1 Ba-Tesalonika 2

Ulaamba aamilimo yakwe akati kabo

1 # 1 Tes 1:5,9; 2 Tes 3:7 Mulizi nobeni, nobakwesu, kuti kuswaya kwesu kulindinywe teekwakali kwabuyo. 2#Inc 16:19-24; 17:1-9Nokuba kuti twakapenzegwa kale akucitilwa bubi ku-Filipi, mbomuziba, twakaba akaanzambwene muli-Leza wesu kumwaambila Makani Mabotu aa-Leza akati kankondo zinjizinji. 3Nkaambo kukombelezya kwesu takuli kwakubeja nanka kwabubi nanka kwakweena-ena, 4#Jer 11:20; Gal 1:10; 1 Tim 1:11pe, pele mbuli mbotwakasunkwa kuli-Leza akusyomenwa milimo ya-Makani Mabotu, tulaamba mbubonya, Tatubotezyi bantu, pe, tulabotezya Leza, nguwenya uusunka myoyo yesu. 5#Inc 20:33; Mk 12:40; 2 Pet 2:3Ikuti tatukwe notwakaamba majwi aakutembaulatembaula (mulizi obo), nanka kuba abuliinsyo bwakulikumbuzya (Leza ngukamboni wesu kumakani aya), 6#Joh 5:41,44alimwi tatukwe notwakaliyandawida bulemu kubantu, nokuba kulindinywe nokuba kulibamwi (nokuba kuti twakalikweelede kulibika bulemu ambuli baapostolo ba-Kristo). 7Twakaba batete myoyo akati kanu, mbuli uunyonsya mbwabukata bana bakwe mwini. 8Lino mbuli mbotwakali kumusukamina, cintu ncitwakali kuyanda kumwaabila kaciteensi Makani aa-Leza luzutu pele amyoyo yesu tubeni, nkaambo mwakali bayandwi besu, 9#1 Kor 4:12; Inc 20:34Mulaibulukwa, bakwesu, milimo yesu amaminwa esu, ikuti eco ciindi ncitwakali kumukambaukila Makani aa-Leza, twakali kubeleka lyoonse, isikati amasiku, kuti tutalemeni muntu naba omwe akati kanu, 10Muli bakamboni, alakwe Leza ngukamboni, mbotwakalicita cakusalala acakululama acakutaba akaambo kulindinywe nobasyomi, 11#Inc 20:31Mulizi kuti twakamucitila umwi aumwi mbuli wisi mbwacitila bana bakwe. Twakali kumukombelezya akumusenengezya akumulungulwida, 12#Ef 4:1; Flp 1:27; 2 Tes 1:5; 1 Pet 5:10kuti mweende munzila iielede kumeso aa-Leza iwakamwiitila bulemu bwakwe abwami bwakwe.

13 # 1 Tes 1:2; Gal 1:11; 2 Tes 2:13 Acimwi cintu ncotumulumbila Leza cakutaleka nceeci. Ciindi ncimwakatambula makani aa-Leza ngomwakamvwa kulindiswe, tamukwe mwakaatambula mbuli makani aabantu, mwakaatambula mbuli mbwaabede ncobeni, nkukuti mbuli makani aa-Leza aali anguzu zyakubelekabeleka mumyoyo yanu nobasyomi. 14#Inc 17:5Nkaambo nywebo, nobakwesu, mwakaba abatobela imbungano zya-Leza zyamu-Judaya mwa-Jesu Kristo, ikuti mwakapenzegwa kulibasimusyobonyokwe mbubonya mbuli mbobakapenzegwa abalo kuba-Juda, 15#Inc 2:23; 7:52; 9:23,29; 13:45,50; 14:2,5,19; 17:5,13; 18:12Aba ba-Juda bakajaya Mwami Jesu abasinsimi, alimwi bakatutanda aswebo. Tababotezyi Leza, pe, balakazyanya abantu boonse, 16#Matl 15:16; Mt 23:32,33nkabela balatucelezya kwaambila bamasi makani aalufutuko, aboobo balazuzya zibi zyabo. Pele basikilwa bukali bwakuya kumamanino.

Ulabaambila mbwayanda kubabona

17 # Rom 1:11,13 Pele swebo, nobakwesu, mbomwakatukozya bukata kaindi kaniini (nkaambo teemwakaliko kumeso, nekubaboobo mwakacili mumyoyo yesu), twakasungwaala loko kumubona kumasyu, twakali kuyandisya boobo. 18Nkabela twakakanza kuboola kuzoomuswaya, mebo nde-Paulo ndakakanza lomwe, pe, tobile, pele Saatani wakatukasya. 19#Flp 2:16; 4:1; 2 Tes 1:4Nkaambo ninzi bulangizi bwesu alukondo lwesu amusini wesu wakulikankaizizya kubusyu bwa-Mwami wesu Jesu Kristo kukuboola kwakwe? Sa teensi ndinywe na? 20Ii mbokubede, ndinywe bulemu bwesu alukondo lwesu.

Currently Selected:

1 Ba-Tesalonika 2: Ibbaib63

Highlight

Copy