Hebrayo 9

Zipaizyo zyamulongo mutaanzi zyakali kutuulwa lyoonse, pele Kristo wakalituula lweendo lomwe

1Lino Mulongo wakusaanguna wakalijisi milao yawo yakukomba, akuntu kusalala kwaansi ano. 2#Kul 26:1-30; 25:23-40Nkaambo kwakayakwa cikombelo citaanzi, umwakali cibikilo calampi antafule amikamu yamabonwabonwa, icaambwa kuti Mbusena busalala, 3#Kul 26:31-33Alimwi kusule lyacisitilizyo cabili kwakali cikombelo cimwi citegwa Busena Busalalisya cakwiinda, 4#Kul 16:33; 25:10-16,21; 30:1-6; Dt 10:3-5omu momuli cipaililo cangolida, alimwi muli Ibbokesi lya-Mulongo livumbidwe ingolida yalo mubili woonse, nkabela mukati kalyo muli cibiya cangolida cijisi Mana, amusako wa-Arone uwakasonsa, amabwe aakulembela Mulongo. 5#Kul 25:18-22; 26:34Eno atala lyabbokesi akali Bakerubimu ba-Bulemu bapopelede Cuuno caluzyalo. Pele nciyumu kulindime kukanana oonse aya ecino ciindi.

6 # My 18:2-6 Eno zintu ezi nezyaliwo, bapaizi bali kunjila lyoonse mucikombelo citaanzi kukumana milimo ya-Leza, 7#Lev 16:2-34; Kul 30:10pele mucikombelo cabili teemwanjila muntu pele mupaizi alike komwe mumwaaka, nkabela omu tanjili atanoojisi bulowa bwakulituulila mwini akutuulila indubyo zyabantu. 8#Heb 10:19Mbuboobo Muuya Uusalala mbwafundisya kuti inzila iiya mu-Busena Busalalisya cakwiinda tiina kujuka, mbociciimvwi cikombelo citaanzi, 9#Heb 10:1,2(eco ncikozyano kuciindi casunu), nezili zituuzyo azipaizyo izyatuulwa, zitakonzya kulomya muntu sikukomba kuzibi zyakwe, 10#Lev 11:2; 15:18; My 19:13nkaambo nzyakulya azyakunywa azyakusamba kwamisyobo misyobo. Ezi zintu nzyaanze, nzyamubili, nzyakujatilila buyo mane kuciindi cakuyoobamba.

11 # Heb 6:20; 10:1 Pele eno Kristo wakasika mbuli Mupaizi Mupati wacoolwe ciciza, wakaindilila akunjila mucikombelo cimwi cipati cini cilomene, icatakayakwa amaanza aabantu, nkokuti taceensi caansi ano, 12nkabela taakwe naakatola bulowa bwampongo nobuba bwaŋombe, wakatola bulowa bwakwe mwini, eno wakaindilila akunjila komwe luzutu mu-Busena Busalalisya cakwiinda aboobo wakaleta lununuko lutamani. 13#Lev 16:3,15-16; My 19:9,17-19Ino kai obo, na bulowa bwampongo abwabasune etwe lyampwizi, nezisansailwa kubantu abadiinkene, inga zilabasalazya mumubili, 14#1 Pet 1:18,19; 1 Joh 1:7; Ciy 1:5; 1 Kor 15:45; Heb 6:1sena inga bwalo bulowa bwa-Kristo, uwakalituula mwini kuli-Leza mu-Muuya Uutamani mbuli cipaizyo citakwe kampenda, tabukooinda kusalazya meezeezyo aanu akumugwisizya milimo mifu, kuti mumumanine milimo Leza muumi? 15#Heb 12:24; 1 Tim 2:5Eno nkaambo kamakani aya walo ncaaba Sikwiimaakati wa-Mulongo mupya, kuti abo abakaitwa bakatambule lukono lutamani olo ulwakasyomezegwa, nkaambo lufu mpoluli lubanununa kukusotoka milao kwamumulongo wakusaanguna. 16Lino kumakani aamalaililo aasikukonenwa, kuleelede kuba lufu lwasikulailila, 17nkaambo malaililo alacitwa anoofwide mukamwini, taakwe mulimo nacipona sikulailila. 18Nkaambo kaako, awalo mulongo mutaanzi nowatakatangwa kuti nobwatali bulowa. 19#Kul 24:6-8; Lev 14:4; My 19:6Nkaambo Musa naakamana kulailila bantu boonse makani oonse aa-Mulao, wakabweza bulowa bwaboombe abwampongo, antoomwe amaanzi aboya busalala tyu ahisopo, wakabusansaila kubbuku akubantu boonse, 20#Mt 26:28wakati, Mbombuboobu mbobulowa bwamulongo ngwaakamutanga Leza. 21#Lev 8:15,19Mbubonya boobo, alimwi wakabweza bulowa, wakabusansaila kucikombelo akuzibiya zyoonse zyamoomo mukombelwa. 22#Lev 17:11; Ef 1:7Ncobeni tulakonzya kwaamba kuti, mumakani aa-Mulao bulowa mbobusalazya zintu zyoonse buyo, alimwi takukwe kulekelelwa kwazibi mane do kukutila bulowa,

23 # Heb 8:5 Eno kwalikweelede kuti zinkozya zyazintu zyakujulu kazisalazigwa mbubonya obuya, pele zyalo zini zyakeelede kusalazigwa azipaizyo zibotu cakwiinda. 24#Heb 11:12; 1 Joh 2:1Nkaambo Kristo teewakanjila mu-Busena Busalala ubwakayakwa amaanza aabantu (ncifwanisyo buyo cabusena bwinibwini), pe, wakanjila kujulu kwini buya, kuti akapompe kubusyu bwa-Leza nkaambo kandiswe, 25Nkabela takweensi kuyoolituula kanjikanji, mbuli mupaizi mupati mbwanjila mu-Busena Busalala myaaka yoonse, natolelela bulowa butali bwakwe, 26#1 Kor 10:11; Gal 4:4nkaambo kakuti nokwali boobo, ukuzwida kumalengelo aanyika Kristo nataleki kupengekana lyoonse. Anu pe, walo wakaakupompa komwe buyo kuciindi camamanino kuti akalobye zibi kukulipaila mwini, 27#Matl 3:19Lino mbuli mbokubede kuti bantu kabanga kabafwa lweendo lomwe, elyo babetekwe, 28#Is 53:12; Flp 3:20; Heb 10:10; 12:14; 2 Tim 4:8; 1 Pet 2:24mbubonya obo awalo Kristo, amana kulituula komwe ukuyumuna zibi zyabanjibanji, ulapompa alimwi lwabili, azibi zitawo, kuzoofutula baabo abamulangila.

Currently Selected:

Hebrayo 9: Ibbaib63

Highlight

Copy