SAN MARCOS 15

Güɨraja reta Jesús Pilato jóvai

(Mt 27.1-2,11-14; Lc 23.1-5; Jn 18.28-38)

1Jayave ndeimboveasɨ opa oyemongeta güire sacerdote reta itenondegua reta, tëta guasu pegua reta itenondegua reta, mborookuai re oporomboe vae reta, jare opaete ïru mburuvicha reta oipokua Jesús güɨraja reta Pilato pe omboeterenga. 2Jayave Pilato oparandu Jesús pe:

—¿Nde pa ko jae judío reta juvicha guasu?

Jesús jei chupe:

—Jae ko che.

3Jayave sacerdote reta itenondegua reta omboeko jeta mbaembae re. 4Jayave Pilato oparandu ye Jesús pe:

—¿Maera pa mbaetɨ mbae rere? ¿Reechaä pa jeta mbaembae re ndemboeko reta?

5Ërei Jesús jeseve mbaetɨ etei mbae jei. Jáeramo Pilato ipɨakañɨ jese.

Pilato omboeterenga Jesús omano vaerä

(Mt 27.15-31; Lc 23.13-25; Jn 18.38—19.16)

6Jare Pascua iara ñavo pe Pilato oyorañoi metei tembipɨɨ tëta pegua reta oipota vae. 7Jare tembipɨɨrɨru pe ñogüɨnoi amogüe oporoyuka vae reta. Kuae reta oporoyuka, mburuvicha kotɨ oñemopüa yave. Metei jee ko Barrabás. 8Jare jeta vae yogüeru oiporu Pilato pe, oyapo vaerä chupe reta año ñavo oyapo rami. 9Jayave Pilato jei chupe reta:

—¿Peipota pa ayorauka vaerä peve judío reta juvicha guasu?

10Echa jae oikuaa sacerdote tenondegua reta omee Jesús chupe iyakatúä jese ramo. 11Ërei sacerdote reta itenondegua reta omboemboe jeta vae reta oyorauka vaerä Barrabás. 12Jayave Pilato oparandu chupe reta:

—Jayave, ¿mbae pa peipota ayapo kuae judío reta juvicha guasu, pere chupe vae pe?

13Jayave jae reta osapúkai reve jei:

—¡Eikutuuka kurusu re!

14Ërei Pilato oparandu chupe reta:

—¿Mbae ikavimbae vae pa oyapo?

Ërei jae reta jeieteño osapúkai reve jei:

—¡Eikutuuka kurusu re!

15Jayave Pilato oyorauka chupe reta Barrabás, oipota ombopɨakatu reta ramo. Jare Pilato oinupauka güire Jesús chikote pe, omboeterenga oyekutuuka vaerä kurusu re.

16Jayave mburuvicha isundaro reta güɨraja Jesús mburuvicha oporojäa pe, jare omboatɨ jese opaete ïru sundaro reta. 17Jayave sundaro reta omondeuka Jesús pe temimonde pɨ̈ta vae, jare oñono reta iñäka re äka-regua ñurati oñeopegüe. 18Jayave omboɨpɨ omboete raanga, jei reta:

—¿Kërai pa reï judío reta Juvicha guasu?

19Jare täkuarasɨ oiporu reta iñäka re. Jare ondɨvɨ reta jese, jare oyetavatɨka reta jae jóvai omboete raanga vaerä. 20Jare opa oyóyai reta güire, sundaro reta omboi chugüi temimonde pɨ̈ta vae, jare omondeuka reta ye chupe jemimonde ae. Jayave güɨraja reta oikutu vaerä kurusu re.

Jesús oyekutu kurusu re

(Mt 27.32-44; Lc 23.26-43; Jn 19.17-27)

21Metei kuimbae Simón, Cirene pegua, Alejandro jare Rufo tu,#Ro 16.13. oasa ou jokoropi iko kotɨ güi vae pe, sundaro reta güɨrajauka Jesús ikurusu. 22Jare sundaro reta güɨraja Jesús Gólgota jee vae pe (kuae oipota jei: “Äkagüe-renda”). 23Jayave omee reta Jesús pe vino oyea mirra ndive vae. Ërei Jesús mbaetɨ jou. 24Sundaro reta opa güire oikutu kurusu re, omboyao reta oyoupe Jesús jemimondegüe, oyombosuerte reta jese. Oikuaa vaerä mbae nunga etei ra güɨrajata iyeupe vae.#Sal 22.18.

