Jeremiya 18
18
Cikozyano camubumbi abulongo
1Ngaaya makani aakasika kuli-Jeremiya kuzwa kuli-Jehova. Wakati, 2Buka, ukaseluke kuŋanda yamubumbi, lino njookuswiilizya majwi aangu nkukonya oko. 3Mpawo ndakaseluka kuŋanda yamubumbi, nkabela ndakabona kuti ulabeleka milimo kumuncini wakwe. 4#Rom 11:15Lino cilongo ncaakali kubumbya bulongo cakabija mujanza lyamubumbi, aboobo wakacibumbulula akucita cimbi icakalulama mumeso aamubumbi.
5Elyo ijwi lya-Jehova lyakandisikila liti, 6#Is 45:9; 64:8Sa nsikonzyi kumucitila anywebo mbubonya mbuli oyu mubumbi mbwacita, O luzubo lwa-Israyeli? mbwaamba Jehova. Amubone! Mbubonya mbuli bulongo mbubuli mumaanza aamubumbi, anywebo muli mumaanza aangu, O luzubo lwa-Israyeli. 7#Jer 1:10Kufumbwa ciindi nindaamba aamusyobo na aacisi cakukanza kucinonkola akucimwaya akucinyonyoona, 8#Bab 10:15,16; 2 Mak 12:6,7; Is 1:16-19; Ezk 18:21; Lk 13:3-5; Joh 3:10pele cisi eco ncindaamba cilaleka bubi bwaco, lino ambebo ndakonzya kuleka mapenzi ngendakali kukanza kucicitila. 9Alimwi kufumbwa ciindi nindaamba aamusyobo na aacisi kuti njoociyaka akucisimpika, 10pele cilatalika kubisya mumeso aangu akuleka kuswiilila ijwi lyangu, lino njooleka bubotu boonse mbundakali kukanza kucicitila. 11#2 Bam 17:13; Is 1:16-19Lino ambila bantu ba-Juda abaabo bakede mu-Jerusalemu kuti, Mbuboobu mbwaamba Jehova. Ncobeni ndili mukukanza kumubisizya, ndili mukuyeeya miyeeyo yakumupenzya. Amupiluke, muleke umwi aumwi bubi bwanzila yakwe. Amubotye inzila zyanu amilimo yanu.
12Pele balaamba kuti, Nee! Tunoocitobela miyeeyo yesu, tunoocicita umwi aumwi makanze aazinguni zyamoyo wakwe mubi. 13#Jer 2:10; 1 Kor 5:1Nkaambo kako mbuboobu mbwaamba Jehova. Amubuzye akati kabamasi, Nguni uumvwide makani aali boobu? Mwana musimbi wa-Israyeli wacita cintu ciyoosya loko. 14Sa caanda caku-Lebano cilamana kumandomba aakuSirioni? Sa maanzi aatontola aatulonga tukunkisya muzilundu alayuminina? 15#Jer 2:13; 10:15; 6:16; Dt 32:21; Is 53:6Nkaambo bantu bangu bandiluba, azintu zyabuyo balazitentela tununkilizyo, Nzenzizyo zyabaleesya mukweenda kwabo. Migwagwa yakalekale baisia, baleenda mutusosonzila, munzila zitatuntumikidwe. 16#Jer 49:13; Dt 29:24; 1 Bam 9:8; Malo 2:15; Mik 6:16Mbuboobo nyika yabo mbuyaba ciyoosya acisabulo mazuba oonse, Kufumbwa muntu uuinda kulinjiyo ulagamba, ulazunzya mutwe wakwe. 17#Jer 13:24; Int 48:7Njoobabeda mbuli luuwo lwakujwe, njoobamwaisya kubusyu bwabasinkondonyina. Mubuzuba bwamapenzi aabo njoobapa sule, nsikooyoobapa busyu pe.
Bantu mbubakavwiya Jeremiya
18 #
Jer 11:19; Inc 7:51; 2 Tim 4:3; Lev 10:11; Mal 2:7 Lino bakaamba kuti, Amuboole, tukavwiye Jeremiya. Bapaizi tababuli lulayo, basongo taba buli maanu, abasinsimi tababuli majwi, Amuboole, tumukantamike. Tutayoowi majwi aakwe abuniini.
19O Jehova, bika moyo kulindime; swiilila majwi aabaabo bakazyanya ambe. 20#Int 109:4; 35:7Sa bubi mbobulumbu bweelede oyo uucita kabotu? Nkaambonzi baliside mulindi wakunditeya? Ibaluka mbundakali kwiima kubusyu bwako kukubakumbilila zintu zibotu akubalesezya bukali bwako. 21Ma! Bana babo ubaabile cimpayuma, akubapa munguzu zyapanga. Banakazi babo bafwidwe bana babo abalumi babo. Malwazi ajaye baalumi babo, abasankwa babo bajazigwe ipanga munkondo. 22Kumvwigwe ijwi lyakulila mumaanda aabo noongomoka kubaletela impi yakubasaala! Nkaambo baliside mulindi wakundijata, balisiside tukole twakundica kumaulu. 23#Neh 4:5Pele webo, O Jehova, ulizi mbubandivwiya kuti bandijaye. Utabalekeleli milandu yabo, azyalo zibi zyabo zitasansamunwi kumeso aako. Balebesegwe kubusyu bwako, kobacitila mbubeelede kuciindi cabukali bwako.
Currently Selected:
Jeremiya 18: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
