Jeremiya 30
30
Ba-Israyeli mbubayooboozezegwa coolwe mumazuba aaciza
1Ngaaya makani aakasika kuli-Jeremiya kuzwa kuli-Jehova. 2#Is 30:8Mbuboobu mbwaamba Jehova Leza wa-Israyeli. Lemba mubbuku majwi oonse ngendakamwaambila. 3#Dt 30:3; Am 9:14; Jer 27:22; 29:14; 31:23; 16:15Nkaambo mumazuba aaboola, mbwaamba Jehova, njooboozezya bantu bangu ba-Israyeli aba-Juda coolwe, mbwaamba Jehova, nkabela njoobapilusya kunyika eyo njindakapa bamawisaabo, kuti baivube.
4Ngaaya makani Jehova ngaamba aa-Israyeli a-Juda. 5Mbuboobu mbwaamba Jehova. Tulimvwide ijwi lyalulubuluko alyakuyoowa. Tatumvwi luumuno pe. 6Amubuzye, mubone na mwaalumi ulakonzya kutumbuka. Nkaambonzi ndabona baalumi boonse baliimvwi umwi aumwi amaanza aakwe acikungu mbuli mwanakazi uuyanda kutumbuka? Nkaambonzi masyu oonse aabantu ausana? 7#Is 23:4,5; Joel 2:11; Am 5:18; Zef 1:14; 1 Tes 4:16; Dan 12:1Maawe! Obo buzuba mbupati. Taakwe bweelene abo. Nceciindi Jakobo naalemenwa mapenzi, nekubaboobo uyoofutulwa kuzwa kulimbubo. 8Lino mubuzuba obo, mbwaamba Jehova wamakamu, njootyola ijoko lyakwe lili ansingo yako akudunsula zyaanzyo zyako. Bazwakule tabakooyoobanjizya limbi mubuzike, 9#Is 55:3,4; Hos 3:5; Lk 1:69; Inc 2:30pele bayoobelekela Jehova Leza wabo milimo, a-Davida mwami wabo ngunjoobabusizya.
10 #
Jer 46:27-28
Lino utayoowi, O Jakobo mulanda wangu, mbwaamba Jehova. Utakankami, O Israyeli, nkaambo ncobeni njookufutula kuzwa kule, alunyungu lwako njoolufutula munyika yabuzike bwalo. Lino Jakobo uyoopiluka, uyookala aluumuno, nkabela takukooyooba naba omwe uumukataazya. 11Nkaambo mebo ndi anywe, mbwaamba Jehova, njookuvuna, Misyobo yoonse njindakamumwaya akati kayo, njooimaninizya, pele nywebo nsikooyoomumaninizya pe. Njookuuma muciyanza ceelede buyo, nsikooyookuleka buyo.
12 #
2 Mak 36:16; Jer 15:18 Nkaambo mbuboobu mbwaamba Jehova. Zilonda zyako tazisilikiki, amubunda wako ulakataazya. 13Taakwe uubeteka kabotu makani aako. Taakwe musamu wakusilisya zilonda zyako. Taakwe uukuponya. 14#Malo 1:2; Jer 5:6; Job 13:24; 30:21Boonse basikukuyanda bakuluba, tabakuyandauli limbi. Nkaambo ndakuumya luumo lwasinkondonyoko, ndakukoma alukomo lwayooyo uubula buuya, nkaambo kamilandu yako minji azibi zyako ziyoosya. 15Ino nkaambonzi nolila nkaambo kamubunda wako? Sa kuciswa kwako takusilikiki? Milandu yako yavula, zibi zyako zilayoosya, aboobo ndakucitila zintu ezi. 16#Kul 23:22; Is 41:11Pele lino boonse bakumaninizya bayoomaninizigwa, abasinkondonyoko boonse buyo banooya mubuzike. Abo bakusaala bayoosaalwa, abaabo bakunyanzya bayoonyanzigwa. 17#Kul 15:26; Is 30:26; Hos 6:2; Mal 4:2; 1 Pet 2:24Nkaambo njoocita kuti upone alimwi, amibunda yako njooisilika, mbwaamba Jehova, nkaambo bakakwaamba kuti nduwe mutande, Zioni uutayandwa kumuntu naba omwe.
18 #
Int 102:13
Mbuboobu mbwaamba Jehova, Ncobeni njoolobya buzike bwazilao zya-Jakobo, azikalilo zyakwe njoozifwida luzyalo, nkabela munzi uyooyakululwa azitantala zyawo, aŋanda yabwami iyooba mbubonya mbuyakabede. 19#Ezr 3:10,11; Neh 8:12; Is 35:10; Zek 10:8Kuzwa nkukonya kuyoomvwigwa intembauzyo, amajwi aabaabo basekelela. Njoobavuzya; tabakooyooceya pe. Njoobalemya; tabakooyoosampaulwa pe. 20#Is 1:26Bana babo bayooba mbubonya mbubakabede kalekale. Imbungano yabo iyoobambwa kabotu kumeso aangu, aboonse babakataazya njoobapa mulandu. 21#Matl 49:10; My 16:5Mwami wabo uyooba umwi wabasimukowanyina, ayooyo uubeendelezya uyoozwa kulimbabo beni. Njoomuswenya kufwaafwi kulindime, nkaambo taakwe uukonzya kuswena kufwaafwi kulindime mwini, mbwaamba Jehova. 22Muyooba bantu bangu, ambebo njooba Leza wanu.
23 #
Jer 25:32
Amubone iguwo lya-Jehova! Kwabuka bukali! Ndiguwo lilundumuna! Liyoowida amitwe yabasizibi. 24Bukali buyoosya bwa-Jehova tabukooyooleka mane akacite mbwayanda akuzuzikizya miyeeyo yamoyo wakwe. Kumamanino aaciindi muyoomvwisya aya makani.
Currently Selected:
Jeremiya 30: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
