1 Bami 8
8
Ibbokesi lyacizuminano ca-Jehova mbulyakabikwa muŋanda
1 #
My 10:33; 2 Sam 6:17; 1 Bam 3:15; 15:3; 2 Sam 5:7 Elyo Solomoni wakayobolola bapati ba-Israyeli abasilutwe bamikowa yoonse, basololi banzubo babana ba-Israyeli, kumwami Solomoni mu Jerusalemu, kuti balete ibbokesi lyacizuminano ca-Jehova kuzwa kumunzi wa-Davida, ngonguwo Zioni. 2#Lev 23:34; Dt 16:13; 2 Mak 7:8Nkabela bantu boonse ba-Israyeli bakayoboloka kuli-Solomoni mwami kupobwe lyamumwezi wa-Etanimu, nkukuti mwezi wamusanu aibili. 3#My 4:15; Dt 31:9; Jos 3:3,6; 6:4; 1 Mak 15:14Bapati boonse ba-Israyeli bakasika, elyo bapaizi bakabweza Ibbokesi. 4#1 Bam 3:4; 2 Mak 1:3Nkabela bakaleta ibbokesi lya-Jehova atente lyakubunganina azibulo zyoonse zisalala zyamutente, Bapaizi aba-Levi mbebakazileta. 5Lino mwami Solomoni, ambungano yoonse yaba-Israyeli ibakayoboloka kulinguwe, bakali awe kunembo lyabbokesi, balapaizya imbelele abasune banji loko. Mweelwe wabanyama kuutabaliki nikuba kweelekwa. 6#Kul 26:33; 1 Bam 6:27Mpawo bapaizi bakaleta ibbokesi lyacizuminano ca-Jehova kubusena bwalyo mucikombelo camukati caŋanda, mubu sena busalalisya, munsi lyamababa aabakerebimu. 7Nkaambo bakerebimu bakalitandabikide mababa aabo abusena aabbokesi, Bakerebimu bakali kuvumba ibbokesi azisamu zyalyo zyoonse. 8#Kul 25:14; 2 Mak 5:9Zisamu zyakalampisya, aboobo impela zyazyo zyakali kulibonya kubusena busalalisya kunembo lyacikombelo camukati, pele teezyakali kuboneka anze. Asunu mpozicili mpoonya awo. 9#Kul 25:21; Dt 10:2,5; Heb 9:4; Kul 40:20; 34:27; Dt 4:13Nkabela mubbokesi taakwe icakali mo cita mabwe obile Musa ngaakabika mumo ku-Horebu, nkonkuko Jehova nkwaakatangana cizuminano abana ba-Israyeli nibakazwa kucisi ca-Egepita. 10Lino bapaizi nibakazwa mubusena busalalisya, ijoba lyakazuzya iŋanda ya-Jehova, 11mane bapaizi bakakacilwa kwiimikila kubeleka nkaambo kajoba, nkaambo bulemu bwa-Jehova bwakazuzya iŋanda ya-Jehova.
12 #
Lev 16:2; Int 18:11; 97:2 Mpawo Solomoni wakati, Jehova nguwakabika izuba kujulu, pele walo mwini wayeeya kukala mumudima uusiya mbi. 13#Int 132:14; Joh 4:21-23; Inc 6:14Kuyaka ndakuyakila iŋanda indamfu, busena bwakukalila lyoonse.
14 #
Jos 22:6; 2 Sam 6:18; 1 Mak 16:2; 2 Mak 6:3 Elyo mwami wakacebukila kubantu akulongezya imbungano yoonse ya-Israyeli, nkabela imbungano yoonse ya-Israyeli yakanyamuka. 15#Lk 1:68Wakati, Alumbwe Jehova Leza wa-Israyeli, nkaambo maanza aakwe azuzikizya ncaakasyomezya amilomo yakwe kuli-Davida taata. 16#2 Mak 6:5; Dt 12:11Wakati, Kuzwa kubuzuba obo nindakagwisya bantu bangu mucisi ca-Egepita, nsina kusala munzi nuuba umwi akati kamisyobo yoonse ya-Israyeli kuti njakilwe iŋanda, izina lyangu libe nkuko. Pele ndakasala Davida aendelezye bantu bangu ba-Israyeli. 17Lino mumoyo wakwe Davida taata wakali kuyeeya kuyaka iŋanda, ibe yazina lya-Jehova Leza wa-Israyeli. 18Pele Jehova wakaambila Davida taata kuti, Mbuli mboyeeyede mumoyo wako kuyakila izina lyangu iŋanda, wakacita kabotu kuyeeya obo mumoyo wako. 19Nekubaboobo webo omwini tokooyooyaka iŋanda pe. Mwanaako uuzwa mwida lyako nguuyooyakila izina lyangu iŋanda. 20Lino Jehova wazuzikizya majwi aakwe ngaakaamba, nkaambo mebo ndanjila mucibaka ca-Davida taata, ndikede acuuno cakwe cabwami bwa-Israyeli, mbubonya mbuli Jehova mbwaakasyomezya, nkabela ndayakila izina lya-Jehova Leza wa-Israyeli iŋanda. 21#Dt 31:26; 2 Bam 22:8Alimwi mumonya muŋanda ndabamba busena bube bwabbokesi lyacizuminano ca-Jehova ncaakatangana abamatata besu naakabagwisya munyika ya-Egepita.
