Luka 2
2
Kuzyalwa kwa-Jesu Kristo
1Nkabela mumazuba ayo kwakazwa mulao kuli-Kaisara Augusto kuti kulembwe cisi coonse. 2Oku kwakali kulembwa kwakusaanguna, elyo Kureniyo naakali mweendelezi waku-Suriya. 3Abantu boonse bakainka kuyoolembwa, umwi umwi kumunzi wakwe. 4Awalo Josefa wakazwa muGalilaya mumunzi wa-Nazareta, wainka ku-Judaya kumunzi wa-Davida uutegwa Betelehemu, nkaambo wakali weŋanda yamukowa wa-Davida, 5#Lk 1:27kuti akalembwe a-Mariya ngwaakasalide kuti babe banakwe, uwakali kumisi. 6Nobakacili nkuko, mazuba aakutumbuka kwakwe akasika. 7#Mt 1:25Wakatumbuka mwanaakwe mutaanzi, wamuzambaila masila, wamulazika mucilido caŋombe, nkaambo teekwakali busena muŋanda yabeenzu.
8Kwakali basikweembela kucisi eco, bakali musokwe, beembela butanga bwabo masiku. 9Elyo angelo wa-Jehova wakaima kulimbabo, bulemu bwaJehova bwakabamunikila, bakayoowa kapati. 10Angelo wakati kulimbabo, Mutayoowi, amulange, ndamuletela makani mabotu aacoolwe cipati iciti be kubantu boonse, 11nkaambo sunu mwazyalilwa Mufutuli mumunzi waDavida, ngu-Kristo Mwami. 12Eno nceeci citondezyo kulindinywe, muyoojana muvwanda uuzambaidwe masila, ulilede mucilido caŋombe, 13#Dan 7:10Ndilyonya kuli-angelo oyo kwakadunuka makamu makamu aazwa kujulu, balemya Leza bati,
14 #
Lk 19:38; Is 57:19; Ef 2:14,17 Akube bulemu kuli-Leza kujulu lyamajulu,
Aalo ansi akube luumuno kubantu mbakondwa.
15Nkabela baangelo nobakabasia kubweeda kujulu, basikweembela bakabuzyanya bati, Atugame ku-Betelehemu, tukabone nkani eyi mbwiibede, njaatuzibya angelo. 16Bakafwambaana basika, bajana Maliya a-Josefa, amuvwanda ulilede mucilido caŋombe. 17#Lk 2:10-12Babone buyo, baamba makani ngobakaambilwa aamwana. 18Boonse abakaamvwa bakagambwa kulaayo aakabaambila basikweembela. 19#Lk 2:51Pele Maliya wakaayobola makani aya oonse, waaezeezya mumoyo wakwe. 20Nkabela basikweembela bakabweeda, bali kuya bulemya akulumbaizya Leza kulaayo oonse ngobakamvwa angobakabona, mbubonya mbobakaambilwa.
Buniini bwa-Jesu, alwiimbo lwa-Simeoni
21 #
Lev 12:3; Lk 1:31,59 Naakainda mazuba aali musanu mwaatatu, cakaba ciindi cakumupalula, nkabela kwakategwa izina lyakwe ngu-Jesu, ilyakaambwa angelo, katanamitwa.
22 #
Lev 12:6-8
Naakamana mazuba aakulisalazya kwabo, mbuli mulao wa-Musa, bakamutola ku-Jerusalemu kuyoomupeda kuli-Jehova, 23#Kul 13:2,12,15(mbuli mbokwakalembwa mumulao wa-Jehova kuti: Woonse mwana mulombe mutaanzi uzootegwa muna-Jehova), 24#Lev 5:11; 12:8kuti batuule zituuzyo mbuli mbokwaambwa mumulao wa-Jehova, nkokuti inziba zyobile, neziba nkwilimba zyobile izicili ziniini. 25#Is 40:1; 49:13Elyo wakalimo mu-Jerusalemu mwaalumi uwali kutegwa Simeoni, wali muntu uululeme, uwali kusyoma Leza akulangila kutontozegwa kwa-Israyeli. Muuya Uusalala wakali kulinguwe. 26Oyo wakayubulwidwa Muuya Uusalala kuti takooyoobona lufu mane akabone Kristo wa-Jehova. 27Wakanjila muntempele, wali kusungilizigwa Muuya. Nkabela abazyali nobakamuleta mwana Jesu kuti bamucitile mbuli ciyanza camulao, 28mpoonya awo Simeoni wakamutambula mumaanza aakwe, walumba Leza, wateeti.
