Deuteronomo 6

Musa mbwaakakombelezya bantu kujatisya imbeta zya-Jehova

1Njeeyi milazyo amalailile ambeta Jehova Leza wanu njaakandilailila kumwiiyisya, kuti mwiicite munyika eyo yamutala njemuyoovuba, 2#Kul 20:2-20; Int 111:10; 128:1; Muk 12:13; Tus 3:1kuti muyoowe Jehova Leza wanu, mubambe imbeta zyakwe zyoonse amilazyo yakwe yoonse njendamulailila, nywebo abana banu abana babana banu, mazuba oonse aabuumi bwanu, kuti muongole. 3Amuswiilile makani, noba-Israyeli, mucenjele kuzicita, kuti mukale kabotu akuzyalisya, mbubonya mbuli Jehova Leza wabamauso mbwaakasyomezya, munyika eyo iikunka malili abuci.

4 # Mk 12:29; Is 9:6; Joh 1:1; 10:30; 17:3; 1 Kor 8:4; Ef 4:6; Flp 2:5,6 Swiilila, O Israyeli, Jehova ngu-Leza wesu, Jehova ngumwi. 5#Mt 22:37; Mk 12:30-32; Lk 10:27; Dt 30:6; 1 Joh 5:3Uleelede kuyandisya Jehova Leza wako amoyowako woonse, amuuya wako woonse, anguzu zyako zyoonse. 6#Dt 11:18-20; Is 51:7Nkabela aya majwi ngendamulailila buzuba obuno abe amyoyo yanu. 7#Ef 6:4Muleelede kwaaiyisya bana banu, akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka. 8#Tus 6:21; Kul 13:9; Tus 3:3; 7:3Amwaange mbuli citondezyo kumaanza aanu ambuli ciibalusyo akati kameso aanu. 9#Dt 11:20; Is 50:8; 57:8Amwaalembe azikunguzyo zyamaanda aanu akuzitendele zyanu.

10 # Matl 12:7; 26:3; 28:13; Jos 24:13; Int 105:44 Lino Jehova Leza wanu naayoomusisya kunyika eyo njaakakonkezya kulibamauso, Abrahamu a-Izaka a-Jakobo, kumupa, kuminzi mibotu mipati njemwatakayaka, 11kumaanda aazwide zintu zibotu ngemwatakazuzya, kuzikala zisidwe nzemwatakasya, kumyuunda yamasaansa ayamaolifa njemwatakabyala, lino nemuyoolya akukuta, 12amucenjele kuti mutalubi Jehova iwakamugwisya munyika ya-Egepita amuŋanda yabuzike. 13#Mt 4:10; Lk 4:8; Dt 13:4; Int 63:11Amuyoowe Jehova Leza wanu, amumumanine milimo, amukonke muzina lyakwe. 14#Jer 25:6Mutatobeli baleza bambi, baleza babamasi bamuzyungulukide, 15nkaambo Jehova Leza wanu uukede akati kanu ngu-Leza sibuzuba; kuti bukali bwa-Jehova butamubukili, atamunyonyooni ansi. 16#Kul 17:1-7; Mt 4:7; Lk 4:12; 1 Kor 10:9Mutasunki Jehova Leza wanu, mbuli mbumwakamusunka ku-Masa. 17#Int 119:4Amucenjele loko kuti mubambe milazyo ya-Jehova Leza wanu, amilao yakwe, ambeta zyakwe nzyaakalailila. 18Amucite ziluleme azibotu kumeso aa-Jehova, kuti mukale kabotu, munjile akuvuba nyika imbotu Jehova njaakasyomezya bamauso, 19mutande basinkondonyoko boonse kubusyu bwanu, mbubonya mbuli Jehova mbwaakaamba.

20Lino mumazuba aaboola, bana banu nibayoomubuzya kuti, Nkutyeni milao amilazyo ambeta Jehova Leza wesu nzyaakatulailila? 21muleelede kuvwiila bana banu kuti, Twakali bazike ba-Farao mucisi ca-Egepita, elyo Jehova wakatugwisya mu-Egepita ajanza ijumu. 22Jehova wakacita zitondezyo amaleele, makani mapati aayoosya, mucisi ca-Egepita, kuli-Farao akuluzubo lwakwe loonse, mumeso esu. 23Elyo wakatupozya nkukonya oko, kuti atunjizye akutupa nyika njaakasyomezya bamatateesu. 24#Job 35:7,8; Jer 32:39; Int 41:2; Lk 10:28Nkaambo kako Jehova wakatulailila kubamba imbeta eti zyoonse, tuyoowe Jehova Leza wesu, kuti tukale kabotu mazuba conse, atuponye mbubonya mbuli sunu. 25#Rom 10:3Bulaba bululami bwesu na twacenjela kucita eyi milao yoonse kunembo lya-Jehova Leza wesu, mbubonya mbwaakatulailila.

Currently Selected:

Deuteronomo 6: Ibbaib63

Highlight

Copy