Ba-Galatiya 2

Buapostolo bwa-Paulo mbubwakazumininwa ku-Jerusalemu

1 # Inc 11:30; 15:2 Lino nikwakamana myaaka iili ikumi aine, ndakaya ku-Jerusalemu lwabili, katuli a-Barnaba, alimwi ndakatolelezya Tito. 2#Gal 6:9Nkaambo kaciyubunuzyo ncindakainka, nkabela ndakabapandulwida makani nginkambauka akati kabamasi, ndakaamba kumbali abapati, kukusinizya kuti teensi yabuyo milimo yangu njincita na njindakacitide kale, 3#Inc 16:3Lino Tito ngutwakali awe kali mu-Helene, nekubaboobo teebakamusinikizya kuti apalulwe pe. 4#Inc 15:1,24Pele kakuli bamwi babunyina babeji ibakasobelela kunjila kuti balangelange bulubusi bwesu mbutujisi muli-Jesu Kristo, kuti bakatunjizye mubuzike. 5#Gal 3:1Kulibaaba teetwakazuminina nikaba kaindi kaniini pe, kuti lusinizyo lwa-Makani Mabotu lusyaale kulindinywe. 6#Dt 10:17Lino abo baambwa kuti mbapati (taakwe makani kulindime mbubakabede, nkaambo Leza talangilili ciwa camuntu), abo baambwa kuti mbapati kabatajisi cintu cakuyungizizya makani aangu. 7#Inc 9:15; 15:12; 22:21Pe, pele nibakabona kuti ndakapegwa milimo yakukambaukila basilulomo Makani Mabotu mbubonya mbuli Petro mbwaakapegwa milimo yakukambaukila bapalule, 8(nkaambo oyo iwakaindauka mucamba ca-Petro kuti abe apostolo wabapalule nguwenya iwakaindauka mucamba cangu kuti mbe apostolo wabamasi), 9#Joh 1:42alimwi nibakabona luzyalo ndundakapegwa, elyo Jakobo a-Kefa a-Johane, abo baambwa kuti misemu yambungano, bakatupa mebo a-Barnaba ijanza lyalulyo lyaluswanaano cakuzumina kuti swebo tuye kulibamasi, abalo baye kulibapalule. 10#Inc 11:30; 12:25Pele kabayanda kuti twiibaluke bacete, nkabela cintu eci ambebo ndakali kucisungwaalila.

Paulo mbwaakakazyanya a-Petro

11Pele Kefa naakasika ku-Antiokeya, ndakamukazya kumeso aakwe, nkaambo wakajisi mulandu. 12#Inc 11:3Ikuti nibatakalina kusika bamwi bantu bazwa kuli-Jakobo, wakali kulya abamasi, pele nibakasika wakatalika kulifunya akulipambula, nkaambo wakali kuyoowa bapalule. 13Nkabela ba-Juda bamwi boonse abalo bakaupaupa ameso antoomwe anguwe, a-Barnaba alakwe wakalengawidwa abuupeupe bwabo. 14Pele nindakabona kuti tabeendi cakululama mbuli lusinizyo lwa-Makani Mabotu, ndakaambila Kefa kumeso aabo boonse, ndati, Kuti webo uli mu-Juda, nekubaboobo ulacita mbuli ziyanza zyabamasi akutacita mbuli ziyanza zyaba-Juda, ino nkaambonzi ulasinikizya bamasi kuti babe mbuli ba-Juda? 15Swebo tuli ba-Juda bazyale, tatuli bamasi basizibi pe, 16#Int 143:2; Rom 3:20,22,28; 4:5; 11:6; Inc 15:10,11; Ef 2:8Pele tulizi kuti teensi milimo ya-Mulao iilulamika muntu, ndusyomo lwa-Kristo Jesu lumululamika, nkabela aswebo twakasyoma Kristo Jesu kuti tululamikwe boobo. Kululamikwa kwesu kwazwa kukusyoma Kristo, takuzwi kumilimo ya-Mulao pe, nkaambo milimo ya-Mulao tiikonzyi kululamika muntu naba omwe. 17Lino na tulayandaula kululamikwa muli-Kristo nkabela kulajanwa kuti aswebo tubeni tuli basizibi, nkukwaamba kuti Kristo waba mulanda wazibi sa? Ne! 18Nkaambo na zintu ezyo nzizyonya nzindakamwaya ndaziyakulula, elyo ndalibonekesya mbuli musotosi wa-Mulao, 19#Rom 7:6Ikuti mebo nkaambo ka-Mulao nkindakafwida Mulao, kuti nkaponene Leza. 20#Joh 13:1; 17:23; 1 Joh 3:16; Gal 1:4Ndibambwidwe aciingano antoomwe a-Kristo, nkabela endime encipona, ngu-Kristo uundiponena mukati. Buumi bwanyama mbunjisi sunu mbwalusyomo, ndusyomo luli mu-Mwana a-Leza, nguwe wakandiyanda akulyaaba nkaambo kangu. 21Nsikonzyi kulobya luzyalo lwa-Leza pe, Kuti bululami nibwali kuzwa ku-Mulao, nkukwaamba kuti kufwa kwa-Kristo nikwakaba kwabuyo.

Currently Selected:

Ba-Galatiya 2: Ibbaib63

Highlight

Copy