1 Ba-Korinto 12
12
Zipego zyamisyobo misyobo nzitecaabilwa a-Muuya Uusalala
1Lino kumakani aazipego zya-Muuya, nubakwesu, nsiyandi kuti mutabi aluzibo. 2#Hab 2:18,19Mulizi kuti, ciindi ncimwakacili bahedeni kufumbwa nkumwakeenzegwa, ziyanza zyanu zyakali kumweenzya lyoonse kumituni iitaambi. 3#Mk 9:39; Mt 7:21; 1 Joh 4:2,3Lino ndamuzibya kuti taakwe muntu uuamba muMuuya wa-Leza uukonzya kwaamba kuti Jesu mutuke, alimwi taakwe uukonzya kwaamba kuti Jesu Mwami cita mu-Muuya Uusalala.
4 #
Rom 12:6-8; Ef 4:4 Zipego nzezyamisyobo misyobo, pele Muuya ngoumwi luzutu, 5#Ef 4:11Ayalo milimo njeyamisyobo misyobo, pele Mwami ngoumwi luzutu. 6Inguzu zibeleka mumyoyo nzezyamisyobo misyobo, pele Leza ngoumwi luzutu uuzibelesya zyoonse mubantu boonse. 7#1 Kor 14:26Umwi aumwi ulapegwa bulaizi bwa-Muuya kukugwasya banamaleya, 8Nkaambo umwi ulapegwa kuMuuya ijwi lyabusongo, nkabela umwi ulapegwa ijwi lyaluzibo ku-Muuya oyo nguwenya. 9Alimwi umwi, oyo Muuya ulamupa lusyomo, aumwi ulapegwa ku-Muuya nguwenya inguzu zyakuponya. 10#1 Kor 14:5; Inc 2:4Umwi ulijisi inguzu zyakucitya malele, umwi businsimi, umwi busongo bwakuzibya myuuya, umwi myaambo yamisyobo misyobo, aumwi busongo bwakupandulula myaambo. 11#Rom 12:3; Ef 4:7; 1 Kor 7:7Pele aya oonse, ulaacita oyo Muuya omwe, ulaabila umwi aumwi mbuli mbwayanda.
12 #
Rom 12:4-5; 1 Kor 10:17 Nkaambo mbuli mubili wamuntu mbuuli omwe, nekubaboobo ulijisi zizo zinji, nkabela ezyo zizo zinji nzyamubili omwe, mbubonya obo mbwabede alakwe Kristo. 13#Gal 3:28Nkaambo mu-Muuya omwe motwakabapatizigwa toonse, nibaba ba-Juda nibaba ba-Helene, nibaba bazike nibaba balubusi, kuti kube mubili omwe, nkabela toonse twakanjilwa Muuya omwe. 14Awalo mubili teensi cizo comwe pele nzinji. 15Na cino caamba kuti, Mbwintali ijanza, nsili wamubili, lino sa tacili camubili ncobeni? 16Akwalo kutwi, na kwaamba kuti, Mbwintali liso, nsili wamubili, lino sa takuli kwamubili ncobeni? 17Mubili woonse waakuli liso, ino kuswiilila nikwakaswiililika buti? Mubili woonse waakuli kutwi, ino kununkuzya nikwakanunkuzika buti? 18Anukuti Leza wakabika zizo zyoonse mumubili, cimwi acimwi, mbuli mbwaakayanda. 19Zyoonse nizyaakuli cizo comwe buyo, ino niwaakuli buti mubili? 20Anukuti zizo nzinji, nekubaboobo mubili ngoumwi buyo. 21Lino liso talikonzyi kwaambila ijanza kuti, Nsikuyandi. Awalo mutwe tokonzyi kwaambila maulu kuti, Nsimuyandi. 22Pele ncobeni ezyo zizo zyamubili nzituyeeya kuti zilikompeme, azyalo zilayandika. 23Azyalo zizo ezyo zyamubili nzituyeeya kuti tazilemekeki, nzizyonya nzituinda kusamika cabulemu. Aboobo zizo zyesu ziteebeka zilainda kupegwa bulemu, 24anukuti zizo zyesu zyeebeka zilibujisi kale. Leza nguwakalunganya mubili, nkabela zizo ezyo zitakwe bulemu, nzizyonya nzyaakalemeka cakwiinda, 25kuti kutabi mipampo kumubili pele kuti zizo zyoonse zigwasyanye. 26Lino kuti caciswa cizo cimwi, zilaciswa zizonyina zyoonse azyalo. Alimwi kuti cizo cimwi calemekwa, zizonyina zyoonse zilakondwa aco.
27 #
Rom 12:5; Ef 5:30 Lino nywebo muli mubili wa-Kristo, umwi aumwi akati kanu uli cizo cawo. 28#Ef 4:11,12Bantu bataanzi mbabikide Leza mumbungano yakwe mbaapostolo, alwabili bamwi mbasinsimi, alwatatu bamwi mbaiyi, alimwi bamwi mbasimalele, abamwi mbasilisi, abamwi mbagwasyi, abamwi mbeendelezi, abamwi mbasikwadmba myaambo myaambo. 29Sa boonse mbaapostolo? Sa boonse mbasinsimi? Sa boonse mbaiyi? Sa boonse balacita malele? 30Sa boonse balijisi busongo bwakusilika? Sa boonse balaamba myaambo? Sa boonse balakonzya kupandulula? 31#1 Kor 14:1Lino amukasukamine zipo ziinda kugwasya. Pele ndayanda kumutondezya inzila imbotu kwiinda zyoonse.
Currently Selected:
1 Ba-Korinto 12: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