22 #
2 Bam 23:3; 2 Mak 6:12; Job 11:13; Int 63:4; Is 1:15; 1 Tim 2:8 Mpawo Solomoni wakaima kunembo lyacipaililo ca-Jehova, kumeso aambungano yoonse yaba-Israyeli, akutandabika maanza aakwe kujulu. 23#Kul 15:11; 1 Mak 29:10-13; Int 35:10; 89:6-8; Jer 10:6-16; Mik 7:18; Dt 7:9; Neh 1:5; Dan 9:4; Matl 17:1; 2 Bam 20:3Lino wakati, O Jehova Leza wa-Israyeli, taakwe Leza umbi uuelene ayebo, nikuba kujulu naaba ansi ano, uubamba cizuminano akucita caluzyalo kubalanda bako beenda kubusyu bwako camoyo woonse. 24Wazuzikizizya Davida taata mulanda wako majwi nguwakamwaambila. Wakaambya mulomo wako, lino sunu ijanza lyako walicitya ncobeni. 25#Int 132:12Lino, O Jehova Leza wa-Israyeli, kocitila Davida taata mulanda wako mbubonya mbowakamusyomezya, Wakati, Takukooyookubulila muntu kubusyu bwangu wakukala acuuno cabwami bwa-Israyeli, Pele bana bako baleelede kucenjela munzila zyabo, kuti beende kubusyu bwangu mbubonya ayebo mbowakeenda. 26#2 Sam 7:25Lino, O Leza wa-Israyeli, majwi aako ngowakaambila Davida taata mulanda wako aimikizigwe nji.
27 #
2 Mak 2:6; Int 113:4; Is 66:1; Jer 23:24; Inc 7:49; 17:24; 2 Kor 12:2 Pele sa ncobeni Leza ulakala ansi? We! Ijulu ajulu lyakujulu loko, oonse tokonzyi kukala mulingawo! Ino ukale buti mukaanda aka nkindakuyakila? 28#Flp 4:6Nekubaboobo koswiilila cikombyo cangu ndemulanda wako acikumbizyo cangu, O Jehova Leza wangu. Koswiilila cilizyo acikombyo mulanda wako ncakombya kubusyu bwako mubuzuba obuno, 29#Dan 6:10kuti meso aako alange aŋanda eyi lyoonse, masiku asikati, abusena mboambide kuti, Izina lyangu likakale nkukonya, Koswiilila cikombyo mulanda wako ncakombya kubusena obuno. 30#2 Mak 20:9; Neh 1:6; Kul 34:6,7; Int 85:2; 130:4; Dan 9:9; Mt 6:12; 1 Joh 1:9Koswiilila cikumbizyo camulanda wako abantu bako ba-Israyeli ncibakombya kubusena obuno. Ee, koswiilila kucikalilo cako cakujulu, alimwi noswiilila, kobalekelela.
31Na muntu wabisizya mweenzinyina, aboobo wasungilizigwa kukonka, alimwi weza kuzookonka cikonke cakwe kunembo lyacipaililo cako omuno muŋanda, 32#Dt 25:1elyo koswiilila kujulu nkobede, akubeteka kabotu mulincico kufumbwa ncocitila balanda bako. Sizibi umupe mulandu, kuti zibi zyakwe ziboole amutwe wakwe mwini, pele mululami komululamika akumupa bulumbu bweelede bululami bwakwe.
33 #
Dt 28:25; Lev 26:39; Jer 20:12 Na bantu bako ba-Israyeli bazundwa kuli basinkondonyina nkaambo kakukubisizya, pele bapiluka akulemeka izina lyako, akukomba akukumbila kubusyu bwako omuno muŋanda, 34koswiilila kujulu nkobede, ulekelele zibi zyabantu bako ba-Israyeli akubaboozya kunyika yabo njiyonya njowakabapa bamawisi.
