1 Bami 18

Eliya mbwaakaya kukubona Ahabu

1 # Lk 4:25; Jak 5:17; Dt 28:12 Lino nicakaba ciindi cilamfu, ijwi lya-Jehova lyakasikila Eliya mumwaka watatu, liti, Koya ukalibonye kumeso aa-Ahabu, nkabela njoowisizya nyika imvula. 2Aboobo Eliya wakanyamuka kuyoolibonya kumeso aa-Ahabu, nkabela inzala yakali impati mu-Samariya.

3 # Neh 7:2; Job 28:28 Lino Ahabu wakaita Obadiya, silutwe wabasiŋanda bakwe. Oyo Obadiya wakali kulemeka Jehova loko, 4#Mt 10:40-42nkabela kuciindi eco Jezebeli naakanyonyoona basinsimi ba-Jehova. Obadiya wakabweza basinsimi bali mwaanda, wabasisa mumpangala, mumwi makumi osanwe amumwi makumi osanwe, wabasanizya insima amaanzi. 5Elyo Ahabu wakaambila Obadiya kuti, Koya bweenda moonse munyika kutusensa toonse twamaanzi akutulonga toonse. Ambweni tuyoojana mani aakusanizya mabbiza ambongolo, kuti tutaswekelwi banyama boonse. 6Mpawo bakaabana nyika, kuti baimanisye kweendeenda. Ahabu wakatozya kwakwe alike, alakwe Obadiya wakatozya kwakwe alike. 7Nkabela Obadiya naakacili munzila wakaswanaana a-Eliya, elyo naakamuziba, wakavundama ansi, wabuzya kuti, Sa nduwe mwami wangu Eliya? 8Wakavuwa kuti, Ndime. Koya, ukaambile mwami wako kuti Eliya mpali. 9Pele wakati, Ndabisyanzi? Nkaambonzi nowandaaba ndemulanda wako mumaanza aa-Ahabu kuti andijaye? 10Ncobeni Jehova Leza wako mbali muumi, taakwe cisi niciba comwe nibuba bwami bomwe mwami wangu nkwaatana kutuma kuyandaula nduwe. Nkabela naakaambilwa kuti, Tawo, wakatukila cisi eco na bwami obo nkaambo kakukubula. 11Lino sunu waamba kuti, Koya ukaambile mwami wako kuti Eliya mpali. 12#2 Bam 2:16; Ezk 3:12,14; Mt 4:1; Inc 8:39Pele ndakusia buyo, Muuya wa-Jehova ayookutola nkuntezi. Elyo na ndaambila Ahabu, nekubaboobo atakujane, uyoondijaya. Anukuti mebo ndemulanda wako ndayoowa Jehova lyoonse akuzwa kubwanike bwangu. 13Sa tona kulwiidwa, mwami wangu, mbundakacita kuciindi eco Jezebeli naakajaya basinsimi baJehova? Ndakasisa basinsimi ba-Jehova bali mwaanda, mumwi makumi osanwe amumwi makumi osanwe mumpangala, akubasanizya insima amaanzi. 14Lino uwe waamba kuti, Koya ukaambile mwami wako kuti Eliya mpali. Ma! Uyoondijaya! 15Pele Eliya wakati, Ncobeni mbali muumi Jehova wamakamu, ngunjiminide kubusyu bwakwe, njoolibonya kumeso aakwe buzuba obuno. 16Mpawo Obadiya wakainka kuyooswanaana a-Ahabu, wamulwiida makani. Elyo Ahabu wakaya kuyooswanaana a-Eliya.

