Isaya 49
49
Mulanda wa-Jehova mbwazoobambilwa milimo yakwe
1 #
Mt 1:20; Lk 1:15; Jer 1:5 Amundiswiilile nunyika zyakunkomwe yalwizi. Amuteelele numisyobo yabazwakule, Jehova wakatalika kundiita kalekale nindakacili muzyalilo. Ngowakanduulika izina nindakacili mwida lyabama. 2#Hos 6:5; Heb 4:12; Ciy 1:16Wakacita mulomo wangu mbuli ipanga libosya. Mucenzule cajanza lyakwemowakandisisa, Wakandibika kuti mbe muvwi uubeka-beka, akundiyubika munkomo yakwe. 3#Zek 3:8; Mt 17:17; Joh 13:31Lino wakandaambila kuti, Nduwe mulanda wangu, Israyeli ngunjoolemezegwa. 4#Ezk 3:19Ndakaamba kuti, Milimo njindabeleka njabuyo. Ndupilingano azintu zitagwasya nzindasowela inguzu zyangu. Pele ncobeni Jehova nguuti ndibeteke, abulumbu bwangu nkubuli kuli-Leza wangu. 5Lino mbuboobu mbwaamba Jehova iwakandibumba mwida kuti mbe mulanda wakwe, kuti nkamuboozezye Jakobo, aba-Israyeli bayobololwe kulinguwe. (Ndalemekwa mumeso aa-Jehova, a-Leza wangu nguwaba inguzu zyangu.) 6#Is 9:2; 42:6; Lk 2:32; Inc 13:47; 26:23Wati, Ncintu ciniini buyo kulinduwe kuba mulanda: wangu wakubusya misyobo ya-Jakobo awakupilusya ba-Israyeli bafutukide. Njookubika kuti ube mumuni wabamasi abalo, ube lufutuko lwangu koonse akusikila kumagolelo aanyika.
7Mbuboobu mbwaamba Jehova, Munununi wa-Israyeli, Musalazi wakwe, Ulaambila umwi uusampaulwa, uusesemya bamasi, muzike wabeendelezi. Bami bayoobona, bayoobuka, abasilutwe bayookotama, nkaambo ka-Jehova uusyomeka, nkaambo ka-Musalazi wa-Israyeli uukusalide.
Ba-Israyeli mbubayoovunwa kubuzike
8 #
Int 69:13; 2 Kor 6:2 Mbuboobu mbwaamba Jehova. Kuciindi cacoolwe ndakuvwiila, amubuzuba bwalufutuko ndakugwasya. Ndakubamba, ndakupa kuti ube cizuminano cabantu, kuti ukabusye nyika akubakonya inkono zisaalidwe, 9#Is 42:7; Zek 9:12ukaambile baange kuti, Amuzwe, abaabo bali mumudima ukabaambile kuti, Amuboneke. Bayoocela munzila zyoonse; macelelo aabo ayooba atala lyazilundu zyoonse zikukwidwe muuwo. 10#Int 22:26; 121:6; 23:2; Joh 6:35; Ciy 7:16-17Tabakooyoofwa inzala nikuba kufwa nyota, Inkasaalo tiikooyoobauma, niliba izuba. Nkaambo oyo uubafwida luzyalo uyoobazulwida, ulabeenzya kumbali lyatusensa twamaanzi. 11Njoosandula zilundu zyangu kuti ziindike, amigwagwa yoonse iyoosumpulwa. 12Amubone! Bamwi bayoozwa kule, bamwi bayoozwa kunyika akumbo, abamwi bayoozwa kucisi ca-Sinimu. 13Amwiimbe nomajulu, sekelela O nyika. Amutalike kwiimba numalundu. Nkaambo Jehova waumbulizya bantu bakwe, abapengede bakwe wabafwida luzyalo.
14Pele Zioni waamba kuti, Jehova wandilekelezya, Mwami wangu wandiluba. 15#Int 103:13; Mt 7:11; Rom 11:29Ma! Sa mwanakazi ulaluba mwanaakwe uucinyonka? Sa ulaleka kufwida mwana ngwazyede hizyalo? Aba ambweni balaluba, pele mebo nsikonzya kukuluba uwe pe. 16#Kul 13:9; Lwi 8:6; Zek 2:8Bona! Ndeengede cifwanikisyo cako mumaanza aangu, Malambo aako aboneka kumeso aangu lyoonse. 17Bantu balafwambaana kukuyaka. Abo ibakali kukusaala akukunyonyoona bayookuleka. 18#Tus 17:6Lanzya meso aako koonse koonse, ubone. Boonse balibungene, beza kulinduwe. Ncobeni mbundi muumi, mbwaamba Jehova, uyoobasama boonse mbuli zyakulizakila, uyoobaanga mbuli mbwaanga nabwiinga. 19#Is 54:1,2; Zek 2:4Nkaambo matongo aako amasena aako aabulide bantu anyika yako iisaalidwe ncobeni zyoonse zilaata bantu bakukalide, abaabo ibakakumenede bayooba kule. 20#Mt 3:9; Rom 11:11Bana ibakazyalwa kuciindi cakufwidwa kwako bayooamba mumatwi aako kuti, Kuntu okuno kwandaatila; kondiswena, kuti nkale kabotu. 21#Matl 42:13; Jer 31:15Lino uyooamba mumoyo wako kuti, Ino nguni wandizyalila aba? Ndakafwidwa, ndakali musundi, ndakali mubuzike, ndakalitandidwe, lino aba nguni wabalela? Ndakasyaala endike, lino aba bazwa kuli?
22Mbuboobu mbwaamba Mwami Jehova, Amubone! Njoosumpwida bamasi ijanza lyangu akubusizya bantu citondezyo, elyo bayooleta bana bako balombe muzyamba zyabo, bana bako basimbi bayooyumunwa aziwezo zyabo. 23#Int 72:9; 34:22; Mik 7:17; Rom 5:5Nkabela bami bayooba basimalelo bako, abanamalelo babo bayooba basikunyonsya bako. Bayoomukotamina cakuvundama ansi akumyankuta itombe lyakumaulu aako, Lino muyooziba kuti ndime Jehova. Boonse balangila ndime tabakooyoofwa insoni.
24 #
Mt 12:29; Lk 11:21 Sa lusaalo lulakonzya kunyanzigwa singuzu? Sa bazike mbaarolede mukali balakonzya kuvunwa? 25Ncobeni mbuboobu mbwaamba Jehova, Bazike mbaatolede singuzu bayoolubululwa, alunyanzyo lwamukali luyoovunwa. Njoolwisya abo bakulwisya, nkabela njoofutula bana bako. 26#Ciy 14:20; Int 9:16; Is 43:3Abaabo bakupenzya njoobalisya nyama yabo beni, nkabela bayookolwa bulowa bwabo mbuli muntu mbwakoledwe imbote, Lino bantu boonse bayooziba kuti mebo nde-Jehova ndime mufutuli wako amunununi wako, Singuzu wa-Jakobo.
Currently Selected:
Isaya 49: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
