Jeremiya 17
17
Zibi zyaba-Juda tazisansamuniki
1 #
Job 19:24; Tus 3:3; 2 Kor 3:3 Zibi zya-Juda zililembedwe acilembyo cabutale, zililembedwe abbweluume, zileengedwe acilembelo camumyoyo yabo, ameja aacipaililo, 2#2 Bam 16:4; 2 Mak 24:18; Is 1:29bana babo nibaciyeeya zipaililo zyabo azikozyano zyabo zya-Asera kumbali lyazisamu zyoonse zitete aatala lyazilundu zyoonse zilamfu, 3#Jer 15:13amutulundulundu twamusokwe, Imbono zyako azintu zyako ziyandisi, zyoonse ndazipa kuti zibe zisaalo, azyalo zipaililo zyako zyakumalundu, nkaambo kazibi nzocitide moonse munyika yako, 4#Jer 16:13Lino uyooleka lukono lwako ndundakakupa, nkabela njoocita kuti ubelekele basinkondonyoko milimo munyika njotezi, nkaambo mubukali bwangu mwadukuwa mulilo uuyoopya lyoonse cakutazima.
Leza alike, uubwene zintu zyoonse, nguuelede kusyomwa
5 #
Is 30:1
Mbuboobu mbwaamba Jehova. Uli alutuko muntu umwi aumwi uusyoma muntu uulya maila, uubika moyo wakwe kukuboko kwanyama yabuntu, uulesya moyo wakwe kuzwa kuli-Jehova. 6#Job 20:17Uli mbuli kasamu kamunkanda, takooyoobona cintu niciba cimwi cibotu cimusikila. Ulakala mumasena aayuminide aamunkanda, munyika yamunyo iitakalwi bantu. 7#Int 2:12; Tus 16:20Uli acoolwe muntu uusyoma Jehova, uujisi Jehova mbuli mutabilizi wakwe. 8#Int 1:3Uyooba mbuli musamu uubyalidwe kumbali lyamaanzi, uutunga miyanda yawo kukalonga, uutayoowa inkasaaloniisika, Maatu aawo alasia lyoonse, amumwaka wacimpayuma taakwe cuukataazya, tuuleki kuzyala micelo.
9 #
Matl 6:5
Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede. 10#1 Sam 16:7; 1 Mak 28:9; Int 7:9; 139:23; 62:12; Jer 11:20; 20:12; 32:19; Tus 17:3; Rom 8:27; 2:6; Ciy 2:23Mebo nde-Jehova ndilalingula moyo, ndilasunka-sunka insa, kuti mbweedezye muntu bulumbu bweelede inzila zyakwe, bweelede micelo yamilimo yakwe.
11 #
Lk 12:20
Mbuli kwale uukumba mai ngaatakazyala, mbubonya obo mbwabede muntu uulundika buvubi muziyanza zitaluleme. Uyoobusia naacili akatikati kabuumi bwakwe, aboobo kumamanino uyooba mufubafuba buyo.
12Busena bwacikombelo cesu ncuuno cabulemu icakasumpulwa kuzwa kumatalikilo. 13#Int 73:27; Jer 2:26; Is 1:28; 65:13; Ezk 16:63; 36:32; Dan 12:2; Lk 10:20O Jehova, bulangizi bwamusyobo wa-Israyeli, boonse bakutakata bayoofwa bweeme, Boonse baleya kuzwa kulinduwe bayoolembwa munyika, nkaambo Jehova ngubalekede nkekasensa kamaanzi aabuumi.
14Kondiponya, O Jehova, mpone. Kondifutula, mfutulwe, nkaambo nduwe nguntembaula. 15#Is 5:19; Ezk 12:22; Am 5:18; 2 Pet 3:4Bona! Balandaambila kuti, Lili kuli ijwi lya-Jehova? Atuliswiilile. 16Pele mebo nsina kukufwanzya kubatumina mapenzi, nsina kuyandisya kubona buzuba bwamafwabi aabo. Ulizi obo. Kufumbwa cakazwa mumilomo yangu cakalulama kumeso aako. 17Utandibedi ciyoosyo. Nduwe macijilo aangu mubuzuba bwamapenzi. 18Basikundipenzya bausigwe insoni, pele mebo ntausigwi insoni pe! Bayoosegwe balo, pele mebo ne! Kobaletela buzuba bwamapenzi akubanyonyoona lunyonyooko kobile.
Bantu mbubakacenjezegwa kulemeka buzuba bwa-Sabata
19Mbuboobu Jehova mbwaakandaambila. Koya ukaime mumulyango wabantu bako, bami ba-Juda nkubanjilila ankubazwida, amumilyango yoonse ya-Jerusalemu, 20#Int 49:1; Jer 19:3; 22:2; Ezk 2:7; 3:17; Hos 5:1; Mik 3:1ukabaambile kuti, Amuswiilile ijwi lya-Jehova nubami ba-Juda, anywebo nuba-Juda aboonse bakede mu-Jerusalemu, banjila mumilyango eyi. 21#My 15:32; Neh 13:15-22Mbuboobu mbwaamba Jehova. Amucenjele kuti mutayumuni mukuli nuuba umwi mubuzuba bwa-Sabata, mutaunjizyi mumilyango ya-Jerusalemu. 22#Kul 20:8-10; 23:12; 31:13; Ezk 20:12; Dt 5:12-14Alimwi mutayumuni mukuli nuuba umwi kuzwa kumaanda aanu mubuzuba bwa-Sabata, nikuba kucita milimo niiba imwi. Amulemeke buzuba bwa-Sabata mbubonya mbundakabalailila bamausowanu. 23Pele balo tabakwe nibakaswiilila nikuba kucenjeka matwi aabo. Bakayumya insingo zyabo kuti bataswiilili nikuba kutambula lulayo. 24Pele na mwandiswiilila camoyo woonse, mbwaamba Jehova, na mwakaka kunjizya mikuli mumilyango yamunzi oyu mubuzuba bwa-Sabata, na mwalemeka buzuba bwa-Sabata akutabeleka milimo niiba imwi mulimbubo, 25#Dt 4:40lino kulanjila mumilyango yamunzi oyu bami abasilutwe bakala acuuno cabwami bwa-Davida, batantide ankalaki ambizi, balo abanene babo, bantu ba-Juda abantu bakede mu-Jerusalemu, nkabela oyu munzi uyookalwa bantu lyoonse akutamani. 26#Zek 7:7; Int 107:22Bantu bayoozwa kuminzi ya-Juda, akucisi ceengelede Jerusalemu, akunyika ya-Benjamini, akunyika yatulundulundu, akuzilundu, aku-Negebi, balaletelela zipaizyo azituuzyo abusu atununkilizyo, balaleta zilumbyo kuŋanda ya-Jehova. 27#Malo 4:11; Am 1:4; 2 Bam 25:9Pele na mwakaka kundiswiilila, na mwakaka kulemeka buzuba bwa-Sabata akulikasya kunjizya mikuli mumilyango ya-Jerusalemu mubuzuba bwa-Sabata, lino njooyasya mulilo mumilyango yawo, uyoolidilila maanda aabwami aamu-Jerusalemu, nkabela takukooyooba sikuuzimya.
Currently Selected:
Jeremiya 17: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
