Jeremiya 29
29
Lugwalo lwa-Jeremiya ndwaakalembela ba-Juda baku-Babuloni
1 #
2 Bam 24:12-16; 2 Mak 36:10 Ngaaya majwi aalugwalo Jeremiya musinsimi ndwaakatuma kuzwa ku-Jerusalemu kubapati bamwi babaabo ibakatoledwe mubuzike, akubapaizi, akubasinsimi, akubantu boonse Nebukadinezara mbaakatola mubuzike ku-Babuloni kuzwa ku-Jerusalemu, 2nkukuti nibakamana kulonzegwa kuzwa ku-Jerusalemu mwami Jekoniya abanyina mwami abasiŋanda abapati bacisi ca-Juda aba-Jerusalemu abafuzi abasimilimo. 3Lugwalo lwakatumwa kumaanza aa-Eleasa mwana wa-Safani a-Gemariya mwana wa-Hilikiya, mbombabo Zedekiya mwami wa-Juda mbaakatuma ku-Babuloni kuli-Nebukadinezara mwami wa-Babuloni. Lwakati, 4Mbuboobu Jehova wamakamu Leza wa-Israyeli mbwaambila boonse batandidwe mbendakalonzya kuzwa ku-Jerusalemu kuya mubuzike ku-Babuloni. 5Amuyake maanda, mukale mulingao. Amulime myuunda, mulye micelo yayo. 6Amukwate banakazi, muzyale bana balombe abasimbi, Amukwatye bana banu balombe banakazi, abalo bana banu basimbi ubape kuti bakwatwe baalumi, bazyale bana balombe abasimbi, kuti mukavule nkuko akutaceya. 7#Dan 6:4; Rom 13:1,5; 1 Tim 2:1,2Amubike myoyo yanu kukuleta coolwe kumunzi oyo nkundamulonzezya. Amukombele nguwo kuli-Jehova, nkaambo coolwe cawo ncecoolwe canu. 8#Jer 14:14; 23:21; Ef 5:6Nkaambo mbuboobu mbwaamba Jehova wamakamu Leza wa-Israyeli. Batamweeni basinsimi banu abasondi banu bakede akati kanu. Mutaswiilili ziloto zyabo nzibalota, 9nkaambo makani ngebamusinsimina muzina lyangu ngaakubeja buyo. Teensi ndime ndakabatuma pe, mbwaamba Jehova.
10 #
2 Mak 36:21; Jer 25:11; Dan 9:2 Nkaambo mbuboobu mbwaamba Jehova, Myaka iili makumi aali musanu aabili niizoomana ku-Babuloni, njoomuswaya, njoozuzikizya cisyomezyo cangu cakumupilusya kubusena obuno. 11Nkaambo ndizi miyeeyo yangu njinjeeya aandinywe, mbwaamba Jehova. Njemiyeeyo yakuleta coolwe, teensi miyeeyo yamapenzi pe. Njanda kumupa bubotu mbumukonzya kulangila kumamanino. 12#Dan 9:3Lino muyoondiita, muyoosika kundikomba, nkabela njoomuswiilila. 13#Lev 26:39,40; Int 32:6; Mt 7:7; Jer 24:7; Dt 4:29Muyoondiyandaula nkabela muyoondijana, nkokuti na mwandiyandaula camoyo woonse. 14#Dt 4:7; Int 32:6; Is 55:6; Rom 10:20; Jer 23:3,8; 30:3Njoojanwa ndinywe, mbwaamba Jebova, nkabela njoolobya buzike bwanu akumuyobolola kuzwa kuzisi zyoonse akumasena oonse nkundakamutandilide, mbwaamba Jehova. Njoomuboozya kubusena obo mbubonya nkundakamugwisya nindakamutandila mubuzike.
