Isaya 54
54
Zioni mbwazooboola alimwi kuba muka-Leza
1 #
Gal 4:27
Imba, webo O musundi uutazyali, Talika kwiimba akuuma nguluulu, webo otatumbuki. Nkaambo bana banabutema mbanji kwiinda bana bayooyo uukwetwe, mbwaamba Jehova. 2Komezya kuntu nkuukede, amasani aatente lyacikalilo cako andandamikwe. Utayoowi kulampya intambo zyako akuyumya inkankamino zyako. 3Nkaambo unooya bulimwaisya koonse koonse kululyo akulumwensi, nkabela lunyungu lwako luyoovuba nyika yabamasi akukala muminzi iibulide bantu. 4Utayoowi pe, nkaambo tokooyoofwa insoni. Utakankami, nkaambo tokooyoofwisigwa bweeme. Uyooluba insoni yabwanike bwako, akusampaulwa kwabumukamufu bwako tokooyookuyeeya limbi. 5#Is 41:14; 44:6; 49:7; Job 19:25; Rom 3:29Nkaambo mubumbi wako ngumulumi wako; izina lyakwe ngu-Jehova wamakamu. Uusalala wa-Israyeli ngumunununi wako; ngonguwe uuambwa kuti Leza wanyika yoonse. 6Nkaambo Jehova wakwiita mbuli mwanakazi uulekedwe uuside mumoyo wakwe, Sa mwanakazi wabulombe ulakonzya kukakililwa? mbwaamba Leza wako. 7#2 Kor 4:17Ndakakuleka kaindi kaniini buyo, njookuboozya kulindime caluzyalo lupati. 8#Jer 31:3Bukali bwangu nibwakabuka, ndakasisa busyu bwangu kaindi, pele njookufwida luzyalo abuuya butamani, mbwaamba Jehova Munununi wako. 9#Jer 31:35; Matl 9:8-17Aya makani andibeda mbuli makani aamaanzi aa-Nowa. Mbubonya mbundakonkezya kuti maanzi aa-Nowa taakooyooboola limbi kuzoovumba nyika, mbubonya obo ndakonkezya kuti nsikooyookukalalila nikuba kukutapatila. 10#Int 46:2; 89:33Zilundu zilakonzya kutantamuka, atulundulundu tulakonzya kusosoloka, pele luzyalo lwangu talukooyootantamuka kuzwa kulinduwe, acizuminano cangu caluumuno tacikooyoososoloka abuniini, mbwaamba Jehova uukufwida luzyalo.
11 #
Ciy 21:18-21
Webo opengede, otengaukide kuguwo, obulide luumuno, bona! Nzoonamatizya mabwe aako acizilo, antalisyo zyako nzooziyaka amabwe aa-Safiro. 12Insonge zyako nzooziyasya mabwe aasalala pyu, makoma aako nzooayasya mabwe aabekema, aalo malambo aako oonse azooyasigwa mabwe mayandisi. 13#Is 11:9; 1 Kor 2:10; 1 Tes 4:9; Flp 4:7; Joh 6:45; 14:27Bana bako boonse bayooiyisigwa Jehova. Ncobeni bana bako bayooba acoolwe cipati. 14Mubululami momuti ime nji. Mapenzi ayootantamuka kule kuzwa kulinduwe, nkaambo tokooyooyoowa. Zintu ziyoosya tazikooyooswena nkobede pe. 15Na muntu uukubusizya inkondo, makani taazwi kulindime pe, Kufumbwa uumubusizya inkondo uyoonyonyooka nkaambo kanu. 16Amubone! Ndime ndakalenga mufuzi uuvukuta malasa mumulilo akupanga cilwisyo cakubelesya, Alimwi ndime ndakalenga sikunyonyoona kuti ajaye. 17#Inc 6:10; 2 Kor 2:14; Ciy 12:10; Is 50:8,9; 45:24Pele taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu, Nciceeco caabilo cabalanda ba-Jehova akululamikwa kwabo kuzwa kulindime, mbwaamba Jehova.
Currently Selected:
Isaya 54: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
