Incito 17

Mbobakacita ku-Tesalonika

1Nobakainda mu-Amfipoli amu-Apoloniya, bakasika ku-Tesalonika, ukwakali cikombelo caba-Juda, 2Eno Paulo, mbuli mbwaakazibide, wakanjila kulimbabo, Ma-Sabata otatwe wakabandika abo makani aaMagwalo, 3ulapandulula akutondezya kuti Kristo wakeelede kupenga akubuka kubafu. Alimwi wakati, Oyu Jesu ngwemwaambila, ngonguwe Kristo. 4Nkabela bamwi babo bakasyoma, basangana aba-Paulo a-Sila, abanjibanji kuba-Helene abakomba, abakaintu balemu abatali bace. 5Kwalo ba-Juda mbobakaba abbivwe, bakatolelela abamwi beendeendi bapelenge, balibunga nkamu, bapyopyonganya munzi, nkabela bazingana ŋanda ya-Jasoni, bayanda kubatola kulibasicisi, 6Nobatakabajana ba-Paulo a-Sila, bakakwelela Jasoni abamwi babunyina kubeendelezi bamumunzi, baloompolola kuti, Abo abasandamuna nyika basika akookuno, 7mbaatambula Jasoni. Abo boonse basotoka milao ya-Kaisara, balati, Kwali umwi mwami uutegwa Jesu. 8Makani ayo akazinga bantu abeendelezi bamumunzi, nobakaamvwa. 9Nkabela nobakatola cilesyo kuli-Jasoni akubeenzinyina, bakabaleka.

Mbobakacita ku-Bereya

10Ndilyonya masiku babunyina bakatuma ba-Paulo a-Sila ku-Bereya. Balo nobakasika oko, bakanjila mucikombelo caba-Juda. 11Abakooko bakaliluleme kwiinda abo baku-Tesalonika, nkaambo bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi mbozibede. 12Nkaako banjibanji babo bakasyoma, abalo banjibanji baba-Giriki, bakaintu balemu abaalumi. 13Kwalo ba-Juda baku-Tesalonika nobakaziba kuti Paulo ukambauka ijwi lya-Leza ku-Bereya, bakasika akwalo kuzookopenganya akupenzya makamu makamu aabantu. 14Ndilyonya babunyina bakatuma Paulo kuti ainke mane kusikila kulwizi, pele ba-Sila a-Timoteo bakasyaala oko. 15Pele abo abakasindikila Paulo bakamusisya ku-Atene, Nkabela nobakaambilwa kuti bakaite ba-Sila a-Timoteo kuti bafwambaane kuboola kulinguwe, bakainka.

Paulo mbwaakacita ku-Atene

16Paulo naakali kubalindila mu-Atene, moyo wakwe wakaata mucamba cakwe naakabona munzi uzywide zikozyano zyamizimo. 17Aboobo mucikombelo wakabandika aba-Juda abaabo abakomba, akwalo kucisambalilo wali kubandika mazuba oonse abantu mbaali kuswaana nkuko. 18Abalo basongo bamwi baba-Epikureya ababa-Stoiki bakamujanikizya. Bamwi bati, Ino oyu mubwelebwezi uambanzi? Bamwi bati, Ubaanga mukambausi wamizimo iitazibwa, Bakaamba obo nkaambo wakakambauka Jesu akubuka kwabafu. 19Nkabela bakamujata, bamutola kunkuta yamu-Atene balati, Sena inga ulatuzibya oku kwiisya kupya nkokambauka ankuko? 20Nkaambo waleta makani meenzu kumatwi eesu, Nkaako ncotuyanda kuziba mbwaabede aya, 21Eno boonse bamu-Atene abalo bamasi abakakede oko tabakali kujisi ciindi, pele cakwaamba acakuswiilila buyo makani mapya. 22Nkabela wakaima mukati kenkuta wati:

Nobaalumi bamu-Atene, kulizyoonse ndabona kuti mukombesya mizimo, 23Nkaambo nendakali kuya bwiinda akweebela nzomukomba, ndakabona acalo cipaililo icilembedwe kuti, ECI NCICA-LEZA UUTAZIZILWE, Eno oyo ngomukomba cakutamuziba, ngonguwe ngwemwaambila. 24Leza uwakalenga nyika azintu zyoonse izili mumo, oyu mbwali Mwami wejulu enyika, takali muzikombelo zicitwa amaanza. 25Alimwi tabelekelwi maanza aabantu, tali uubula cintu pe, nkaambo ngonguwe mwini nguubapa boonse buumi, amuuya, azintu zyoonse. 26Wakaacita masi oonse aabantu kukulengwa komwe, kuti akale munyika yoonse, Wakabika ziindi nzyaakaabilwa aminyinza yamakalo aao. 27Kayanda kuti bamuyandaule Leza, kuti kukumwaampasya ambweni balamujana, nokubaboobo tali kule kuluumwi umwi wesu. 28Nkaambo mulinguwe motupona, motuputa, motubede, mbubonya mbobakaamba bamwi balembi banu kuti, Aswebo tuli bana bakwe. 29Eno mbotuli bana ba-Leza, tatweelede kucita anga Leza ulakozyanisigwa engolida, niiba nsiliva, neliba ibbwe, izyakabezwa abuuza amaanu aamuntu. 30Ziindi ezyo zyakutaziba Leza wakazileka buyo, kwalo sunu ulailila bantu kuti kumasena oonse boonse basanduke, 31nkaambo wabika buzuba mbwati kabeteke nyika mubululami, kumwaalumi oyo ngwasungwide. Wakabapa bantu boonse cisinizyo camakani ayo mbwaakamubusya kubafu.

32Eno nobakamvwa makani aakubuka kwabafu, bamwi bakasabula, bamwi bakati, Tuyookumvwa alimwi amakani aya. 33Aboobo Paulo wakazwa kulimbabo, 34Pele bamwi baalumi bakakakatila kulinguwe, basyoma. Akati kabo kwakali Dionisiyo mu-Areopagi, amukaintu uutegwa Damari, abamwi mbobakali abo.

Currently Selected:

Incito 17: Ibbaib63

Highlight

Copy