Jobu 38
38
Leza, akaambo kamilimo yakwe iigambya, ulatondezya Jobu buniini akutaziba kwakwe
1 #
Kul 19:16,18; 1 Bam 19:11; 2 Bam 2:1; Ezk 1:4 Lino Jehova wakavuwa Jobu kuzwa kuguwo wati,
2Ngwani oyu uuomfokezya kukanza kwangu
Amajwi aatayeeyegwi?
3 #
1 Bam 18:46
Unduumuzye mbuli muntu,
Uvuwe mibuzyo yangu.
4 #
Int 104:5
Nendakaimika nyika wakali kuli yebo?
Undivuwe kuti kozi.
5Ngwani wakeeleka migaano yayo, ulizi sa?
Ngwani wakoololola lukole kulinjiyo?
6Zisiko zyanyika zikala alinzi?
Ngwani wakabika bbwe lyacooko,
7 #
Job 1:6
Nizyakaimba nyenyeezi zyabucedo,
Abaangelo nebakoompolola mukusekelela kwabo?
8 #
Jer 5:22; Matl 1:9; Int 33:7; Tus 8:29 Ngwani wakajalila lwizi
Nolwakatuluka kuzwa kuda lyamatalikilo,
9Nendakaluvumba asikunku
Akuluvunga mumayoba aasia mbi,
10Nendakalwiimikila migaano,
Akulupingila,
11Kanamba kuti, Mpaawa mpoyoosika akutainda;
Mayuwe aako aalisumpula ayooima awa?
12Sena mbowakazyalwa wakabusya buzuba,
Na kulaya bucedo
13Kuti bujate nyika azyooko,
Akusansamuna babi kuzwa kulinjiyo?
14Elyo inyika ilalibonya mbuli bulongo busimbwa;
Ilijisi mibala-mibala mbuli cisani.
15Anu bantu babi balanyangwa ziindi zyabo zyamudima,
Maboko aabo aasumpukide alatyolwa,
16Sena wakajana tusensa twalwizi?
Sa wakalyata mububbile bwalwizi?
17Wakatondezegwa sa milyango yalufu?
Balindizi bayo bakayoowa kunembo lyako na?
18Wamvwisisisya bwanza bwanyika mbobubede sena?
Buli biyeni? Kondaambila kuti kokonzya.
19Ninzilanzi iiya nkuukala mumuni,
Amudima ukala kuli,
20Kuti ukakonzye kwiitola kumulimowayo
Akwiileta alimwi nkwiikala?
21Ulizi yebo nkaambo nduwe wakalizyedwe kale!
Ndonduwe uujisi myaka iitabaliki!
22Wakanjila muziyobwedo zyacaanda?
Wakabona sena zilongelelo zyacivulamabwe,
23 #
Kul 9:18; Jos 10:11; Int 9:13; Is 30:30 Eco ncindiyobweda mazuba aaguwo
Kuti ncibelesye kuumya akulwanya?
24Amyuuwo nkwiikala nkuli?
Muuwo wakujwe umwayigwa buti anyika?
25Nguni wakabamba ziwido zyamvula yamusinku,
Akucita nzila yalulabo,
26Kuti iwe munyika iitakalwi muntu,
Amunkanda mutakwe bantu,
27 #
Int 107:35
Kuti ikakondye zyuundu,
Ikasamike nyika njumu amwemvwe?
28 #
1 Sam 12:17,18; Int 147:8; Job 5:9,10 Imvula ilijisi wisi sa?
Wisi wamume nguni?
29 #
Job 6:16; Int 147:16 Azwa mwidanzi mankaakamba?
Nguni wakazyala caanda
30Maanzi naandwa mbuli bbwe,
Amankaakamba naasisa bubbile buli kunsi?
31 #
Job 9:9; Am 5:8 Inga ulakonzya kusunga Bulilima mucisankata,
Atene kusungulula zyaanzyo zya-Bana-mweenda-mulongo sa?
32Sa ulakonzya kusolweda Ntanda muciindi cayo,
Na kweenzya nyenyeezi zya-Mulalabungu?
33 #
Matl 1:10; Jer 31:35; Int 119:90,91 Sa ulizi milao yamajulu?
Ulakonzya sa kwiimika inguzu zyayo munyika?
34Ulakonzya kulailila mayoba
Kuti akutumine maanzi manji sa?
35Sa ulakonzya kutuma lulabo kumulimo walo?
Sena lulakuvuwa kuti, Mpendi?
36 #
Job 32:8; Int 51:6; Muk 2:26 Nguni wakaaiisya mayoba,
Nguni wakapa luzibo kululabo?
37Nguni uujisi nguzu zyakubungika mayoba,
Na kutingamika nongo zyakujulu,
38Mavu naayumide,
Amavwinga naajatene?
39Inga ulavwimina syuumbwa muzyazi,
Akusanina bana bakwe bafwa nzala,
40Nobalede mumena aabo,
Nobalindide muziyubilo zyabo?
41 #
Int 147:9; Mt 6:26; Lk 12:24 Nguni uujanina cikwangala cakulalila,
Bana bakwe nobalila kuli-Leza cakulya?
Currently Selected:
Jobu 38: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