17 # 1 Bam 21:20; Jos 7:25; Lk 23:2; Inc 16:20 Lino Ahabu naakabona Eliya, Ahabu wakamwaambila kuti, Ma! Sa enduwe nopenzya ba-Israyeli 18#1 Bam 9:9; 2 Mak 15:2; 24:20Wakati, Nsina kupenzya ba-Israyeli pe. Nduwe aluzubo lwauso, nkaambo mwasotoka milao ya-Jehova akutobela ba-Baala, 19#Jos 19:26; Jer 46:18; 1 Bam 16:33Lino tuma, ukandiyobolwede ba-Israyeli boonse kucilundu ca-Karameli, abalo basinsimi ba-Baala bali myanda yone amakumi osanwe, abasinsimi bazifwanikisyo bali myanda yone balya kuntafule ya-Jezebeli.

Imbungano yakucilundu ca-Karameli

20 # 1 Bam 22:6 Mpawo Ahabu wakatuma kubantu boonse ba-Israyeli akubunganya basinsimi kucilundu ca-Karameli. 21#2 Bam 17:41; Mt 6:24; 1 Kor 10:21,22; Ciy 3:15; Jos 24:15; Int 100:3Elyo Eliya wakaswena kubantu boonse, wakati, Ino mulaleka lili kuya busunkuta amiyeeyo yobile? Na Jehova ngu-Leza, amumutobele. Na Baala ngu-Leza, amutobele nguwe. Nkabela bantu teebakavuwa ijwi niliba lyomwe. 22#1 Bam 19:10,14Lino Eliya wakaambila bantu kuti, Mebo ndasyaala endike musinsimi wa-Jehova, pele basinsimi ba-Baala bali myanda yone amakumi osanwe. 23Batupe iŋombe zyobile, elyo balisalile iŋombe imwi, oaigonkole akwiibamba azisamu, pele batadukuli mulilo, Ambebo mbambe iŋombe imwi akwiibika azisamu, pele nsikoodukula mulilo pe. 24#Lev 9:24; 1 Mak 21:26; 2 Mak 7:1Lino muleelede kukwiilila izina lyamizimu yanu, ambebo njookwiilila izina lya-Jehova, nkabela kufumbwa Leza uusi pe mulilo, ngo-nguwe Leza mwini-mwini. Mpawo bantu boonse bakavuwa kuti, Mbubo, abota makani!

25Elyo Eliya wakaambila basinsimi ba-Baala kuti, Amulisalile iŋombe imwi, mutaangune kwiibamba, nkaambo muli banji. Lino amukwiilile izina lya-Leza wanu, pele mutadukuli mulilo pe. 26#Int 115:5; Jer 10:5; 1 Kor 8:4; 12:2Nkabela bakatambula iŋombe njibakapegwa, baibamba, bakwiilila izina lya-Baala kuzwa kucifumofumo mane kusikila akalangabwaseme. Bakati, O Baala, utuswiilile, Pele katakwe ijwi niliba lyomwe ilyakavuugwa pe. Nkabela bakali kusotoka acipaililo ncibakayakide. 27Lino nikwakaba akalangabwaseme, Eliya wakabaseka, wati, Amukwiilisye, nkaambo ngu-Leza. Ambweni uli mukuyeeya, ambweni waya kumbi, ambweni uli mulweendo, ambweni uli mutulo aboobo uleelede kusinsimunwa. 28#Lev 19:28; Dt 14:1Mpawo bakakwiilisya loko, akulitenzya mapanga amasumo mbubonya mbubakazibila, mane bulowa bwabo bwakatikaikila ansi. 29#1 Kor 11:4,5Lino ciindi cakalangabwaseme nicakamana, bakacili kulabalika mane kusikila kuciindi cakukomba camangolezya, pele katakwe ijwi niliba lyomwe naba sikuvuwa naba sikuswiilila.

