Johane 9

Jesu mbwaakabonya moofu

1 # Inc 3:2; 14:8 Naakali kuya bweenda, wakabona muntu uwali moofu kuzwa kukuzyalwa kwakwe. 2#Lk 13:2; Kul 20:5Nkabela basikwiiya bakwe bakamubuzya kuti, Rabi, ino nguni uwakacita cibi, sena nguwenya muntu oyu, na mbamuzyala, ncaakazyalwa aboofu? 3#Joh 11:4Jesu wakavuwa kuti, Tali oyu muntu uwakacita cibi nobaba abamuzyala, pele nkuti milimo ya-Leza iyubululwe mulinguwe. 4#Joh 5:17,20; 11:9Tulyeelede kubeleka milimo yayooyo uwakandituma, nelicili isikati, masiku alasika, nokutakwe muntu uukonzya kubeleka, 5#Mt 5:14; Joh 8:12; 12:35Nencili munyika ndi mumuni wanyika. 6#Mk 8:23Naakamana kwaamba obo, wakaswida mate ansi, wakakanda bulongo amate aakwe, wakamunanika meso abulongo obo, 7wakamwaambila kuti, Koya, ukasambe mukaziba ka-Siloamu (akategwa kukupandululwa, Kutumigwa). Mpoonya wakainka waakusamba, wakaboola ulabona. 8Nkaambo kaako banamuzyaabo abalo abakamubwene ciindi kuti wali mukumbizi bakati, Sena engwe oyu uwali kukala akukumbila. 9Bamwi bakati, Ngonguwe, bamwi bakati, Pe, umukozya buyo. Walo wakaamba kuti, Ndime. 10Mpoonya bakamubuzya bakati, Ino meso aako akajuka buti? 11Wakavuwa kuti, Mwaalumi oyo uutegwa Jesu wakakanda bulongo, wakananika meso aangu, wakandyaambila kuti, Koya ku-Siloamu, ukasambe, nkabela ndakainka, ndaakusamba, ndakakonzya kubona, 12Bamwaambila kuti, Uli kuli? Wakati, Cita.

13Bakamuleta kuba-Farisi muntu oyo uwakali moofu ciindi, 14#Joh 5:9Eno bwakali buzuba bwa-Sabata Jesu mbwaakakanda bulongo, akumujula meso aakwe, 15Aboobo ba-Farisi abalo bakamubuzya alimwi kuti, Wakakubonya buti? Wakabaambila kuti, Wakabika bulongo kumeso aangu, ndakasamba, eno ndabona. 16#Joh 3:2; 7:43; 9:31,33Bamwi baba-Farisi bakati, Muntu oyu tazwi kuli-Leza, nkaambo tabambi buzuba bwa-Sabata. Pele bamwi bakati, Iniinga muntu mucitazibi ulakonzya buti kucita malele aali bobuya? Kwakaba kwaanzaana akati kabo. 17#Joh 4:19Bakamubuzya moofu alimwi kuti, Ino yebo, umwaamba buti, mbwaakakujula meso aako? Wakati, Musinsimi we. 18Nkaambo kaako ba-Juda tabakamusyomede kuti ngowakali moofu, akuti wakakonzya kubona, mane nebakaakwiita abakamuzyala oyo uwakajulwa meso, 19akubabuzya kuti, Sena oyu mwaneenu, ngomwaamba kuti wakazyalwa moofu? Ino kai wabona buti sunu? 20Abo abakamuzyala bakavuwa bakati, Tulizi kuti ngomwaneesu, akwalo kuti wakazyalwa moofu. 21Pele tatuzi mbwaabona eno, akuti nguni uwakajula meso aakwe. Amumubuzye, wakomena kale, ulalyaambilila mwini. 22#Joh 7:13; 12:42; 16:2Nzeezi nzobakaamba abakamuzyala, nkaambo bakali kuyoowa ba-Juda nkaambo ba-Juda bakazuminana kale kuti uuti mwaambe kuti ngu-Kristo, ulatandwa mucikombelo. 23Ncobakaamba obo abakamuzyala kuti, Wakomena kale, amumubuzye. 24#Jos 7:19Elyo bakamwiita alwabili muntu uwakali moofu, bakamwaambila kuti, Kolumba Leza, tulimuzi oyu muntu kuti mucitazibi. 25Walo wakavuwa kuti, Na mucitazibi nsizi, pele ncintu comwe ncenzi, kuti ndakali moofu, eno ndabona. 26Bakamwaambila bakati, Wakakucita buti? Wakajula buti meso aako? 27Wakabavuwa kuti, Ndazwa akumwaambila eno, pele tamumvwide, Nkaambonzi ncomuyanda kumvwa alimwi? Sena anywebo muyanda kuba basikwiiya bakwe? 28Bakamutukana bakati, Nduwe sikwiiya wakwe, pele swebo tuli basikwiiya ba-Musa. 29Tulizi kuti Leza wakaamba kuli-Musa, pele Oyu muntu, tatumuzi nkwazwa. 30Mwaalumi wakabavuwa wakati, Eno nceeci iciyoosya, mbomutezi nkwazwa, nokubaboobo wakandijula meso aangu. 31#Is 1:15; Tus 15:29; Inc 10:35Tulizi kuti Leza tamvwi bacitazibi, pele muntu woonse uukomba Leza, akucita mbwayanda, ngonguwe ngwamvwa, 32Kuzwa kumatalikilo aanyika takunamvwidwe umwi wakajulide meso aamuntu uwakazyalwa moofu. 33#Joh 9:16Oyo muntu naatali kuzwa kuli-Leza, naatakonzya kucita cintu, 34#Joh 9:2; Int 51:5Bakamuvuwa bakati, Wakazyalwa muzibi yebo, sena nduwe ooti twiisye? Mpoonya bakamutanda. 35Jesu wakamvwa kuti bamutanda, nkabela naakamujana wakati, Sena wamusyoma Mwana a-Leza? 36Wakavuwa kuti, Ino nguni, O mwami, kuti musyome? 37#Joh 4:26; 10:25Jesu wakamwaambila kuti, Ulimubwene, alimwi ngonguwe ngoambaula awalo. 38Wakati, O mwami, ndasyoma, Mpoonya wakamufugamina. 39#Mt 13:11-15Jesu wakati, Nkaambo kakubeteka ncendazida munyika eyi, kuti abo abataboni babone, akuti abo ababona babe boofu. 40#Mt 15:14; 23:26Abo babaFarisi abakali awalo bakamvwa majwi aya, bakamwaambila kuti, Sena aswebo tuli boofu? 41#Tus 26:12Jesu wakabaambila wakati, Kuti nomwali boofu nomutajisi cibi, pele eno mwaamba kuti, Tulabona, Cibi canu mpocicili.

Currently Selected:

Johane 9: Ibbaib63

Highlight

Copy