Ezekieli 38
38
Mbwaakasinsima aa-Go go
1Lino ijwi lya-Jehova lyakandisikila, liti, 2#Ezk 32:26; Ciy 20:8O mwana amuntu, langa Gogo wakunyika ya-Magogo, silutwe mupati wa-Meseki a-Tubali, Komulanga cankayikayi akusinsima aanguwe. 3Amba kuti, Mbuboobu mbwaamba Mwami Jehova. Bona! Ndi sinkondonyoko, O Gogo, silutwe mupati wa-Meseki a-Tubali. 4#Ezk 29:4; 23:12Njookupilusya, njoobika tulobyo mumalakwila aako akukugwisya, webo ampi yako yoonse, imbizi abasimabbiza, boonse balisamide zilwisyo zyoonse, makamu mapati aali azikwabilizyo antobo, boonse bajisi mapanga. 5Abalo ba-Persia aba-Kusi aba-Puti bali abo, boonse bali antobo angowani. 6#Matl 10:2; Ezk 27:14Ba-Gomeri amakamu aabo oonse, luzubo lwa-Togarima luzwa kumagolelo aakunyika amakamu aabo oonse, bantu banji bali ayebo.
7 #
Is 8:9
Amulibambe! Mutaleki kulibamba, yebo abantu boonse babungene kulinduwe, Koba mulindizi wabo. 8#Dt 4:30; Is 29:6; Ezk 34:13; 36:1; Jer 23:6Amane mazuba manji, muyooyobololwa, Kumamanino aamyaka uyoosika kukulwisya nyika iyakabukulusigwa munkondo, bantu nkobakabungene kuzwa kuzisi zinji atala azilundu zyaIsrayeli izyakali matongo lyoonse, Bantu bayo bakayobololwa kuzwa kulibamasi, lino sunu balikede caluumuno boonse. 9#Is 28:2; Jer 4:13Uyoosika mbuli iguwo, uyooza mbuli ijoba livumba nyika, yebo amakamu aako oonse abantu banji mboli abo.
10Mbuboobu mbwaamba Mwami Jehova. Mubuzuba obo makani ayoobuka mumoyo wako, nkabela uyooyeeya miyeeyo mibi, 11#Bab 18:7-27akwaamba kuti, Njiinke kunyika yaminzi iitajisi mabaya, nkalwisye bantu batontwede bakede caluumuno, batakwe malambo naaba mankolo neziba zitendele; 12nkasaale imbono akunyanzya buvubi; nkalwisye matongo aayakulwidwe, bantu nkobayobolwedwe kuzwa kulibamasi, nkobajene iŋombe ambono, bakede muntinti yanyika. 13#Ezk 27:22; 19:3,5Seba a-Dedani abasambazi baku-Tarisi, atunzuunzi toonse, boonse bayookubuzya kuti, Sa weza kusaala imbono? Sa wayobolola makamu makamu aako kukunyanzya buvubi, kukutola insilva angolida, kukutola iŋombe ambono, akukusaala zintu zinji?
14 #
Is 4:1
Nkaambo kako, mwana amuntu, sinsima akwaambila Gogo kuti, Mbuboobu mbwaamba Mwami Jehova. Mubuzuba obo, bantu bangu ba-Israyeli nebanooyookede caluumuno, uyoobuka, 15#Ezk 39:2akuboola kuzwa kucisi cako cakumagolelo aakunyika, yebo abantu banji mboli abo, boonse balitantide ambizi, makamu makamu aabantu, impi impati loko. 16#Kul 14:4Uyoosika kukulwisya bantu bangu ba-Israyeli mbuli ijoba livumba nyika. Kumamanino aaciindi njookuleta kukulwisya nyika yangu, kuti bamasi bandizibe nenzoolemekwa mumeso aabo mumakani aako, O Gogo.
17Mbuboobu mbwaamba Mwami Jehova. Sa teensi nduwe ngundakaamba mumazuba aakamana kumilomo yabalanda bangu basinsimi ba-Israyeli? Mumazuba ayo bakali kusinsima lyoonse kuti njookuleta kukulwisya. 18Pele mubuzuba obo, Gogo naazoosika kukulwisya nyika ya-Israyeli, mbwaamba Mwami Jehova, bukali bwangu buyoobuka. 19#Dt 29:20; Is 42:13; Ezk 36:5,6; Joel 2:18; Int 89:46; Hag 2:6,7Nkaambo ndaamba mubbivwe lyangu amubukali bwangu bupisya, ndati, Ncobeni mubuzuba obo kuyooba kukankama kuyoosya munyika ya-Israyeli. 20#Hos 4:3; Jer 4:24Inswi zyamulwizi, abayuni bakujulu, abanyama bamusokwe, abauka boonse bayavula ansi, abantu boonse bakede anyika, boonse buyo bayookankama kubusyu bwangu. Azyalo zilundu ziyoomwayigwa, amandomba aakumajenga ayookolomoka, amalambo oonse ayoowida ansi. 21#Int 105:16; Hos 9:3; Bab 7:22; 1 Sam 14:20Njoomuletela ziyoosyo zyamisyobo misyobo, mbwaamba Mwami Jehova, nkabela ipanga lyamuntu umwi aumwi liyoolwisya mweenzinyina. 22Njoomubeteka amalwazi abulowa. Njoomuwisizya imvula yamucobocobo acivulamabwe, mulilo asulufa, walo amakamu makamu aakwe abantu banji boonse mbali abo. 23Mbuboobo mbonjoolemezegwa akusalazigwa akuzibwa mumeso aabamasi, nkabela bayooziba kuti ndime Jehova.
Currently Selected:
Ezekieli 38: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
