently Selected:

Ciyubunuzyo 1: Ibbaib63

Highlight

Copy