Ezekieli 39
39
Gogo abantu bakwe mbubayoonyonyoonwa akuzikwa
1 #
Ezk 38:2
Lino yebo, O mwana amuntu, sinsima aa-Gogo. Amba kuti, Mbuboobu mbwaamba Mwami Jehova. Bona! Ndi sinkondonyoko, O Gogo, silutwe mupati wa-Meseki a-Tubali. 2Njookupilusya, njookweenzya njookuleta kuzwa kumagolelo aakunyika, njookusisya kuzilundu zya-Israyeli. 3Lino njookuumina buta bwako mujanza lyako lyalumwensi, akuwisya mivwi mujanza lyako lyalulyo. 4#Is 34:2-8; Jer 15:3; Ezk 32:4,5; Ciy 19:17-21Atala lyazilundu zya-Israyeli mpoti wide, yebo amakamu aako oonse abantu boonse mboli abo. Njookwaaba mumilomo yabayuni bamisyobo misyobo ayabanyama bamusokwe, kuti bakumanisye. 5Uyoowida musokwe antangalala buyo, nkaambo mbuboobo mbundaamba, mbwaamba Mwami Jehova. 6#Am 1:4; Int 72:10Alimwi njootuma mulilo kuliMagogi akulibaabo bakede cakuliiba muzisi zyakunkomwe yalwizi, elyo bayooziba kuti ndime Jehova.
7 #
Lev 18:21; Ezk 38:16 Izina lyangu lisalala njoocita kuti libe ampuwo akati kabantu ba-Israyeli. Nsikooyoozumizya izina lyangu lisalala kusampaulwa limbi, nkabela bamasi bayooziba kuti ndime Jehova, Uusalala wa-Israyeli. 8#Ezk 7:3-8; 38:17Ncobeni makani aleza, alaba mbubonya obo, mbwaamba Mwami Jehova. Mbubuzuba obo mbondakaamba,
9Lino bantu bakede muminzi ya-Israyeli bayooinka kuyoolundika zilwisyo mumililo akuzitenta. Zitabilizyo antobo, mata amivwi, tuleba amyuumba, bayoozitenta zyoonse buyo. Ziyooba inkuni zyabo myaka iili musanu aibili. 10#Is 14:2Tabakooyootebba inkuni musokwe nekuba kugonka muzisaka pe, nkaambo zilwisyo nzeziyooba inkuni zyabo. Bayoosaala basikubasaala akunyanzya basikubanyanzya, mbwaamba Mwami Jehova.
11Mubuzuba obo njoopa Gogo busena bwamavwiko mucisi ca-Israyeli, Ikuti lya-Basilweendo kujwe lyakulwizi, nkabela buyoosinkila beenda inzila, nkaambo nkukonya oko nkubayoozika Gogo amakamu aakwe oonse. Bayoobuulika kuti ndikuti lya-Makamu aa-Gogo. 12#Dt 21:23Myezi iili musanu aibili luzubo lwa-Israyeli lunoobavwika, kuti basalazye nyika. 13#Int 126:2Bantu boonse buyo banyika bayoobavwika, nkabela aya makani ayoobabeda impuwo mubuzuba bwakulemekwa kwangu, mbwaamba Mwami Jehova. 14Bayoobika bantu batajisi milimo imwi cita kuya bweendeenda moonse munyika akuvwika abo bacisyeede atala anyika, kuti baisalazye. Yamana myezi iili musanu aibili, bayoolingula nyika; 15basikweenda banooya bweenda munyika, nkabela kufumbwa muntu uubona cifuwa camuntu uyoobika citondezyo kumbali lyaco mane basikuvwika bakamane kucivwika mukuti lya-Makamu aa-Gogo. 16Awalo munzi wakooko uyootegwa Hamona. Mbuboobo mbubayoosalazya nyika.
17 #
Is 18:6; Ciy 19:17-18 Lino yebo O mwana amuntu, mbuboobu mbwaamba Mwami Jehova. Ambila bayuni bamisyobo yoonse abanyama boonse bamusokwe. Amba kuti, Amubungane, muboole, Amuyoboloke kuzwa kumabazu oonse kucipaizyo ncendi mukumubambila. Ncipaizyo cipati loko atala lyazilundu zya-Israyeli. Muyoolya nyama akunywa bulowa. 18#Ezk 29:4; Dt 32:14; Int 22:12Muyoolya nyama yabasintaze akunywa bulowa bwabapati banyika, bagutu atubelele abasijembwe abapoho, boonse buyo baneneede baku-Basani. 19Muyoolya mafuta cakukuta akunywa bulowa bwakukolwa oko kucipaizyo ncindi mukumubambila. 20#Int 76:6; Ezk 38:4; Ciy 19:18Kuntafule yangu muyookuta kukulya imbizi abasikuzitanta, baalumi basintaze abasilumamba boonse, mbwaamba Mwami Jehova.
21 #
Kul 9:16; 7:4; Is 26:11; Ezk 36:23; Mal 1:11 Lino njoobika bulemu bwangu akati kabamasi, nkabela bamasi boonse bayoobona imbeta zyangu nzindacita ajanza lyangu ndembikide alimbabo. 22Elyo kuzwa kubuzuba obo luzubo lwa-Israyeli luyooziba kuti ndime Jehova Leza wabo muya mazuba oonse. 23#Dt 31:17; Lev 26:25Abalo bamasi bayooziba kuti nkekambo kazibi zyabo luzubo lwa-Israyeli neebatolelwa mubuzike, nkaambo bakapapila ndime, aboobo ndakasisa busyu bwangu kulimbabo akubaaba mumaanza aabasinkondonyina mane boonse bakajazigwa ipanga. 24#Ezk 36:19Ndakabacitila mbubonya mbuli kweelede kusofwaala kwabo azibi zyabo. Ndakasisa busyu bwangu kulimbabo.
25 #
Jer 30:3; Hos 1:11 Nkaambo kako mbuboobu mbwaamba Mwami Jehova. Ciindi ecino ndaamba kulobya buzike bwa-Jakobo akufwida luzubo loonse lwa-Israyeli luzyalo. Njoofwida izina lyangu lisalala ibbivwe. 26#Dan 9:16; Lev 26:5Bayooluba bweeme bwabo, azibi zyabo zyoonse nzibandibisizya mubuzuba obo nenzoobakazika caluumuno anyika yabo, nebazoobula uubayoosya, 27#Ezk 28:25; 36:23nenzoobaboozya kuzwa kulibamasi akubayobolola kuzwa kuzisi zyabasinkondonyina akulemekwa mulimbabo mumeso aazisi zinji. 28#Ezk 34:30; Hos 2:20Lino bayooziba kuti ndime Jehova Leza wabo, nkaambo ndime ndakabanjizya mubuzike muzisi zyabamasi, alimwi ndime ndakababoozya alimwi kunyika yabo. Nsikooyoosia limbi naba omwe wabo akati kabamasi, 29#Is 54:8; Joel 2:28alimwi nsikooyoosisa limbi busyu bwangu kulimbabo nenjootilila luzubo lwa-Israyeli muuya wangu, mbwaamba Mwami Jehova.
Currently Selected:
Ezekieli 39: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