29 #
Matl 46:30
Osimalelaangu, muleke eno muzike wako,
Kuti ainke caluumuno, mbuli kwaamba kwako,
30 #
Is 40:5; 52:10 Nkaambo meso aangu abona lufutuko lwako
31Ndookalulamika kubusyu bwabantu boonse,
32 #
Is 42:6; 49:6; 52:10 Umumuni wakumunikila bamasi,
Abulemu bwacisi cako ca-Israyeli.
33Bakagambwa wisi abanyina kumakani aakaambwa aamwana. 34#Is 8:14; Mt 21:42; 1 Kor 1:23; 1 Pet 2:8Simeoni wakabalongezya, wati kuli-Mariya banyina, Langa, Oyu mwana wabikilwa kuwa akubuka kwabanjibanji ba-Israyeli, kuti abe citondezyo icikazigwa. 35Ii, iceba liyooyasa moyo wako omwini, nkokuti kuyubululwe kuyeeya kwamyoyo minjiminji. 36Alimwi kwakaliko Ana, musinsimi mukaintu, mwana a-Fanuele, wamukowa wa-Aseri. Walicembeede, kuzwida kubwanike bwakwe wakakala amwaalumi myaaka iili musanu mwiibili, 37#1 Tim 5:5nkabela wali mukamufu myaaka iili makumi aali musanu mwaatatu emyaaka yone. Taakali kuzwa muntempele, wakali kukomba isikati amasiku, kuliimya kulya akukumbila. 38#Is 52:9Wakasika nciconya eco ciindi, walumbaizya Leza, waamba aanguwe kulimbabo boonse abakali kulangila kunununwa kwaJerusalemu. 39#Mt 2:23Elyo nobakamana koonse mbuli mulao wa-Jehova, bakabweeda ku-Galilaya, kumunzi wabo waku-Nazareta.
40 #
Lk 1:80; 2:52 Wakakomena mwana, waba anguzu, walizywide busongo, aluzyalo lwa-Leza lwali kulinguwe.
Mulombe Jesu akati kabaiyi
41 #
Kul 12:1-27; 23:14-17; Dt 16:1-8 Abazyali bakwe bakali kwiinka ku-Jerusalemu imyaaka emyaaka, kuciindi capobwe lya-Pasika. 42Nkabela naakali emyaaka iili kumi mwiibili, bakainka mbuli ciyanza capobwe. 43#Kul 12:18Naakamana mazuba, kukuboola kwabo mwana Jesu wakasyaalila ku-Jerusalemu, abazyali bakwe tabali kuzi, 44pele mbobakayeeya kuti nkwali kulimbobeenda abo, beenda musinzo wabuzuba bomwe, nkabela bamulangaula mukati kabasazinyina abeenzinyina. 45Mbobatakamujana bakapiluka ku-Jerusalemu, baya bumulangaula. 46Munsi lyamazuba otatwe bakamujana muntempele, ulikede akati kabaiyi, ulabaswiilila akubabuzya, 47boonse abakamuswiilila bakayoowa kukuziba kwakwe akukuvuwa kwakwe. 48Elyo nobakamubona bakaankamana, banyina bamubuzya kuti, Mwanaangu, nkaambonzi ino ncootucitila obuya? Bona, uso amebo twali kukulangaula akukatazigwa. 49#Joh 2:16Wakati kulimbabo, Ino kai mundiyandawidanzi? Sena tamuzi kuti ndileelede kuba muŋanda yaTaata? 50Anu tabakamvwide kabotu nkani njaakabaambila. 51#Lk 2:19Nkabela wakeenda abo, waboola ku-Nazareta, wababombela. Pele banyina bakaayobola oonse makani aya mumoyo wabo.
52 #
1 Sam 2:26; Tus 3:4 Eno Jesu wakakomena mubusongo aciimo, amukukonda Leza abantu.
Currently Selected:
Luka 2: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