15Mulaamba kuti, Jehova watubusizya basinsimi ku-Babuloni. 16Pele mbuboobu Jehova mbwaamba aamwami uukede acuuno cabwami bwa-Davida, abantu boonse bakede mumunzi uno, nkokuti banabakwanu ibatakainka anywebo kuya mubuzike. 17#Jer 24:8-10Mbuboobu mbwaamba Jehova wamakamu. Ncobeni njoobatumina ipanga anzala amalwazi, nkabela njoocita kuti babe mbuli inkuyu imbi zitakonzyi kuligwa nkaambo kabubi bwazyo. 18#Dt 29:21-28; 1 Bam 9:7,8; Malo 2:15,16; Jer 15:4; 24:9Njoobatandya ipanga anzala amalwazi, nkabela njoocita kuti babe ciyoosyo kuzisi zyoonse zyaansi, lutuko alugambyo acisabulo acisampaulo akati kamisyobo yoonse nkundakabatandilide, 19#Jer 25:4; 32:33nkaambo kakuti tabana kuswiilila majwi aangu, mbwaamba Jehova, ngendabatumina kumilome yabalanda bangu basinsimi. Ndakasungwaala kubatuma, nekubaboobo teemwakaswiilila, mbwaamba Jehova. 20#Am 3:6; Mik 4:10Lino amuswiilile ijwi lya-Jehova, nyoonse mbendakatanda kuzwa ku-Jerusalemu kuya mubuzike ku-Babuloni. 21#2 Pet 2:1Mbuboobu Jehova wamakamu Leza wa-Israyeli mbwaamba aa-Ahabu mwana wa-Kolaya a-Zedekiya mwana wa-Maaseya, bamusinsimina zyakubeja muzina lyangu. Ncobeni njoobaaba mumaanza aa-Nebukadinezara mwami wa-Babuloni, nkabela uyoobajaya mumeso aanu. 22#Matl 48:20; Is 65:15; Dan 3:6Lino ba-Juda boonse bali mubuzike bwaku-Babuloni bayoobelesya mazina aabo mukutukila, balaamba kuti, Jehova acite kuti ube mbubonya mbuli Zedekiya a-Ahabu, mwami wa-Babuloni mbaakayoka mumulilo. 23#Zef 3:4; Tus 5:21; Jer 13:27; 16:17; Mal 3:5; Heb 4:13Nkaambo bacita bufubafuba mucisi ca-Israyeli, bacita bumambe abanakazi babeenzinyina, alimwi baamba muzina lyangu majwi aakubeja ngendatakabalailila. Ndime uuzi makani, ndime kamboni, mbwaamba Jehova.
24Alakwe Semaya waku-Nehelami, uleelede kumwaambila kuti, 25#2 Bam 25:18; Jer 21:1Mbuboobu mbwaamba Jehova wamakamu Leza wa-Israyeli. Ndimvwide majwi aamagwalo ngewakatuma muzina lyako kubantu boonse bali mu-Jerusalemu akuli-Zefaniya mwana wa-Maaseya mupaizi akubapaizi boonse aakuti, 26#Jer 20:1; Inc 4:1; Dt 13:1-5; 2 Bam 9:11; Zek 13:3-6; 2 Mak 16:10; Jer 20:2; Inc 16:24Jehova wakubika kuti ube mupaizi mucibaka ca-Jehoyada mupaizi, ube silutwe waŋanda ya-Jehova, ukajate kufumbwa musondosi uusinsimasinsima, umubike mukaliba akumwaanzya insimbi. 27#My 16:3; Inc 4:17Lino nkaambonzi tona kutapatila Jeremiya waku-Anatotu uumusinsimina? 28Nkaambo watutumina lugwalo okuno ku-Babuloni lwakuti, Buzike bwanu tabukooyoofwambaana kumana. Amuyake maanda, mukale mulingao. Amulime myuunda, mulye micelo yayo.
29Zefaniya mupaizi wakabala lugwalo olu mumatwi aa-Jeremiya musinsimi. 30Mpawo ijwi lya-Jehova lyakasika kuli-Jeremiya, liti, 31#Jer 28:15Tumina boonse bali mubuzike ijwi lyakuti, Mbuboobu Jehova mbwaamba aaSemaya waku-Nehelami. Semaya wamusinsimina, anukuti teensi ndime ndakamutuma. Wamusyomya zyakubeja. 32#Kul 20:5; Rom 2:8; Jer 28:16Nkaambo kako mbuboobu mbwaamba Jehova. Njoouma Semaya waku-Nehelami alunyungu lwakwe. Takukooyoomusyaalila muntu naba omwe uukala akati kabantu aba uuyoobona coolwe ncenjooletela bantu bangu, mbwaamba Jehova, nkaambo waamba majwi aakupapila Jehova.
Currently Selected:
Jeremiya 29: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
