1 Ba-Korinto 6

Bana-Kristo mbubeelede kubetekana

1Na akuli umwi akati kanu uujisi kaambo kumweenzinyina, sa ulalimba moyo kubetekwa kulubeta lwabataluleme, akutatola makani kumbungano yabasalali? 2#Ciy 3:21; Dan 7:22Sa tamuzi kuti basalali bazoobeteka insi yoonse? Lino kuti ndinywe muzoobeteka insi, sa tamukonzyi kubeteka makani maniini? 3Sa tamuzi kuti tuzoobeteka baangelo? Lino ncobeni tulakonzya kubeteka makani aansi ano, 4Nekubaboobo, ciindi ncimujisi makani aansi ano akubetekwa, mulaatola kulubeta lwabantu batakwe makani kumeso aambungano yaba-Kristo. 5Nkukumuusya bweeme nkundaambila obo. Mbukubede na? Taakwe muntu musongo naba omwe akati kanu uukonzya kubeteka makani akati kababunyina bakwe na? 6Pele babunyina balasesana umwi mweenzinyina nikuba kulubeta lwabaabo batali bazumini. 7#Mt 5:39; 1 Tes 5:15; 1 Pet 3:9Anukuti ncobeni ncintu cibi kulindinywe kusesana umwi mweenzinyina naaba kaniini. Sa taciindi kubota kuti mubisizigwe buyo? Sa taciindi kubota kuti muondongwe buyo? 8Anukuti inywe nubeni mulabisizya, mulaondonga nibaba babunyina banu.

Bana-Kristo baleelede kusalala

9Ma! Sa tamuzi kuti bataluleme tabakonzyi kuyoovuba Bwami bwaLeza? Mutalyeeni pe. Nibaba basibwaamu nibaba basikukomba mituni nibaba basimamambe nibaba batete kuzibi nibaba baalumi boona baaluminyina 10#Gal 5:19-21nibaba babbi nibaba basikulikumbuzya nibaba bakolwi nibaba basimatusi nibaba basilunyanzyo tabakooyoovuba Bwami bwa-Leza. 11#Tit 3:3-7Lino mbuboobo mbubakabede kale bamwi akati kandinywe, pele sunu mulisanzizidwe, mulisalazizidwe, mulilulamikidwe muzina lya-Mwami Jesu Kristo aku-Muuya wa-Leza wesu.

Nkaambo mibili yesu nzizo zya-Kristo

12 # 1 Kor 10:23 Zintu zyoonse zilazuminika kulindime, nekubaboobo teensi zyoonse zigwasya. Zintu zyoonse zilazuminika, nekubaboobo nsiyandi kutolwa kubuzike bwacintu niciba cimwi. 13#1 Tes 4:3-5Zilyo nzyada, alyalo ida ndyazilyo, pele Leza uyoozilobya zyoonse zyobile. Lino mubili tuuli wabwaamu pe, ngwa-Mwami, alakwe Mwami ngwamubili. 14#1 Kor 15:15,20; 2 Kor 4:14; Rom 8:11Nkabela Leza, iwakabusya Mwami, uyootubusya aswebo kunguzu zyakwe. 15#1 Kor 12:27Sa tamuzi kuti mibili yanu nzezizo zya-Kristo Lino sa ndakonzya kunyanzya zizo zya-Kristo, zibe zizo zyasibwaamu? Ne! Kutabi boobo. 16#Matl 2:24Alimwi, sa tamuzi kuti oyo uujatana asibwaamu waba mubili omwe anguwe? Nkaambo kulaambwa kuti, Abo bobile balaba mubili omwe. 17#Joh 17:21,22; Ef 5:30; 2 Kor 3:17Pele oyo uujatana a-Mwami waba omwe anguwe ku-Muuya, 18Amucije bwaamu, Zibi zyoonse nzyacita muntu zili anze amubili, pele sibwaamu ulabisizya mubili wakwe mwini, 19#1 Kor 3:16; 2 Kor 6:16Sa tamuzi kuti mibili yanu ntotukombelo twa-Muuya wa-Leza uumukalila mukati, ngumutambwide kuli-Leza? Tamulivubi nubeni pe, 20#1 Pet 1:18,19; 1 Kor 7:23; Flp 1:20nkaambo mwakaulwa muulo. Nkaambo kaako, amulemye Leza mumibili yanu.

Currently Selected:

1 Ba-Korinto 6: Ibbaib63

Highlight

Copy