Hebrayo 12
12
Wabakombelezya kuti bajatisye bunakristo
1 #
Heb 10:36; Rom 7:21; 1 Kor 9:24 Eno buya swebo mbotuzingulikidwe makamu makamu aya aabakamboni, atuzisowe zyoonse zitucelezya azibi zyoonse zitulamatila, tugame kusiana nkotwabikilwa kunembo. 2#Heb 2:10; Int 110:1Katuduneme kuli-Jesu musolozi uulomya lusyomo lwesu, ikuti walo, nkaambo kalukondo ndwaakabikilwa kunembo, wakazyandamana kuciingano, wakaubaula buusu, eno sunu ulikede kululyo lwacuuno ca-Leza. 3#Lk 2:34Kamwiilizya nguwe uwakazyandamana mukukazyanya kuli bobuya kwabantu abamubisizya, kuti mutabombibombi nokuba kulengaala mumyoyo yanu. 4Anu tamuna kulwana kukutikaisya bulowa, mucigamine kulwana azibi. 5#Job 5:17; Tus 3:11-12Eno sena mwaluba aya majwi aakugwasya myoyo ngomwaambilwa mbuli bana bakulizyalila? Aati,
Mwanaangu, utanoonga koubaula kukomwa nkwakukoma Jehova,
Utabi nolengauka bakutapatila.
6 #
Ciy 3:19
Nkaambo kufumbwa muntu ngwayanda Jehova, ulamukoma,
Alimwi ulamusansaula woonse mwanaakwe ngwatambula.
7Eno nkaambo kakwiisya myoyo ncomukomenwa boobo. Leza ulamucita mbuli bana bakwe, nkaambo ino mwananzi walo oyo uutakwe nakomwa kuliwisi? 8#Int 73:14,15Kukomwa nkokwabantu boonse, Kuti nomwatali kukomwa, nomwatali bana bakulizyalila, pe, nomuli bana bamusokwe. 9#My 16:22Nkobeni twakali kubalemeka bamatata abakatuzyala nobatukoma. Ino kai obo, sena tatukooyooinda kubombela yooyo uuzyala myuuya, kuti tupone? 10Nkaambo abo bakali kutukoma kukuyanda kwabo kwamazuba mace buyo, anu walo utukomena kuti tululame, tukaabilwe busalali bwakwe. 11#2 Kor 4:17,18; Jak 3:17Eno kuciindi ncocuumwa-umwa tacitangazyi pe, cilausya, pele munsi, kukomwa oko kulatujanya micelo yakulikalila kabotu akululama.
12 #
Is 35:3
Nkaambo kaako amwaayumye maboko aanu amazwi aanu aali abukonkomwa, 13#Tus 4:26alimwi maulu aanu amwaepele inzila ziluzi, kuti boonse abasunkuta bataleyi munzila, pele bapone. 14#Int 34:14; Mt 5:8; Rom 12:18; 2 Tim 2:22Amutobele luumuno lwakulikalila abeenzinyoko boonse, abusalali, ubunga muntu atakujana bulamukasya kuyoobona Mwami. 15#Dt 29:18; Inc 8:23Amulangisye nkuko mbokunga kulaba muntu naba omwe uuti bulile kulijanina luzyalo luzulide lwa-Leza, kuti kutabi muyanda uulula uusonsa unga ulaleta mapenzi akati kanu akusofwaazya banjibanji. 16#Matl 25:29-34Alimwi kutabi mwaamu naba muntu uutaluzi uuli mbuli Esau, uwakauzya bupati bwakwe bwakuzyalwa kumutiba omwe wacilyo. 17#Matl 27:30-40Nkaambo mulizi kuti, munsi naakayeeya kupegwa coolwe, wakakakwa. Cakamumanina ciindi cakweempa, pele nalila mbwaakacililila mpaansi buyo.
18 #
Kul 19:12,16-22; 20:18-21; Dt 4:11-12; 5:22-27 Nkaambo tamuswenene kudundu lili abujate, liyaka mulilo, nokuba kukusia nokuba kumudima nokuba kubbubbulwa, pe. 19#Kul 19:19; 20:19; Dt 5:23Tamuswenene kukulila kwamweembo nokuba kumuzungumina wamajwi, muzungumina uunga abo abakuumvwa balakumbila kuti batacuumvwi kabili. 20#Kul 19:12-13Nkaambo inga balakakilwa kuyobola mulao wakuti, Naba munyama uulyata kudundu ulajazigwa mabwe. 21#Dt 9:19Ayo akali kuyoosya naakapompa, awalo Musa wakati, Ndayoowa loko akukankama, 22#Ciy 14:1; 21:2; 5:11; Gal 4:26Pe, nywebo mwasika kudundu lya-Zioni, akumunzi wa-Leza muumi, Jerusalemu wakujulu, akumakamu makamu aabaangelo bali myaanda myaanda. 23#Lk 10:20Mwasika kumbungano njobabunganina bataanzi kuzyalwa abo balembedwe kujulu, akuli-Leza mubetesi wabantu boonse, akumyuuya yabantu baluleme balondokede. 24#Matl 4:10; Heb 9:15; 11:4; 1 Pet 1:2Mwasika kuli Jesu sikwiimaakati wamulongo mupya, akubulowa busansailwa bulumbaizigwa kwiinda bwa-Abelo. 25#Kul 20:22; Heb 2:2; 10:28,29Amucenjele kuti mutamukazyi oyo uukanana. Nkaambo kuti nobatakayokoka eliya nobakali kuunduluzya kuliyooyo uwali kubaiisya ansi, ncobeni notwainda anka kutayokoka aswebo, notumufutatila oyo uuamba majwi aazwa kujulu. 26#Hag 2:6Oyo nguuli ajwi ilyakadidimya insi, pele eno wasyomezya wati, Eno kwasyaala lumwi luzutu kudidimya. Nsikooyoodidimya insi ilike, pe, ndiyoolididimya alyalo ijulu. 27Eno eli ijwi lyakuti “Kwasyaala lumwi luzutu” nkukwaamba kuti kuyoososololwa zeezyo zizungaanizigwa, mbuli zintu izyakalengwa buyo, kuti ezyo zitazungaanizikwa zikasyaale, 28Eno buya mbotwatambula Bwami butazungaaniziki, katulumba akumanina Leza milimo mibotu yakumubotezya, cakulemeka acakuyoowa, 29#Dt 4:24; 9:3; Is 33:14nkaambo Leza wesu oyu ncobeni mulilo uunga wakuteuta waida syukutu.
Currently Selected:
Hebrayo 12: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