30Mpawo Eliya wakaambila bantu boonse kuti, Amuswene kulindime. Lino bantu boonse nibakaswena, wakayakulula cipaililo ca-Jehova icakamwaikide. 31#Matl 32:28; 35:10; 2 Bam 17:34Eliya wakabweza mabwe aali ikumi aabili, mbubonya mbuli mweelwe wamisyobo yabana ba-Jakobo (ngonguwe iwakasikilwa ijwi lyaJehova lyakuti, Israyeli uyooba izina lyako). 32#Kol 3:17Nkabela ayo mabwe wakaayasya cipaililo muzina lya-Jehova, akuzyungulusya cipaililo lulindi ilwakeelede zisuwo zyobile zyambuto. 33#Lev 1:6; Bab 6:20Mpawo wakabamba zisamu, watendaula iŋombe, akwiibika mpoonya azisamu. Alimwi wakati, Amuzuzye zitekelo zyone zyamaanzi, mwaatile acituuzyo cili azisamu. 34Wakati, Amucite alwabili. Nkabela bakacita alwabili. Alimwi wakati, Amucite alwatatu. Nkabela bakacita alwatatu. 35Aboobo maanzi akeenda koonse koonse acipaililo, alwalo lulindi lwakazula maanzi.

36 # Kul 29:39; Matl 28:13; Kul 3:6; 4:5; Mt 22:32; Heb 11:16; 1 Bam 8:43; 2 Bam 19:19; Int 83:18; My 16:28 Lino kuciindi cakukomba kwamangolezya, Eliya musinsimi wakaswena afwiifwi, wakati, O Jehova Leza wa-Abrahamu, Leza wa-Izaka, Leza waIsrayeli, sunu kuzibwe kuti nduwe Leza mucisi ca-Israyeli, ambebo ndi mulanda wako, alimwi ijwi lyako ndelyakandicitya makani aya oonse. 37#Jer 10:23; 31:18Kondivwiila, O Jehova, kondivwiila, kuti bantu aba bazibe kuti nduwe Leza, O Jehova, alimwi wapilusya myoyo yabo. 38#Lev 9:24; Bab 6:21; 1 Mak 21:26; 2 Mak 7:1Mpoonya awo mulilo wa-Jehova wakaloka, walya cituuzyo azisamu zyoonse, amabwe, abulongo, akumyankuta maanzi aakali mululindi. 39Nkabela bantu boonse nibakabona bakavundama ansi, bati, Jehova ngu-Leza! Jehova ngu-Leza! 40#2 Bam 10:25; Dt 13:5; 18:20; Ciy 19:20Lino Eliya wakabaambila kuti, Amujate basinsimi ba-Baala; kutaloboki naba omwe akati kabo. Elyo bakabajata, nkabela Eliya wakabaselusya kukalonga ka-Kisoni, wabajaya nkuko.

Eliya mbwaakakombela imvula

41Lino Eliya wakaambila Ahabu kuti, Koya, ukalye akunywa, nkaambo kulamvwigwa mandomondomo aamuyoba. 42#Jak 5:17Nkabela Ahabu naakainkide kuyoolya akunywa, Eliya wakatanta amutwe wa-Karameli, wakotamina ansi, amutwe wakwe wakasika akati kamazwi aakwe. 43#Matl 32:20; Hab 2:3Lino wakaambila mulanda wakwe kuti, Koya ukalange kulubbazu lwalwizi. Wakaya, walanga, wati, Taakwe pe. Pele ziindi zili musanu azibili wakaindulula kumutuma. 44Lino ciindi camusanu azibili nicakasika, wakati, Kwaboneka kayoba kaniini kali mbuli ijanza lyamuntu, kazwa kulwizi. Mpawo wakamulailila kuti, Koya, ukaambile Ahabu kuti, Kolibambila inkalaki yako, kuti imvula itakukasyi. 45Lino nikakaba kaindi, ijulu lyoonse lyakasia nkaambo kamayoba amuuwo, nkabela imvula yakawa loko. Elyo Ahabu wakatanta munkalaki kuya ku-Jezreeli. 46#2 Bam 3:15; Ezk 1:3; 3:14Nkabela ijanza lya-Jehova lyakalijisi Eliya, aboobo wakalyaanga-anga mucikungu, wazuzaana kunembo lya-Ahabu mane wakasika kumanjililo aa-Jezreeli.

Currently Selected:

1 Bami 18: Ibbaib63

Highlight

Copy