Kulonga 3

Leza mbwaakalibonya kuli-Musa ku-Horebu

1 # 1 Bam 19:8 Lino Musa wakali kweembela imbelele zya-Jetero syanyinazyala, mupaizi wa-Midyani, nkabela wakasisya imbelele zyakwe kumbo lyankanda, wasika ku-Horebu, cilundu ca-Leza. 2#Inc 7:30-34; Dt 33:16; Is 63:9Nkabela angelo waJehova wakalibonya kulinguwe mumabangabanga aamulilo muciteo. Lino wakabona kuti citeo kaciyaka amulilo, nekubaboobo citeo kacitapyi. 3#Int 111:2Mpawo Musa wakati, Njiinke kuyoobona malweza aya mapati. Nkaambonzi citeo tacipyi, 4#Dt 33:16Elyo Jehova naakabona ulainka kuyoobona, Leza wakamwiita kuzwa mukati kaciteo, wati, Musa, Musa, Wakati, Mpondi. 5#Jos 5:15Wakati, Utasweni afwiifwi okuno pe, Samununa insangu zyakumaulu aako, nkaambo antu awa mpoimvwi mbusena busalalisya. 6#Matl 28:13; Mk 12:26; Is 6:1,5; Ciy 1:17Alimwi wakati, Ndime Leza wabamauso, Leza wa-Abrahamu a-Leza wa-Isaka, a-Leza wa-Jakobo. Mpawo Musa wakalivumba kumeso, nkaambo wakayoowa kulanga Leza.

7 # Matl 18:21 Lino Jehova wakaamba kuti, Ncobeni ndibwene mapenzi aabantu bangu bali mu-Egepita. Ndimvwide mbubalila nkaambo kabaabo bababelesya. Ndizi buusu bwabo mbobubede, 8#Matl 11:5; Kul 12:51; Dt 1:25; My 13:27lino ndaseluka kuzoobavuna mumaanza aaba-Egepita akubapozya munyika eyo, mbatole kunyika imbotu iikwazeme, kunyika iikunka malili abuci, nkobabede ba-Kanana aba-Hiti aba-Amori aba-Perizi aba-Hivi aba-Jebusi. 9#Kul 1:11Lino bona! Kulila kwabana ba-Israyeli kwasika kulindime, alimwi ndibwene mafwabi ngebabafwabya ba-Egepita. 10#Int 105:26; Mik 6:4Lino koya. Ndakutuma kuli-Farao, ukapozye bantu bangu ba-Israyeli kuzwa ku-Egepira, 11#1 Sam 18:18; 1 Bam 3:7-9; Is 6:5,8; Jer 1:6Pele Musa wakaambila Leza kuti, Ma! Mebo inga ndainka buti kuli-Farao? Ingandapozya buti bana ba-Israyeli kuzwa ku-Egepita? 12#Matl 31:3; Dt 31:23; Jos 1:5; Is 43:2; Rom 8:31Wakati, Ncobeni ndaba ayebo. Lino nceeci citondezyo cakuti ndime ndakutuma. Wapozya bantu kuzwa ku-Egepita, muzoobelekela Leza milimo mpoonya ano acilundu ecino.

13 # Kul 6:2-3; Matl 32:29 Lino Musa wakaambila Leza kuti, Nenjoosika kubana ba-Israyeli akubaambila kuti, Leza wabamausowanu wandituma kulindinywe, ambweni bakandibuzye kuti, Ngwani izina lyakwe? Nkabavwiile buti? 14#Ciy 1:4,8; Kul 6:3; Joh 8:58; Heb 13:8Mpawo Leza wakaambila Musa kuti, NDIME UULIWO LYOONSE. Wakati, Mbuboobu mboelede kwaambila bana ba-Israyeli, NDIME ngowakandituma kulindinywe. 15#Int 135:13; Hos 12:5Alimwi Leza wakaambila Musa kuti, Mbuboobu mboelede kwaambila bana ba-Israyeli, Jehova Leza wabamausowanu, Leza wa-Abrahamu, Leza wa-Izaka, Leza wa-Jakobo, wandituma kulindinywe, Ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani. 16#Matl 48:15; 50:24; Kul 2:25; 4:31; Dt 26:7; Int 80:14; Lk 1:68Koya, ukabunganye bapati baba-Israyeli, ukabaambile kuti, Jehova Leza wabamausowanu wandibonekela, Leza waAbrahamu a-Izaka a-Jakobo, wati, Ncobeni ndimubwene mbomucitilwa mu-Egepita. 17#Matl 15:14Lino ndaamba kumugwisya mumapenzi aaku-Egepita, ndimutole kunyika yaba-Kanana ayaba-Hiti ayaba-Amori ayaba-Perizi ayaba-Hivi ayaba-Jebusi, kunyika iikunka malili abuci. 18#My 23:3Lino bayooswiilila ijwi lyako, nkabela mukaye kumwami wa-Egepita, yebo abapati ba-Israyeli, mukamwaambile kuti, Jehova Leza waba-Hebrayo waswanaana aswe. Lino twakumbila kuti utuleke, tutole lweendo lwamazuba otatwe kuya munkanda, tukapailile Jehova Leza wesu. 19Ndizi kuti mwami waEgepita takooyoomuzuminina kuya, pe, cita asinikizigwe ajanza ijumu. 20#Kul 7:3; 12:31; Dt 6:22; Neh 9:10; Int 105:27; 135:9; Jer 32:20; Inc 7:36Aboobo njootandabika ijanza lyangu akuuma ba-Egepita amalweza aangu oonse ngenti cite akati kabo. Musule lyayaayo uyoomuzumizya kuya. 21#Kul 11:3; 12:35-36; Int 106:46; Tus 16:7Lino njoocita kuti aba bantu bafwidwe luzyalo mumeso aaba-Egepita, nkabela mukwiinka kwanu tamukooyooinka acinkwamaanza pe. 22#Matl 15:14; Kul 11:2; Job 27:17; Tus 13:22; Ezk 39:10Mwanakazi uyookumbila kumweenzinyina akuliyooyo uukala-kala muŋanda yakwe kuti amupe zibelesyo zyansiliva, azibelesyo zyangolida, azyakusama; elyo muyoozisamika bana banu balombe abasimbi, aboobo muyoosaala ba-Egepita.

Currently Selected:

Kulonga 3: Ibbaib63

Highlight

Copy