Incito 18

Paulo mbwaakacita mu-Korinto

1Munsi lyakooko Paulo wakazwa mu-Atene, wainka ku-Korinto, 2Oko wakaakujana mu-Juda uutegwa Akula, mu-Ponto, uwakazwa akuzwa ku-Italiya a-Priskila mukaintu wakwe, nkaambo Klaudiyo wakali kulailide kuti ba-Juda boonse bamu-Roma bazwe. Wakainka kulimbabo, 3Eno mulimo wabo mbuwali umwi, wakakala abo, babeleka, nkaambo bakali baluki bamatente kumulimo wabo. 4Wakakambauka mucikombelo amumaSabata oonse, ukombelezya ba-Juda aba-Helene.

5Elyo nobakasika ba-Sila a-Timoteo kuzwa ku-Makedoniya, Paulo wakanjidwe makani, wakabalungulwida ba-Juda kuti Jesu ngu-Kristo. 6Pele nobakakazya akusampaula wakakunkumuna zyakusama zyakwe, wati kulimbabo, Bulowa bwanu abube atala amitwe yanu, ndasalala mebo, ukuzwa sunu ndaya kulibamasi. 7Wakazwa awo wakanjila muŋanda yamwaalumi uukomba Leza uutegwa Tito Justo, iŋanda yakwe yakali kubambene acikombelo, 8Awalo Krispo, mupati wacikombelo, wakasyoma ku-Mwami antoomwe abeŋanda yakwe boonse. Abalo banjibanji baba-Korinto abakaswiilide bakasyoma, babapatizigwa. 9Nkabela masiku Mwami wakaambila Paulo mucilengaano kuti, Utayoowi, pele kocaamba, utaumuni, 10nkaambo ndili ayebo, taakwe muntu uuti kubukile, akubisye, nkaambo ndijisi bantu banjibanji mununzi muno, 11Elyo wakakala omo mwaaka emyeezi iili musanu muumwi, ulaiisya makani aa-Leza akati kabo.

12Eno Galiyo naakali mweendelezi waku-Akaya, ba-Juda bakamubukila Paulo amoyo omwe, bamutola kulubeta, 13bati, Oyu muntu usungilizya bantu kukomba Leza kuciyanza icaandeene amulao. 14Kwalo Paulo naati kaambe, Galiyo wakati kuba-Juda, Nywebo noba-Juda, makani aya anooli aakubisya na aamaanu mabi nenjeelede kumuswiilila, 15pele anooli aakukazyanya amajwi, amazina, amulao wanu, amulibonene nobeni kulingao, nsiyandi kubeteka ayo mebo. 16Nkabela wakabatanda kulubeta, 17Mpoonya awo boonse bakajata Sostene, mupati wacikombelo, bamuuma mubbetekelo. Pele Galiyo katakwe makani azintu ezyo zyoonse pe.

Paulo mbwaakabweeda ku-Antiokeya, aku-Galatiya aku-Frigiya

18Paulo naakacikede oko mazuba manjimanji, nkabela wakalaya babunyina, wainka abwaato kuya ku-Suriya, antoomwe a-Priskila a-Akula, Mutwe wakwe wakalinyweedwe mu-Kenkreya, nkaambo kakulyaanga kuli-Leza, 19Bakasika ku-Efese, awo wakabasia, walo wanjila mucikombelo, wabandika aba-Juda. 20Nobakamukombelezya kuti akale abalo kaindi, takazuminide, 21pele wakabalaya wakati, Ncobeni ndileelede kusika kumubungano uuza mu-Jerusalemu, kwalo ndizooboola kulindinywe, na Leza wayanda, Elyo wakazwa mu-Efeso abwaato. 22Naakazubukila ku-Kaisareya, wakaakwaanzya mbungano, nkabela wakaselemukila ku-Antiokeya. 23Naakakala oko kaindi wakainka, waandulula cisi ca-Galatiya eca-Frigiya, uya buyumya basikwiiya boonse.

Imilimo ya-Apolo

24Elyo kwakasika ku-Efeso mu-Juda umwi uutegwa Apolo, mu-Alesandreya, mwaalumi uuide, wali singuzu mu-Magwalo. 25Oyu muntu wakaiisigwa nzila ya-Mwami, eno nkaambo kakupya kwamoyo wakwe, wakakambauka akwiisya kabotu makani aa-Jesu, wakalizi lubapatizyo lwa-Johane buyo. 26Walo wakatalika kukambauka ecamba mucikombelo. Pele ba-Akula a-Priskila nobakamumvwa, bakamutola kulimbabo, bamupandulwida kabotu nzila ya-Leza. 27Limwi, naakakanza kuzubukila ku-Akaya, babunyina bakamuyumya, balembela basikwiiya kuti bamutambule. Naakasika wakabagwasya kapati abo abakasyoma muluzyalo lwa-Leza, 28nkaambo ba-Juda wakabazunda enguzu mukati kabantu, ulatondezya a-Magwalo kuti Jesu ngu-Kristo.

Currently Selected:

Incito 18: Ibbaib63

Highlight

Copy