Hosea 9
9
Ba-Israyeli mbubati tandilwe kuzisi zyeenzu
1Utasekeleli cakukondwa, O Israyeli, mbuli bamasi. Nkaambo weenda buvuula cakuleka Leza wako, amali aabuvuule waayanda muzipolelo zyoonse zyamaila. 2Pele cipolelo camaila acisinino cawaini zyoonse tazi-kooyoobasanina; wami ulabamanina. 3#Lev 18:25; Dt 4:26,27; Hos 11:5; Ezk 4:13Tabakookala munyika ya-Jehova pe. Efraimu uyoopiluka ku-Egepita, amucisi ca-Asuri bayoolya zitonda, 4#Dt 26:14Tabakooyootila waini wakupaizya Jehova, azipaizyo zyabo tazikooyoomubotela pe. Zilyo zyabo ziyooba mbuli zilyo zyabasidilwe, ziyoosofwaazya boonse bazilya. Zilyo zyabo ziyooba zyakulya buyo, tazikooyookonzya kunjila muŋanda ya-Jehova. 5Ino muyoocita buti mubuzuba bwakusekelela, amubuzuba bwapobwe lya-Jehova? 6Banooya ku-Asuri, cisi caEgepita ciyoobamena, amunzi wa-Mofi uyoobazika. Ziyandisi zyabo zyansiliva impese ilazivuba, amumaanda aabo muyooba mamvwa. 7#Lk 21:22Mazuba aakulumbulwa ayoosika, mazuba aakubweedezegwa bubi ayoosika. Israyeli ulaabona. Bati, Musinsimi mufubafuba, muntu uunjidwe Moya ulisondokede. We! Mulandu wanu mupati! Businkondo bwanu bwakomena! 8Musinsimi ngumulangi ngwaakabika Leza kuti alange Efraimu, nekubaboobo inzila zyakwe zyoonse ziliteedwe, amuŋanda ya-Leza ulajana businkondo. 9#Bab 19:1-30Balabisya loko mbubonya mbuli kubisya kwamazuba aaGibeya. Leza takooyooluba kubisya kwabo, uyoobapa mulandu kuzibi zyabo.
Ba-Israyeli mbubalisofwaasya
10 #
Dt 32:10; My 25:1-5 Ndakajana ba-Israyeli bali mbuli masaansa munkanda, ndakabona bamauso mbuli inkuyu zitalika kubizwa. Pele nibakasika ku-Baala-Peori, bakalyaabila cifwisya bweeme, bakaba cisesemyo mbubonya mbuli ciyandwi cabo. 11Bulemu bwa-Efraimu bulaya buuluka mbuli muyuni. Taakwe uuzyala, taakwe uuli ada, taakwe uumita. 12#Dt 31:17; 1 Sam 28:15; Hos 5:6Nekuba kuti balela bana, njoobafwidya boonse buyo, Maawe kulimbabo ciindi ncenti pambukane abo! 13Bana ba-Efraimu bayoosaalwa. Efraimu ulaabila sikujaya bana bakwe. 14#Lk 23:29Kubapa, O Jehova, ulabapa nzi? Kobapa ida lyakusowa ankolo zitanyonkwi, 15Bubi bwabo boonse bulalibonya ku-Giligala; nkukonya oko nkundakabasulide. Nkaambo kakubija kwamilimo yabo njoobatanda kuzwa muŋanda yangu. Nsikooyoobayanda limbi. Bapati babo boonse mbasicinguni. 16Ba-Efraimu balipide, miyanda yabo iliyumide, tabaciti micelo. Nekuba kuti bazyala, njoonyonyoona bayandwi bamada aabo. 17#2 Bam 17:18Leza wangu ulabasoowa nkaambo kakutaswiilila kwabo, nkabela bayooba basimutuntuli akati kabamasi.
Currently Selected:
Hosea 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
