ROMANOS 14

Ipɨtu iporogüɨrovia pe vae reta

1Pemboresive kavi ipɨtu iporogüɨrovia pe vae, ërei agüɨye peyoaka vaerä jae ndive. 2Echa amogüe güɨrovia opaete mbaembae ipuere ko jou. Ërei ipɨtu iporogüɨrovia pe vae jou tembíu isoombae. 3Opaete mbae jou jouiño vae, agüɨye togüɨröɨro mbaetɨ mbae jou jouiño vae. Jare jókuae mbaetɨ mbae jou jouiño vae, agüɨye toyangao opaete mbae jou vae re. Echa Tumpa imbae ko. 4Echa ¿kia pa nde reyangao vaerä ambuae vae jembiokuai? Echa iyaño ko ipuereta jei ikavi ko ani ikaviä ko oyapogüe. Ërei ikavita ko, echa yandeYa imbaepuere yae ko oñono kavi vaerä.

5Oime amogüe omboete amogüe araño ïru ara reta güi, ërei ïru vae, opaete ara reta omboyovakeño. Metei vae ñavo toikuaa kavi maera oyemongeta körai. 6Jókuae omboete ara ïru ara reta güi vae, oyapo ko yandeYa peguarä. Jare opaete ara reta oyovakeño chupe vae, yandeYa peguarä vi ko oyapo. Opaete mbae jou jouiño vae, yandeYa omboete vaerä ko jou. Echa omee yasoropai Tumpa pe. Jaeramiño vi mbaetɨ mbae jou jouiño vae, yandeYa omboete vaerä vi ko mbaetɨ jou. Echa jae omee vi yasoropai Tumpa pe.#Col 2.16.

7Mbaetɨ metei ave yaiko yandeyeupeguaräño. Jaeramiño vi mbaetɨ metei ave ñamano yandeyeupeguaräño. 8Echa yaikove ramboeve, yaiko yandeYa peguarä. Jare ñamano yave, ñamano yandeYa peguarä. Jáeramo, yaikove vae ani ñamano yave, yandeYa imbae reta ko yande. 9Echa kuaerä Cristo omano jare oikove ye, oiko vaerä omanogüe reta ani oikove vae reta iYarä.

10Nde ¿maera pa reyangao jayave nerëtara?, jare nde ¿maera pa reporogüɨröɨro? Echa opaete yande yayemboɨta Cristo jóvai, ñanejäa#2 Co 5.10. vaerä. 11Echa oyekuatía oï körai:

“Che peYa, tae cheyé aeño,

opaete vae oyetavatɨkata cheróvai,

jare opaete vae chemboeteta ko.”#Is 45.23.

12Jökorai metei ñavo yamombeuta Tumpa pe yandeyegua.

13Jáeramo agüɨye mo yayoangao ïru vae ndive, jaeño yaeka agüɨye vaerä ïru oporogüɨrovia vae ogüɨapi yandereko pegua. 14Che aikuaa, jare arovia yandeYa Jesús re, kërai mbaetɨ etei ko mbae ikɨa iyeugüi aeño Tumpa jóvai vae. Ërei oime kia oyemongeta ikɨa ko Tumpa jóvai chupe vae yave, jökorai ko chupe. 15Ërei rembopɨatɨtɨ ïru oporogüɨrovia vae reu vae rupi yave, mbaetɨ ko reporoaɨu. Agüɨye nderembíu jeko pegua tokañɨtei jókuae Cristo omano jese vae. 16Agüɨye emaeño tei ikavimbae vae, ndeve jaekavi vae kotɨ. 17Echa Tumpa iporookuaía mbaetɨ ko mbae jau vae, jae ko jupi vae, mbɨakatu jare yerovia katu Espíritu Santo rupi. 18Echa körai oyeokuai Cristo pe vae, omboyerovia ko Tumpa, jare kuimbae reta güɨrovia katu.

19Jáeramo, yaeka yayombopɨakatu jare ñañomomɨ̈rata vaerä. 20Agüɨye erokomegua Tumpa iparavɨkɨ mbae reu vae rupi. Echa añetete opaete mbaembae ikɨambae ko; ërei ikaviä ko kuimbae ombogüɨapiuka vaerä ïru vae, mbae jou vae rupi. 21Ikavi ko agüɨye reu soo, ani vino, ani oipotagüe mbae ïru oporogüɨrovia vae ipuere ombogüɨapi, omboarasɨ ani ombopɨtu vae. 22Mborogüɨrovia renoi vae, enoi ndeyé aeño Tumpa jóvai. Oyerovia ko, jókuae güɨrovia reve kavi mbae oyapo vae. 23Ërei ipɨa pe oyemongeta jaekaviä ko jókuae jou vae yave, oyemboeko ma ko, echa mbaetɨ oyapo güɨrovia reve kavi. Opaete mbaetɨ yayapo mborogüɨrovia reve vae, mbaeyoa ko.

Currently Selected:

ROMANOS 14: GUABD

Highlight

Copy