SAN MATEO 4

Aña guasu omomiari Jesús oyavɨuka vaerä tëi chupe

(Mc 1.12-13; Lc 4.1-13)

1Jayave Espíritu Santo güɨraja Jesús ñuu pe. Jare joko pe aña guasu omomiari oyavɨuka vaerä#Heb 2.18; 4.15. tëi chupe.

2Jare Jesús cuarenta ara rupi ma oyekuaku tembíu güi yave iyɨmbɨaɨ. 3Jayave aña guasu omomiari oyavɨuka vaerä chupe, jei:

—Nde ko Tumpa Taɨ yave, ere kuae ita reta pe toyepoepɨ mbɨyaperä.

4Ërei Jesús jei chupe:

—Tumpa Iñee pe oyekuatía oï körai: “Mbɨyape reñoä ko kuimbae oikoveta, jaeño opaete Tumpa Iñee re.”#Dt 8.3.

5Jayave aña guasu güɨraja Jesús tëta guasu Jerusalén pe jare omboyeupi tupao iyapɨte re. 6Jei chupe:

—Nde ko Tumpa Taɨ yave, ea kuae güi. Echa Tumpa iñee pe oyekuatía oï körai:

“Tumpa oyokuaita iaraɨgua reta oyangareko vaerä nderé.

Jare ipo pe ndeoko retata,

agüɨye vaerä nepɨ̈sa-yeyuka ita re.”#Sal 91.11-12.

7Jayave Jesús jei chupe:

—Tumpa Iñee pe oyekuatía vi oï körai: “Agüɨye ejäa ndeYa Tumpa ipɨaguasu.”#Dt 6.16.

8Jayave aña guasu jekuae güɨraja ye Jesús metei ɨvɨtɨ guasu ɨvate yae vae re, jare oechauka chupe opaete ɨvɨ pegua mborookuaía reta, iyemboetea reve reve. 9Jare aña guasu jei chupe:

—Tamee ndeve opaete kuae, reyetavatɨka chemboete yave.

10Jayave Jesús jei chupe:

—Esɨrɨ chegüi, Satanás. Echa Tumpa Iñee pe oyekuatía oï körai: “NdeYa Tumpa emboete, chupeño eyeokuai.”#Dt 6.13.

11Jayave aña guasu osɨrɨ Jesús güi, jare jupivei araɨgua reta yogüeru oyeokuai chupe.

Jesús omboɨpɨ iparavɨkɨ

(Mc 1.14-20; Lc 4.14-15; 5.1-11; 6.17-19)

12Jesús oikuaa yave Juan oime oñoña reta tembipɨɨrɨru pe,#Mt 14.3; Mc 6.17; Lc 3.19-20. ojo ye Galilea pe. 13Mbaetɨ ma oiko Nazaret pe, ojo tëta guasu Capernaum pe#Jn 2.12. jare joko pe oiko. Capernaum ko oï ɨguasu jembeɨ pe Zabulón jare Neftalí iɨvɨ pe. 14Oyembopo vaerä ñeemombeúa Isaías jei yave:

15“Zabulón iɨvɨ jare Neftalí iɨvɨ,

ɨguasu jembeɨ pe, Jordán jovaicho pe,

Galilea judiombae vae reta jëta.

16Pɨtumimbi pe yogüɨrekose vae reta oecha ma tembipe tuicha yae vae.

Mano ipo pe#Is 9.1-2. yogüɨrekose vae reta re

tembipe oesape.”

17Jayave güive Jesús omboɨpɨ omombeu Tumpa iñee, jei: “Peeya peyemongeta ikavimbae vae pepɨa pe penoi vae. Echa ou ma oväe#Mc 3.2. araɨgua mborookuaía.”

Jesús oenɨi irundɨ yeporaka regua

(Mc 1.16-20; Lc 5.1-11)

18Jesús oguata ramboeve ɨguasu Galilea pegua jembeɨ rupi, oecha Simón, Pedro jee vae, jare tɨvɨ Andrés. Jae reta pɨsa pe oyeporaka ñogüɨnoi ɨguasu pe. Echa jae reta ko yeporaka regua reta. 19Jare Jesús jei chupe reta:

—Peyu cherupíe, jare che poapota peyeporaka vaerä ïru vae reta re.

20Jayave jae reta oeya voi ipɨsa reta, jare yogüɨraja jupíe.

21Jesús oasa joko güi, jare oecha mókoi Zebedeo taɨ reta: Jacobo jare tɨvɨ Juan. Kuae reta oyapo katu ñogüɨnoi pɨsa reta barco raɨ pe tu ndive. Jayave Jesús oenɨi reta. 22Jayave jae reta oeya voi barco raɨ jare tu, jare yogüɨraja jupíe.

Jesús omboe jeta vae

(Lc 6.17-19)

23Jare Jesús ojo opaete Galilea rupi, oporomboe reve judío reta itupao ñavo rupi. Omombeu ñee ikavi vae araɨgua mborookuaía regua, jare ombogüera imbaerasɨ vae reta oipotagüe mbaerasɨ güi.#Mt 9.35; Mc 1.39. 24Jare opaete ɨvɨ Siria pegua reta pe jërakua Jesús oyapo vae regua. Jare güeru reta chupe oipotagüe mbae jasɨ chupe vae reta, oiporara oipotagüe mbaerasɨ vae, jare aña oya jese vae reta, omano mano vae reta jare jete jëogüe vae. Jare Jesús ombogüera reta.

25Yogüɨraja Jesús jaɨkue jeta vae Galilea güi, ɨvɨ Decápolis güi, tëta Jerusalén güi, ɨvɨ Judea güi jare ɨ̈aka Jordán jovaicho güi.

Currently Selected:

SAN MATEO 4: GUABD

Highlight

Copy