25Jare ndeimbove yave ora chau ma yave, oikutu reta Jesús kurusu re. 26Jare oñono reta kurusu re Jesús iñäka iárambo oyekuatía mbae re ko omboeko vae: “JUDÍO RETA JUVICHA GUASU.” 27Jare sundaro reta oikutu vi kurusu re mókoi imonda vae reta Jesús ndive, metei iyakatu kotɨ jare ïru iyasu kotɨ.#Is 3.12. 28Jökorai oyembopo Tumpa Iñee jei vae: “Oyepapa iyoa vae reta ndive.” 29Jare oasa vae reta oñeäkambovava#Sal 22.7; 109.25. reve jei ikavimbae vae Jesús kotɨ körai:

—¡Aa! Nde rere rembosururuta ko tupao jare remopüa yeta mboapɨ ara pe.#Mc 14.58; Jn 2.19. 30Eyeepɨ añave, jare egüeyɨ kurusu güi.

31Jaeramiño vi sacerdote reta itenondegua reta jare mborookuai re oporomboe vae reta imiari oyoupe yave oyóyai reta jei reve:

—Jae oepɨ ïru vae reta. Ërei jae oyeepɨä ma. 32Jae ko Cristo, Israel pegua reta Juvicha guasu yave, togüeyɨ añave kurusu güi, yaecha vaerä, jare yarovia vaerä.

Jare Jesús ndive oyekutu ñogüɨnoi vae reta vi jei ikavimbae vae chupe.

Jesús omano

(Mt 27.45-56; Lc 23.44-49; Jn 19.28-30)

33Jare kuaraɨ ara mbɨte güive mboapɨ ora rupi oyembopɨtumimbi opaete ɨvɨ pe. 34Jare mboapɨ ora ma kaaru yave, Jesús täta osapúkai reve jei:

—Eloi, Eloi, ¿lama sabactani? (Kuae oipota jei: “CheRu Tumpa, cheRu Tumpa, ¿maera pa chereeya?”)#Sal 22.1.

35Amogüe joko pe ñogüɨnoi vae reta oendu yave jei reta:

—Mase, Elías oenɨi.

36Jare metei vae osɨi ojo omoäkɨ esponja vinagre pe, jare oñono täkuarasɨ re, jare omondo Jesús jou vaerä,#Sal 69.21. jei reve:

—Peäro. Yaecha ra ou Elías ombogüeyɨ vaerä.

37Jayave Jesús täta osapúkai, jare omano. 38Jayave asoya tupao imboyaoa#Ex 26.31-33; 2 Cr 3.14. osoro mbɨte rupi ɨvate güi ɨ́vɨkotɨ. 39Jare cien sundaro vae juvicha Jesús jóvai oyemboɨ oï vae oecha yave kërai osapúkai jare omano, jei:

—¡Añetete yepe, kuae kuimbae jae Tumpa Taɨ!

40Jare amogüe kuña reta omae ñogüɨnoi mombɨrɨ güi. Kuae reta ipɨte pe ñogüɨnoi María Magdalaɨgua, María, Jacobo taɨrusu vae jare José ichɨ. Jare Salomé. 41Jesús Galilea#Lc 8.2-3. rupi oikose yave, kuae kuña reta yogüɨraja jae ndive oyeokuai vaerä chupe. Jare jeta ïru kuña yogüeru jae ndive Jerusalén pe vae reta joko pe ñogüɨnoi vi.

José oñono Jesús jetegüe tɨvɨa pe

(Mt 27.57-61; Lc 23.50-56; Jn 19.38-42)

42Jókuae ara opaete judío reta oyeapokatu ñogüɨnoi pɨareve peguarä. Echa pɨareve pe ko ara mbutuu. Jáeramo kuaraɨ oike ma yave, 43metei kuimbae tëta guasu Arimatea pegua José jee vae oipoɨumbae reve ojo Pilato oïa pe, oyerure chupe Jesús jetegüe re. José jae ko mburuvicha imboetea vae. Jae oäro vi oiko Tumpa iporookuaía. 44Jare Pilato ipɨakañɨ Jesús omano ma vae re. Jayave oenɨi sundaro reta juvicha, jare oparandu chupe omano ra Jesús vae. 45Jare sundaro reta juvicha omombeu chupe. Jayave Pilato jei José pe:

—Ndepuere reraja Jesús jetegüe.

46Jayave José ogua nieso. Jare ombogüeyɨ ma yave Jesús jetegüe, oñoma pɨpe. Jayave oñono metei tɨvɨa ɨ̈vavira oyeyoo vae pe, jare omboyapayere metei ita tɨvɨa jöke re. 47Jare María Magdalaɨgua jare José ichɨ María oecha kia pe oñono Jesús jetegüe.

Currently Selected:

SAN MARCOS 15: GUABD

Highlight

Copy