Luka 5

Jesu abasikwiiya bakwe bataanzi

(Matayo 4:18-22; Marko 1:16-20; Johane 1:40-42)

1 # Mt 13:1-2; Mk 3:9-10; 4:1 Eno makamu aabantu naakamubunganina kuswillila makani aa-Leza, wakaliimvwi kumbali eziba lya-Genesarete, 2nkabela wakabona maato obile, aliimvwi mumbali lyeziba, pele basikuzuba bakalizwide mulingao, bali kusanzya nsabwe zyabo. 3Wakanjila mubwaato bumwi ubwakali bwaSimoni, wamukumbila kuti buzwe kunkomwe bweende kaniini. Elyo wakakala, waiisya makamu makamu, walo wali kukede mubwaato. 4#Joh 21:6Naakamana kukambauka, wakati kuli-Simoni, Katuya akati kamulungu, munike nsabwe zyanu, mukajaye nswi. 5#Joh 21:3Simoni wakamuvuwa kuti, O mwami, twali kuzuba masiku oonse, tatujene cintu, nokubaboobo kujwi lyako ndiyoonika nsabwe. 6#Joh 21:6Nobakacita obo, bakajaya nswi zinjizinji, mane zyati kazapuke nsabwe zyabo, 7mpoonya bakoobola bazubinyina abakali mubwaato bumwi kuti bazoobagwasye. Bakaboola, bazuzya oonse maato obile, mane ati kabbile. 8Eno Simoni Petro naakabona boobo, wakavundama kumatende aa-Jesu wati, Kozwa kulindime nkaambo ndi mwaalumi mucitazibi, O mwami. 9Nkaambo wakaankamana walo, aboonse mbaakali abo, kunswi zinjizinji nzobakajaya, 10#Mt 13:47abalo mbubonya ba-Jakobo a-Johane, bana ba-Zebedayo, balongwe bakwe Simoni. Jesu wakamwaambila Simoni kuti, Utayoowi, kuzwa sunu unoozuba bantu, 11#Mt 19:27Nobakazubusya maato kunkomwe, bakasia zyoonse, bamucilila.

Mbwaakaponya sicinsenda

(Matayo 8:1-4; Marko 1:40-44)

12 # Mt 8:1-4; Mk 1:40-45 Naakali kumunzi umwi, muntu uwakali ecinsenda mubili woonse naakabona Jesu, wakavundama wamukumbilisya kuti, O mwami, na wayanda ulakonzya kundisalazya. 13Wakatambika ijanza lyakwe, wamujata wati, Ndayanda, usalale, Mpoonya awo cinsenda cakamana kulinguwe. 14#Lev 14:1-32; 13:49Elyo wakamulailila kuti, Utaambili muntu, Pele koya ukalibonye kumupaizi, ukapede kukusalazigwa kwako mbuli mulao wa-Musa, cibe citondezyo kulimbabo. 15Kwalo impuwo yakwe yakaindilila kukomena, makamu makamu aabantu akayoboloka kumuswiilila akuponyegwa kuzilwazi zyabo. 16#Mk 1:35Anukuti wakazwa walo, wainka musokwe kuyookomba.

Mbwaakaponya muntu uuyuminide mubili

(Matayo 9:1-8; Marko 2:1-12)

17 # Mt 9:1-8; Mk 2:1-12 Bumwi buzuba wakali kwiisya, eno bakalikede awo ba-Farisi abaiyi bamilao, abakazwa kuminzi yoonse yaku-Galilaya aku-Judaya aku-Jerusalemu, nkabela inguzu zya-Jehova wakali azyo kubaponya. 18Nkabela baalumi, abatembekede muntu abulo, uuyuminide mubili, bakayanda kumunjizya akumubika kubusyu bwakwe. 19Pele mbobatakajene mpobamunjizizya nkaambo kabantu banjibanji, bakatanta aciluli, bagwisya zidina, balengelezya bulo mbwaakalede uuyuminide mubili, bamuselusizya kumbele lya-Jesu. 20Walo naakabona lusyomo lwabo wakati, Mwaalumi, wajatilwa zibi zyako. 21#Lk 7:49; Is 43:25; Joh 5:12Mpoonya awo balembi aba-Farisi bakatalika kubuzyanya kuti, Ino oyu uuamba kusampaula nguni? Nguni uukonzya kujatila muntu zibi, tali Leza alike na? 22Anu Jesu wakali kuzi kweezezya kwabo, wabavuwa kuti, Muyeeyelanzi mumyoyo yanu? 23Icuuba ncicili, na kwaamba kuti, Wajatilwa zibi zyako, na kuti, Buka, uende? 24Pele kuti muzibe kuti Mwana a-Muntu uli enguzu ansi zyakujatila zibi, waambila uuyuminide mubili kuti, Ndakwaambila, Buka ubweze bulo bwako, uye kuŋanda yako. 25Ndilyonya wabuka kumbele lyabo, wabweza ncaakali kulede, wainka kuŋanda yakwe, ulalumba Leza, 26Baankamana boonse, balumba Leza, bayoowa kapati bati, Twabona malele sunu.

Levi mbwaakaitwa, mbwaakacitila Jesu ipobwe

(Matayo 9:9-17; Marko 2:14-22)

27 # Mt 9:9-13; Mk 2:13-17 Munsi lyakooko wakazwa, wabona simutelo uutegwa Levi, wamwaambila kuti, Ndicilila. 28Mpoonya wasia zyoonse, wanyamuka wamucilila.

29 # Lk 15:1 Nkabela Levi wakamucitila ipobwe muŋanda yakwe, kwakalimo basimutelo banjibanji abamwi mbobakakede abo mukulya. 30#Lk 15:1-2Balembi abaFarisi batongaukila basikwiiya bakwe kuti, Ino mulidanzi akunywa antoomwe abasimutelo abacitazibi? 31Jesu wakabavuwa kuti, Abapona tababuli musilisi, pele balwazi balo, 32Nsizide kwiita baluleme, pele bacitazibi, kuti basanduke.

33 # Mt 9:14-17; Mk 2:18-22 Bati kulinguwe, Nkaambonzi basikwiiya ba-Johane balaliimya kulya lyoonse, balakomba lyoonse, abalo baba-Farisi mbubonya, pele abako balalya, balanywa? 34Wabavuwa kuti, Sena mulakonzya kwiimya beenzinyina sikukwata kulya nacili abo? 35Kwalo alasika mazuba, awo sikukwata azwa kulimbabo, bayooliimya ayo mazuba. 36Elyo wakabaambila cikozyano kuti, Taakwe muntu uubbatika cibbati cipya kungubo nkulukulu, nkaambo icipya cilazapula cikulukulu, icibbati cipya taciswaangani ecisani cikulukulu. 37Alimwi taakwe muntu uutila waini mupya munkomo nkulukulu, nkaambo waini mupya ulakwamuna nkomo, walo waini ulatika, enkomo zilafwa. 38Pele waini mupya watilwa munkomo impya. 39Taakwe muntu uunga na wanywa waini mukulukulu mpoonya mpoonya ayande mupya, nkaambo wati, Mukulukulu ngomubotu.

Currently Selected:

Luka 5: Ibbaib63

Highlight

Copy