Marko 11

Jesu mbwaakanjila mu-Jerusalemu

(Matayo 21:1-11; Luka 19:29-44; Johane 12:12-19)

1 # Mt 21:1-9; Lk 19:29-38; Joh 12:12-16 Lino baswene buyo ku-Jerusalemu akusika ku-Betefage aku-Betaniya akucilundu ca-Elaioni, watuma bamwi basikwiiya bakwe bobile, 2wabaambila kuti, Kamuya kumunzi uuli kunembo, elyo mbomuti kuunjilile buyo, muyoobona kana kambongolo katanatantidwe muntu, kalisungidwe. Amukakasungulule, mukakalete okuno. 3#Mk 14:14Kwaakuba uuti kamubuzye kuti, Ino mucitilanzi obo? mukavwiile kuti, Ulakayanda Mwami, elyo ulakapilusya mpoonya mpoonya. 4Lino bakainka, baakujana imbongolo, njeeyi ilisungidwe kumulyango anze mumugwagwa, elyo bakaisungulula. 5Nkabela bamwi ibakaliimvwi oko bakabuzya kuti, Ino kai njaanzi imbongolo eyi njomwaangulula? 6Mpawo bakabaambila mbubonya mbwaakabalailila Jesu, elyo bakabazumizya. 7Nkabela baisisye buyo kuli-Jesu, bakavwapaika zyakusama zyabo alinjiyo, elyo wiitanta. 8Alimwi, banjibanji bakayala zikobela zyabo munzila, abamwi bakayala masanzu ngubakatema mumyuunda. 9#Int 118:25-26Lino abo abakali kunembo, abalo abo ibakali kumucilide munsi, boonse bakoonzomoka kuti,

Hosana!

Uli acoolwe oyu uuboola muzina lya-Jehova,

10Buli acoolwe Bwami buboola, Bwami bwa-Taateesu Davida,

Hosana kujulu kwinikwini.

11 # Mt 21:12-22; Lk 19:45-48 Lino wakasika mu-Jerusalemu, waakunjila muntempele. Amane buyo kulanga-langa, nikwakasia, wamuzwa, wainka ku-Betaniya antoomwe abali ikumi ababili.

Makani aamukuyu

(Matayo 21:18-22)

12Buce buyo, nibakazwa ku-Betaniya, wakafwa inzala. 13#Lk 3:9; 13:6-9Lino naakalanga alaale wakabona bukuyu busia matu, elyo wakasika kulimbubo, kuti antela kuli inkuyu, alye. Pele naakasika kulimbubo, wajana kuti taakwe pe, pele matu luzutu, nkaambo ciindi cankuyu kacitana kusika. 14#Mk 11:20Mpoonya wakaambila obo bukuyu kuti, Kuzwa sunu kutabi uulya micelo kulinduwe lyoonse. Abalo basikwiiya bakwe bakamvwa.

Jesu mbwaakatanda basambazi kuntempele

(Matayo 21:12-17; Luka 19:45-48)

15 # Joh 2:14-16 Lino bakasika ku-Jerusalemu. Mpoonya wakanjila muntempele, wakatalika kutanda basambazi abaabo bakali kuulana muntempele, wakatapaula matafule aabasikusintana mali azyuuno zyabasikuuzya inziba, 16alimwi takakali kuzumizya naba muntu uyumwide cintu kuti ainde muntempele pe. 17#Is 56:7; Jer 7:11Elyo wakabaiisya kuti, Sa takulembedwe kuti, Iŋanda yangu inooambwa kuti niŋanda yakukombela yamasi oonse? Anu nywebo mwiicita kuti ibe ikoba lyababbi. 18Lino bapaizi basimutwe abalembi nibakamvwa obo, bakatalika kuyandaula mbobati mujaye, nkaambo bakali kumuyoowa, ikuti banamunji boonse bakakankamana kukwiisya kwakwe.

19Lyoonse kufumbwa naakaba mangolezya wakali kupola mumunzi.

Mukuyu mbuwakayuminina

20 # Mk 11:14 Nkabela nibakainda cifumofumo, bakabona obo bukuyu bwakayuminina nta akumiyanda koonse. 21Lino Petro naakaibulukwa, wakaambila Jesu kuti, Mwami, kolanga, bukuyu obuya mbowakasinganya bwakayuma nta! 22#Joh 14:1Mpoonya awo Jesu wakabavwiila kuti, Amube alusyomo lwakuli-Leza. 23#Mt 17:20; 1 Kor 13:2; Lk 17:6Ncobeni ndamwaambila kuti, Umwi aumwi uuambila idundu eli kuti, Zyuka awa, uwaalwe mulwizi, alimwi tadooneki mumoyo wakwe anukuti wasyoma kuti eco ncaamba ciyooba, uyoocipegwa ncobeni. 24#Mt 7:7; Joh 14:13; 16:23Boobo ncindamwaambila kuti, coonse ncimukomba akukumbila, amusyome kuti mulatambula nciconya, elyo mulacipegwa ncobeni. 25#Mt 6:14-15; 5:23Alimwi, lyoonse mwanooima akukomba, na muli akaambo amweenzinyoko, amumulekelele nkako, kuti alakwe Usowanu uuli kujulu akamulekelele milandu yanu. 26Pele na mwakaka kulekelela, alakwe Usowanu uuli kujulu takooyoomulekelela milandu yanu.

Jesu mbwaakabuzigwa aabwami bwakwe

(Matayo 21:23-27; Luka 20:1-8)

27 # Mt 21:23-27; Lk 20:1-8 Alimwi bakabweeda ku-Jerusalemu. Lino naakaakweendeenda muntempele, kwakamuzida bapaizi basimutwe abalembi abapati. 28Balo bakamubuzya kuti, Ino kai mbwaminzi mbomanya milimo eyi? Alimwi, nguni wakakupa bwami bwakumanya milimo eyi? 29Jesu wakabaambila kuti, Ambebo ndamubuzya ijwi lyomwe. Mwandivwiila, ndilamwaambila bwami mbwemanya milimo eyi. 30Lubapatizyo lwa-Johane, sa lwakazwa kujulu nanka kubantu? Amundivwiile. 31Lino bakabuzyanya mulicabo kuti, Anooli twaamba kuti lwakazwa kujulu, walo ulati, Lino nkaambonzi ncimwatakamuzuminina? 32Pele na twaambe buyo kuti lwakazwa kubantu-bakali kuyoowa bantu, nkaambo boonse bakali kwaamba kuti Johane musinsimi mwinimwini. 33Lino bakavwiila Jesu kuti, Tatuzi nkulwakazwa pe, Mpawo Jesu wakabaambila kuti, Ambebo nsikoomwaambila bwami mbwemanya milimo eyi.

Currently Selected:

Marko 11: Ibbaib63

Highlight

Copy