35Na ijulu lilijalidwe cakutalosya imvula nkaambo kakuti bakubisizya, nkabela bakomba mpoonya ano, akulemeka izina lyako, akuleka zibi zyabo noli mukubapenzya, 36#Int 5:8; 143:8; Is 35:8; Hos 2:21; 1 Sam 12:23; Jer 6:16lino koswiilila kujulu nkobede, akulekelela zibi zyabalanda bako, bantu bako ba-Israyeli, nowabaiisya inzila imbotu njibeelede kweendela, akulosya imvula anyika yabo njowakabapa bantu bako kuti ibe caabilo cabo.
37 #
Lev 26:16; Dt 28:21-52 Na mwaba inzala mucisi, alimwi na mwaba idwazi na ndyomba na kwiibuka na cisozi na bacamusokonya, alimwi na basinkondonyina babasinkinizya muminzi yabo, kufumbwa mapenzi na malwazi aabasikila, 38na bakomba akukumbila, nkukuti bantu boonse nanka bantu bako ba-Israyeli, umwi aumwi mbuli mbwazi mapenzi aamumoyo wakwe, akutandabika maanza aakwe kuŋanda eyi, 39#1 Sam 16:7; 1 Mak 28:9; Int 11:4; Jer 17:10; Inc 1:24lino swiilila kujulu kumakalilo aako nkokede, ulekelele, ucite kabotu, akuboozezya umwi aumwi bulumbu bwanzila zyakwe, mbubonya mbobwene moyo wakwe, (Nkaambo nduwe olike uubwene myoyo yabantu boonse baansi), 40kuti bakulemeke mazuba oonse aabuumi bwabo nibacipona munyika njowakabapa bamatata besu.
41Alakwe mweenzu uutali umwi wabantu bako ba-Israyeli, uuzwa kucisi cakule nkaambo kazina lyako, 42#Dt 3:24(nkaambo bantu bayooswiilila impuwo yazina lyako ipati ayajanza lyako lyanguzu ayakuboko kwako kutandabede) asika kukukomba kuŋanda okuno, 43#1 Sam 17:46; 2 Bam 19:19; Int 67:2; 102:15koswiilila kumakalilo aako aakujulu, ukacite coonse mweenzu ncakukwiilila, kuti bantu boonse baansi bazibe izina lyako, akukulemeka mbubonya bantu bako ba-Israyeli mbubakulemeka, aku ziba kuti iŋanda eyi njindakuyakila yaambwa muzina lyako.
44Na bantu bako baya kukulwana abasinkondonyina, kufumbwa nkobatuma, alimwi bakomba kuli-Jehova cakulanga kumunzi ngosalide akuŋanda njinjakilide izina lyako, 45koswiilila kujulu nkobede cikombyo cabo acikumbizyo cabo akubakosweda makani.
46 #
2 Mak 6:36; Job 9:2; 14:4; Int 130:3; 143:2; Tus 20:9; Muk 7:20; Jak 3:2; 1 Joh 1:8 Nkabela na bakubisizya, (nkaambo taakwe muntu naba omwe uutabisya) aboobo wabakalalila akubaaba mumaanza aabasinkondonyina, kuti batolwe mubuzike mucisi cabasinkondonyina, nikuba kule nikuba kufwaafwi, 47#Lev 26:40; Neh 1:6; Int 106:6; Dan 9:5nekubaboobo na bajola myoyo yabo oko kunyika nkubatoledwe mubuzike, akweempwa, akukumbila kulinduwe oko kunyika yabasikubasaala, cakwaamba kuti, Twakabisya, akuleya, akutyola mulao, 48#Dt 4:29; Neh 1:9; Tus 23:26; Jer 29:12; Dan 6:10; Inc 8:37; Rom 10:10; 2 Mak 6:38; 28:9; Int 5:7na ncobeni beempwa camoyo woonse acamiyeeyo yoonse omo mucisi cabasinkondonyina nkubatoledwe, akukukomba cakulanga kunyika njowakapa bamawisi akumunzi ngosalide akuŋanda njinjakilide izina lyako, 49lino koswiilila kujulu nkobede cikombyo cabo acikumbizyo cabo, ukabakoswede makani aabo. 50#Ezr 7:6; Int 106:46Kolekelela bantu bako bakubisizya, akubajatila milandu yabo yoonse, akubapesya luzyalo kubusyu bwabasikubasaala, kuti babafwide luzyalo. 51Nkaambo mbantu bako acaabilo cako, mbowakagwisya mu-Egepita, mumulilo wabutale. 52Meso aako alange acikumbizyo camu landa wako acikumbizyo cabantu bako ba-Israyeli, Kobaswiilila muzintu zyooonse nzibakukwiilila. 53Nkaambo nduwe wakabaandaanya kuzwa kumisyobo yoonse yaansi, kuti babe caabilo cako, mbubonya mbowakaamba kumulomo wa-Musa mulanda wako ciindi eciya nowakagwisya bamatata ku-Egepita, O Mwami Jehova.
