ROMANOS 3

1Jáeramo, ¿mbae pe pa judío reta ani oyembocircuncida vae reta oporoapɨraa? 2Jeta pe ko opaete mbaembae rupi. Tenonde ete: Oñemee Tumpa iñee chupe reta.#Sal 147.19-20. 3¿Kërai pa jayave? Amogüe chugüi reta mbaetɨ güɨrovia. Jayave, güɨroviambae jeko pegua, ¿Tumpa ngaraa ra ombopo jei vae? 4¡Mbaetɨ ko! Echa Tumpa oyapo opaete añete vae rupi, yepe tëi opaete ɨvɨ pegua reta iyapu vae ko. Oyekuatía oï körai:

“Neñee rupi, reyembojupiukata,

jare reñejäauka yave, ngaraa ndereko.”#Sal 51.4.

5Jupimbae yayapo vae omboyekuaa kavi Tumpa jupi ko vae, ¿mbae pa yaeta? ¿Jáeramo Tumpa oiporarauka yave, jupimbae vae ra oyapo? (Kuimbae reta ramiño chemiari aï.) 6¡Mbaetɨ ko! Echa Tumpa jupiä ko yave, ¿këraita pa ojäa ɨvɨ pegua reta?

7Cheapu vae rupi Tumpa iñee añete vae oyemboete yae yave, ¿maera pa chemboekoño cheyoa re? 8Jayave yandepuere yae: “Yayapo ikavimbae vae, ikavi vae oime vaerä.” (Echa jökorai jei amogüe yandemboeko vaerä iyapu reve. Jei reta jökorai ko yaporomboe vae. Jókuae reta jupi ko oiporara vaerä.)

Mbaetɨ ko jupi vae

9¿Kërai pa jayave? ¿Yande pa jayave ikavi yae chugüi reta? ¡Mbaetɨ ko! Yamboeko ma judío reta jare judiombae vae reta. Kërai opaete vae ñogüɨnoi mbaeyoa imbaepuere pe. 10Tumpa Iñee pe oyekuatía oï körai:

“Mbaetɨ ko jupi vae, mbaetɨ metei ave.

11Mbaetɨ ko kia oikuaa Tumpa vae,

mbaetɨ oeka Tumpa vae.

12Opaete vae opia Tumpa güi,

opaete vae metei rami oñererokomegua.

Mbaetɨ kia oyapo ikavi vae,

mbaetɨ metei ave.#Sal 14.1-3; 53.1-3.

13Tëogüe-rɨru oyepea oï rami ko iyaseo,

ikü pe oporombotavɨ.#Sal 5.9.

Mboi imbayachi oime iyuru pe.#Sal 140.3.

14Iyuru tɨnɨe oï yepopeyu pe

jare ñeeasɨ katu pe.#Sal 10.7.

15Osɨi katu oporoyuka vaerä;

16ojoa rupi oyapo ikavimbae

jare oporombopɨatɨtɨ;

17mbaetɨ etei oikuaa reta mbɨakatu regua.#Is 59.7-8.

18Mbaetɨ etei oipoɨu Tumpa güi.”#Sal 36.1.

19Ërei yaikuaa ko opaete mborookuai jei vae, jei ko mborookuai güɨnoi vae reta pe, agüɨye vaerä mbae jei jare opaete vae oike vaerä Tumpa iporojäa pe; 20echa mborookuai jei vae oyapo vae rupi mbaetɨ kia ipuere oyembojupiuka Tumpa jóvai.#Sal 143.2; Gl 2.16. Echa mborookuai rupi yaikuaa mbaeyoa re.

Tumpa oporombojupi mborogüɨrovia rupi

21Ërei añave oyekuaa kërai Tumpa ipuere yandembojupi mborookuai jei vae yayapombae reve. Mborookuai jare ñeemombeúa reta omombeu kuae regua; 22echa Tumpa ombojupita opaete Jesucristo re#Gl 2.16. güɨrovia vae reta iporogüɨrovia rupi. Echa jae mbaetɨ oporomboyoavɨ. 23Echa opaete vae iyoa vae reta ko, mombɨrɨ ko ñogüɨnoi Tumpa iyemboetea güi. 24Ërei Tumpa ipɨakavi rupi oporombojupi jepɨmbaeño, echa yandereepɨ ma Cristo Jesús rupi; 25jae ko Tumpa omee, oime vaerä ñɨ̈ro jugüɨ rupi yarovia yave, jökorai oyekuaa kërai Tumpa jupi ko, arakae iñɨ̈ro yave ipɨaguasu reve opaete mbaeyoa reta re; 26omboyekuaa vaerä imbaejupi añave, echa jae ko jupi vae jare ombojupi Jesús re güɨrovia vae.

27Jayave, ¿ketɨ pa opɨta kuimbae reta oyembotuicha jese vae? Opa ko okañɨ. ¿Mbae nunga mborookuai rupi pa? ¿Mborookuai oyeapo vae rupi pa? ¡Mbaetɨ ko! Jaeño mborogüɨrovia rupi. 28Jayave, yaikuaa ma, kërai Tumpa oporombojupi mborogüɨrovia rupi, yayapombae reve mborookuai jei vae reta.

29Tumpa jae vi ko judiombae reta iTumpa; mbaetɨ ko judío reta peguaño. 30Echa Tumpa meteiño ko;#Dt 6.4; Gl 3.20. jae ombojupita oyembocircuncidauka vae reta iporogüɨrovia rupi. Jökoraiño vi ombojupita oyembocircuncidaukambae vae reta iporogüɨrovia rupi. 31Jayave, ¿mborogüɨrovia rupi yamboai ra mborookuai? ¡Mbaetɨ ko! Jeieteño ko ñamomɨ̈rata mborookuai.

Currently Selected:

ROMANOS 3: GUABD

Highlight

Copy