Incito 10

Petro mbwaakakambaukila ba-Koneliyo

1Kwakaliko ku-Kaisareya mwaalumi uwali kutegwa Koneliyo, musunguli wenkamu yabasilumamba iitegwa ya-Italiya. 2Wakali muntu uukomba, uuyoowa Leza walo abeŋanda yakwe boonse, wakapa bantu zinjizinji zyaluzyalo, akukomba kuli-Leza lyoonse, 3Kuciindi kati kabe acilanga nkumo wakabonesya mucilengaano angelo wa-Leza ulanjila kulinguwe akumwaambila kuti, Koneliyo. 4Naakamulangisisya wakayoowa wati, Ncinzi, Mwami? Wavuwa kuti, Ukukomba kwako ezyaluzyalo zyako zyasika kujulu, nciyeezyo kumbele lya-Leza, 5Eno kotuma baalumi kuJopa, bakalete Simoni uutegwa Petro. 6Ukala kuli-Simoni musuki wamasalu. Iŋanda yakwe ili kumbali alwizi. 7Naakainka angelo uwali kwaamba kuli-Koneliyo, wakaita bazike bobile asilumamba uukomba, umwi wabaabo mbaakali abo lyoonse, 8amane kubalungulwida makani oonse wakabatuma ku-Jopa.

9Nobwakaca, nobakacili kuya bweenda akusika kufwaafwi kumunzi, Petro wakatanta atala aŋanda kuti akombe, kuciindi icati kabe amutwe esikati, 10Elyo wakafwa nzala, wayanda kulya, kwalo nobakacili kubamba cakulya wakanyangwa muuya. 11Wakabona ijulu lyaba bukwazi, ecintu cilaseluka iciba anga ndisila pati, calengelezegwa ansi ezyooko zyone, 12omo mwakali banyama boonse abali amaulu one, aboongoleka ansi, abayuni bamujulu. 13Nkabela kwakamusikila ijwi ilyati, Buka, Petro, ujaye ulye, 14Pele Petro wakati, Pe, O mwami, nkaambo nsinalide cintu citondwa na cisofweede. 15Alwabili kwakeza ijwi liti kulinguwe, Ncaasalazya Leza utacaambi kuti cilatondwa, 16Eci cakacitwa totatwe, ndilyonya cintu cakabweedezegwa kujulu.

17Petro naakacili kuzingidwe kuti citinzi eci cilengaano ncaabona, baalumi abakatumwa Koneliyo bakabuzya ŋanda ya-Simoni, baliimvwi amulyango, 18balaita akubuzya na mwali Simoni uutegwa Petro. 19Petro naakacili kweezeezya cilengaano Muuya wakati kulinguwe, Bona, bantu botatwe balakuyanda, 20Konyamuka useluke, uinke abo, utazululwi, nkaambo ndime ndabatuma, 21Ndilyonya Petro wakaselukila kubaalumi abo wakati, Ndime ngomuyandaula. Ino makaninzi ngomwazida? 22Balo bakati, Koneliyo, musunguli wabasilumamba, muntu uululeme uumuyoowa Leza, uulumbaizigwa cisi coonse caba-Juda, wakalaililwa angelo uusalala kuti akwiitile kuŋanda yakwe, aswiilile makani kulinduwe. 23Aboobo wakabanjizya muŋanda akubayalila.

Nobwakaca Petro wakanyamuka akwiinka abo, bamusindikila babunyina bamwi bamu-Jopa. 24Nobwakaca bakanjila mu-Kaisareya. Koneliyo wakali kubalangila mbwaakaita basazinyina abeenzinyina benibeni, 25Eno Petro naakanjila, Koneliyo wakamucinga, wakawida kumatende aakwe akumukomba. 26Pele Petro wamubusya wati, Ima, amebo ndi muntu buyo, 27Nkabela wakanjila ulaambaula awalo, wakajana banjibanji bali kubungene. 28Wakati kulimbabo, Nywebo nobeni mulizi mbokutondwa kumuntu muJuda kuti aswaangane awamasi, aboole kulinguwe, kwalo Leza wakanditondezya kuti entaambi muntu kuti ulatondwa na ulisofweede, 29aboobo mbwendakatuminwa, ndasika cakutanyonauka. Ndabuzya, Ncinzi ncomwanditumina? 30Koneliyo wakati, Mazuba one aakainda mbuli cino ciindi ndakali kuliimya kulya, ndali kukomba muŋanda yangu kuciindi cacilanga nkumo, nkabela kumbele lyangu kwakaima mwaalumi uusamide cakusama cinyengema. 31Wakati, Koneliyo, kwamvwigwa kukomba kwako, ezyaluzyalo zyako zyayeeyegwa kuli-Leza. 32Aboobo kotuma ku-Jopa, uliitile Simoni uutegwa Petro, ukede muŋanda ya-Simoni musuki wamasalu, kumbali alwizi. 33Nkaambo kaako ndafwamba kukutumina, wacita kabotu yebo mboosika. Eno motubede toonse kubusyu bwa-Leza, kuti tumvwe makani oonse ngoolaililwa ku-Mwami, 34Mpoonya awo Petro wakajula mulomo wakwe wati:

Nkasimpe ndabona kuti Leza talangi ciimo camuntu, 35pele mumasi oonse uumuyoowa akucita bululami ulatambulwa kulinguwe, 36Makani ngaakatuma kubana ba-Israyeli, naakakambauka Makani Mabotu aaluumuno muli-Jesu Kristo (ngo-Mwami waboonse), 37ayo makani mulyeezi, aakaambwa mu-Judaya moonse, kusaanguna ku-Galilaya, munsi lyalubapatizyo ndwaakakambauka Johane. 38Ngaa-Jesu wa-Nazareta, mbwaakamunanika Leza a-Muuya Uusalala enguzu. Valo wakali kuzelengana kucita zibotu, akuponya boonse abalyatidwe Saatani, nkaambo Leza wakali awe. 39Aswebo tuli bakamboni bazintu zyoonse nzyaakacita mucisi caba-Juda amuJerusalemu, ngobakajaya, bamwaanzika acisamu. 40Oyo, Leza wakamubusya kubuzuba bwatatu, wakamutondezya kubantu, 41takuli kubantu boonse pe, pele kulibakamboni abakasalidwe Leza, kulindiswe totwakali kulya akunywa awalo kabukide kale kubafu. 42Elyo wakatulailila kuti tukambaukile bantu, tulungulule kuti ngonguwe uwakabikwa Leza kuti abe mubetesi wabaumi abafwide, 43Basinsimi boonse balasinizya anguwe kuti boonse abamusyoma balajatilwa zibi muzina lyakwe.

44Petro naakacili kwaamba majwi aya Muuya Uusalala wakabawida boonse abakaswiilila makani. 45Eno basyomi bapalule abakeza a-Petro bakagambwa kuti abalo bamasi bapegwa Muuya Uusalala. 46Nkaambo bakabamvwa balaamba emilaka, balalemeka Leza. Ndilyonya Petro wakavuwa wati, 47Sena kuli muntu uuti kasye maanzi kuti aba batabapatizigwi, abapegwa Muuya Uusalala mbuli ndiswe? 48Nkabela wakabalailila kuti babapatizigwe muzina lya-Jesu Kristo. Elyo bakamukumbila kuti akale abo kaindi.

Currently Selected:

Incito 10: Ibbaib63

Highlight

Copy