Habakuku 3
3
Cikombyo ca-Habakuku
1Nceeci cikombyo ca-Habakuku musinsimi. Ncakwiimba a-Sigionoto.
2Jehova, ndimvwide impuwo yako, ndiyoowede.
O Jehova, busya milimo yako mukati kamyaka.
Mukati kamyaka uizibisye.
Mukunyema kwako utalubi luzyalo.
3Leza wazwa ku-Temani.
Uusalala wazwa kucilundu ca-Parana. (Sela)
Bulemu bwakwe bwavumba ijulu lyoonse,
Ayalo nyika yalizwide kutembaulwa kwakwe.
4Kumweka kwakwe kwakali mbuli mumuni,
Kali amitungazuba iizwa kubbazu lyakwe,
Nkukonya oko inguzu zyakwe nkuzyakayubide.
5Bulwazi bulamusololela,
Amulilo uutenta ulamutobela kusule.
6 #
Kul 23:31; Dt 32:8; My 21:24,34 Wakaima, wakeeleka nyika.
Wakabona, wakatanda masi.
Zilundu ziteeli zyakamwaika,
Mapili aaciindi akakotama. Inzila zyakwe nzezyaciindi.
7Ndakabona zilao zya-Kusani zili mumapenzi.
Zi sani zyamatente aacisi ca-Midyani zilakankama,
8 #
Kul 14:21,22 Sa Jehova wakabijilwa milonga?
Sa bukali bwako bwakali kumilonga?
Sa kunyema kwako kwakali kulwizi?
Tee ncico ncowakatantila ambizi zyako,
Ankoloyi zyako zyalufutuko?
9Buta bwako bwakasupuka,
Ijwi ndowakakonkezezya mikowa lyakaba lyakusinizya. (Sela)
Nyika wakaipanduzya milonga.
10Malundu akakubona, akapengesya.
Izambangulwe lyamaanzi lyakainda.
Intinti yakalizya ijwi lyayo,
Akusumpula maanza aayo.
11Izuba amwezi, zyoonse zyakaima nkuzikede,
Nizyakabona mumuni wamivwi yako ileenda,
Akumweka kwasumo lyako libeka-beka.
12 #
Int 44:2,3; Mik 4:13 Mubukali bwako wakainda akati kanyika,
Wakalyataula zisi cakunyema.
13 #
2 Sam 5:20
Wakainka kuyoofutula bantu bako,
Kuyoofutula munanike wako.
Wakapwaya mutwe muŋanda yabasizibi,
Wakavumbulula zitalisyo akusikila kunsingo. (Sela)
14Watuluzya masumo mitwe yabasilumamba bakwe,
Bakeza mbuli kambizi kuzoondimwaya.
Kulya batengwana kumbali nkokwakababotela.
15Mabbiza aako wakaalyatauzya lwizi,
Ibbonze lyamaanzi manji.
16Nindakamvwa, mala aangu akali kukankama.
Milomo yangu yakabwibwima kujwi lyao.
Bubole bwakandinjilila muzifuwa.
Ndakakankama mpondakabede.
Ndakalindila buzuba bwamapenzi,
Buti sikile bantu babasaala.
17 #
2 Kor 4:8,9 Nekuba kuti mukuyu topampanuki,
Amumisaansa tamukwe micelo,
Micelo yamaolifa tiibonwi,
Amyuunda tiijisi zilyo,
Imbelele zyamana mubbondo,
Amucimpati tamukwe iŋombe,
18 #
Int 42:5; Is 61:10 Nsileki kubotelwa muli-Jehova,
Noocikondwa muli-Leza walufutuko lwangu.
19 #
2 Sam 22:34; Int 18:33; 27:1 Mwami Jehova ninguzu zyangu.
Ulaubya maulu aangu mbuli insya,
Ulandeenzya amasena aakujulu,
(Olu lwiimbo ndwasikwiimba mupati, aimbye zilizyo zyatukole.)
Currently Selected:
Habakuku 3: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