54Lino Solomoni naakamana kukomba Jehova cikombyo eci acikumbizyo eci coonse, wakanyamuka kuzwa kucipaililo ca-Jehova, nkwaakafugeme amazwi aakwe akutambika maanza aakwe kujulu, 55#2 Sam 6:18wakaima akulongezya imbungano yoonse ya-Israyeli ajwi ipati. Wakati, 56#Dt 12:10; Jos 21:45; 23:14Alumbwe Jehova iwakapa bantu bakwe ba-Israyeli kulyokezya, mbubonya mbwaakasyomezya. Taakwe ijwi niliba lyomwe lyawa ansi akati kamajwi mabotu oonse ngaakaamba kumulomo wa-Musa mulanda wakwe. 57#Dt 31:6Jehova Leza abe aswe mbubonya mbwaakali abamatata, Atatusiyi nikuba kututakata, 58#Int 119:36; Jer 10:23; 2 Kor 3:5Alulamike myoyo yesu kulinguwe, kuti tweende munzila zyakwe zyoonse akubamba milazyo yakwe ambeta zyakwe amilumbe yakwe njaakalailila bamatata. 59Aya majwi aangu ngendakumbila kubusyu bwa-Jehova abe afwaafwi kuli-Jehova Leza wesu lyoonse, isikati amasiku, kuti akosole kabotu makani aamulanda wakwe amakani aabantu bakwe ba-Israyeli, buzuba bumwi abumwi mbubweelede, 60#Jos 4:24; 1 Sam 17:46; 2 Bam 19:19; Dt 4:35; 1 Bam 18:39; Is 44:6,8,24; Jer 10:10-12kuti bantu bamisyobo yoonse yaansi bazibe kuti Jehova ngu-Leza, taakwe umbi. 61#1 Bam 11:4; 2 Bam 20:3Pele muleelede kuba amoyo womwe luzutu kuli-Jehova Leza wesu, cakutobela inzila zyakwe acakubamba milazyo yakwe, mbubonya mbuli mubuzuba obuno.
62Lino mwami aba-Israyeli boonse mbaakali abo bakali kutuula zipaizyo kubusyu bwa-Jehova, 63Nkabela Solomoni wakatuula zipaizyo zyakutontozya kuli-Jehova, basune bali zyuulu zili makumi obile azibili, ambelele zili zyuulu zili mwaanda amakumi obile. Mbuboobo mwami abana baIsrayeli boonse mbubakasalazya iŋanda ya-Jehova. 64Amubuzuba obo mbubonya mwami wakasalazya lubuwa lwaakati lulangene aŋanda yaJehova, nkaambo nkukonya oko nkwaakatuula cituuzyo acipaizyo cabusu amafuta aazituuzyo zyakutontozya, nkaambo cipaililo camukuba cakubusyu bwa-Jehova cakaata kutambula cipaizyo cabusu amafuta aazituuzyo zyakutontozya,
65 #
Lev 23:34; My 34:8; Jos 13:5; Bab 3:3; 2 Bam 14:25; Matl 15:18; Kul 23:31; My 34:5 Nkabela kuciindi eco nciconya Solomoni wakacita ipobwe, aba-Israyeli boonse mbaakali abo, imbungano impati kuzwa kumanjililo aaku-Hamati kusikila kukalonga ka-Egepita. Bakasekelela kubusyu bwa-Jehova Leza wesu mazuba aali musanu aabili. 66Lino nibwakaca buzuba bwamusanu aatatu wakamwaisya bantu. Nkabela bakalumba mwami akuya kumaanda aabo cakukondwa acakusekelela mumyoyo yabo nkaambo kabubotu boonse Jehova mbwaakacitila Davida mulanda wakwe aba-Israyeli bantu bakwe.
Currently Selected:
1 Bami 8: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
