Incito 11

Petro mbwaakalyaambilila kubasyomi bamu-femsalemu

1Eno baapostolo ababunyina abali mu-Judaya bakamvwa kuti abalo bamasi bakatambula makani aa-Leza. 2Nkabela Petro naakasika ku-Jerusalemu, abo babupalule bakakazyanya anguwe, 3bati, Wakanjila kubaalumi abatapalwidwe, akulya abo. 4Petro wakatalika kubalungulwida kabotu wati, 5Ndakali mumunzi wa-Jopa, ndali kukomba. Mbwendaka-nyangidwe muuya ndakabona cilengaano, kwakaseluka cintu mbuli sila pati, ililengelezegwa kujulu ezyooko zyone, lyeza kulindime. 6Nendacilangisisya, ndeezeezya, ndabona banyama baansi abali amaulu one, abamusokwe, aboongoleka, abayuni bamujulu. 7Nkabela ndakamvwa ijwi liti kulindime, Buka, Petro, ujaye, ulye. 8Pele ndakateeti, Pe, O mwami, nkaambo cintu citondwa neciba cisofweede tacina kunjila mukanwa kangu. 9Alwabili ijwi ilizwa kujulu lyakavuwa kuti, Ncaakasalazya Leza utacaambi kuti cilatondwa, 10Eci cakaindwa totatwe, nkabela zyoonse zyakabweedezegwa kujulu. 11Ndilyonya baalumi botatwe bakasika kuŋanda motwakabede, bakazwa ku-Kaisareya, batumwa kulindime. 12Elyo Muuya wakandyaambila kwiinka abo cakutasalaula, Abaaba bakwesu abali musanu muumwi baka-ndisindikila, twakanjila muŋanda yamwaalumi oyo. 13Wakatwaambila mbwaakabona angelo muŋanda yakwe, uliimvwi, ulati, Tuma ku-Jopa, ulete Simoni uutegwa Petro, 14uzookwaambila majwi aakukufutula abeŋanda yako boonse. 15Eno nendakatalika kwaamba, Muuya Uusalala wakabawida mbuli mbowakatuwida lutaanzi. 16Ndilyonya ndakayeeya ijwi lya-Mwami lyakuti, Johane wakabapatizya amaanzi, pele nywebo muyoobapatizigwa a-Muuya Uusalala. 17Eno anooli Leza uwakabapa cipegwa eco nciconya ncaakatupa aswebo notwakasyoma ku-Mwami Jesu Kristo, ino obo ndimeni mebo kuti ndikazye Leza? 18Nobakamvwa obo bakaumuna, balemeka Leza bati, Abalo bamasi Leza wabapa kusanduka kuti bapone.

Milimo yaba-Juda aba-Giriki

19Eno abo bakamwaika nkaambo kamapenzi aakasika kuli-Stefano bakainka ku-Foinike, aku-Kupro, aku-Antiokeya, bali kuya bukambauka makani kuba-Juda balo, tabali kukambaukila bamwi pe. 20Kwalo bamwi babo, bantu baku-Kupro abaku-Kurene, nobakasika ku-Antiokeya, bakaamba kubaGiriki akwalo, bakambauka Mwami Jesu, 21Ijanza lya-Mwami lyakali abo, banjibanji abakasyoma bakasandukila ku-Mwami. 22Impuwo yabo yakamvwigwa kumbungano yaku-Jerusalemu, nkabela bakatuma Barnaba kuti ainke ku-Antiokeya, 23Naakasika akubona luzyalo lwa-Leza, wakabotelwa, wakabalaya boonse kuti bakakatile ku-Mwami emyoyo miyumu. 24Nkaambo wakali muntu mubotu, uuzywide Muuya Uusalala alusyomo. Elyo kwakayungizigwa bantu banjibanji ku-Mwami. 25Mpoonya Barnaba wakainka ku-Tarso, waakuyandaula Saulo. 26Naakaakumujana, wakamuJeta ku-Antiokeya, Mwaaka woonse bali kubungana embungano akwiisya bantu banjibanji. Nkonkuko ku-Antiokeya nkobakasaanguna kutegwa mba-Kristo,

27Mumazuba aya kwakasika ku-Antiokeya basinsimi abazwa ku-Jerusalemu. 28Kwakanyamuka umwi kulimbabo, uwali kutegwa Agabo, Muuya wamusinsimya kuti kuyoosika nzala mpati munyika yoonse. Njenjiyo yakasika kumazuba aa-Klaudiya. 29Nkabela basikwiiya, mbubonya mbwaali kukonzya umwi umwi kulubono lwakwe, bakasoleka kutumina cakugwasya kulibabunyina abakali mu-Judaya, 30bakacita mbubonya, bakatumina kubapati kumaanza aa-Banaba a-Saulo.

Currently Selected:

Incito 11: Ibbaib63

Highlight

Copy