Matayo 2

Makani aabasongo bazwa kujwe

1 # Lk 2:1-7 Elyo Jesu naakazyalwa mu-Betelehemu waku-Judaya muciindi camwami Heroda, kwakasika ku-Jerusalemu basongo bazwa kujwe, 2#My 24:17bakaamba bati, Uli kuli uuzyedwe mwami waba-Juda? nkaambo twakabona inyenyeezi yakwe kujwe, tweza kumukomba. 3Lino mwami Heroda naakamvwa boobo wakazingwa, aba-Jerusalemu boonse abalo. 4Lino wakabunganya bapaizi basimutwe abalembi boonse babantu, wababuzya wati, Ino nkukuli nkwayoozyalilwa Kristo? 5#Mik 5:2; Joh 7:42Bakaamba bati, Mu-Betelehemu waku-Judaya, nkaambo mbuboobo mbukulembedwe kumusinsimi kuti,

6 # Mik 5:1 Ayebo Betelehemu, cisi caku-Judaya,

Ncobeni toli muniini mubami baku-Judaya,

Nkaambo kuzwa kulinduwe kuzooba mwami,

Nguwe uuzooembela bantu bangu ba-Israyeli.

7Lino mwami Heroda wakabaita basongo kumbali, wababuzisisya ciindi nciyakaboneka inyenyeezi. 8Elyo wakabatuma ku-Betelehemu, wakati, Kamuya mukayandaule kabotu mwana, nkabela mwaakumujana muzoondaambile, kuti nze ambebo kukumukomba. 9Lino balo nibakamvwa mwami bakainka, nkabela inyenyeezi njibakabwene kujwe yakaya kunembo lyabo mane do yakasika, yaima ajulu mpaakabede mwana. 10Nibakabona inyenyeezi bakakondwa kukondwa kupati loko. 11#Int 72:10,15; Is 60:6Lino basike kuŋanda, bakabona mwana a-Mariya banyina, mpawo bakavundama akumukomba. Nkabela bakavununa zilondwedo zyabo, bamupa inkambilizyo zyangolida atununkilizyo tutegwa libano amura. 12Lino bakalaizigwa kuli-Leza muciloto kuti batabweedi kuli-Heroda, nkaambo kaako bakabweeda kulimbabo anzila imbi.

Jesu mbwaakatolwa ku-Egepita. Bana bamu-Betelehemu mbubakajayigwa

13 # Kul 2:15 Lino nibakainka angelo wa-Jehova wakabonekela Josefa muciloto, wakati, Buka, tola mwana abanyina, uloboke uye ku-Egepita, ukakale nkuko mane nkakwaambile, nkaambo kakuti Heroda ulayandaula mwana kuti amujaye. 14Mpawo wakabuka, watola mwana abanyina masiku, wainka ku-Egepita, 15#Hos 11:1wakaakukala oko mane kusikila kulufu lwa-Heroda, kuti acitwe ngaakaamba Jehova kumusinsimi kuti, Kuzwa ku-Egepita nkundakaita mwanaangu. 16Lino Heroda naakabona kuti weenwa kubasongo wakakalala kapati, nkabela wakatuma kuti akajaye bana boonse baku-Betelehemu abeengelede mucisi basimyaaka yobile abali munsi, mbubonya mbuli ciindi ncaakabuzisisya basongo. 17#Jer 31:15Lino akacitwa aakaambwa kuli-Jeremiya musinsimi kuti,

18 # Jer 31:15; Matl 35:19 Ijwi lyakamvwigwa ku-Rama,

Kulila akweema kupati,

Ngu-Rakele uulilila bana bakwe,

Wakaka kuumuzigwa nkaambo tabaciwo.

Mbubakaboola kuzwa ku-Egepita

19Nkabela Heroda naakafwa, angelo wa-Jehova wakabonekela Josefa muciloto mu-Egepita, 20#Kul 4:19wakati, Buka, tola mwana abanyina, uinke kucisi caba-Israyeli, nkaambo balifwide bakayandaula buumi bwamwana. 21Lino wakabuka, wakatola mwana abanyina, wakainka kucisi caba-Israyeli. 22Pele naakamvwa kuti ngu-Arkelao uuendelezya Judaya mucuuno cawisi Heroda, wakayoowa kwiinka oko. Lino mbuli mbwaakalaizigwa muciloto wakainka kucisi ceengelede ca-Galilaya, 23#Mk 1:24; Lk 1:26; 2:39; Joh 1:45; Is 11:1; 53:2nkabela wakasika kumunzi uutegwa Nazareta, wakakala nkukonya oko, kuti acitwe ngobakaamba basinsimi, kuti Uzootegwa mu-Nazareta.

Currently Selected:

Matayo 2: Ibbaib63

Highlight

Copy