SAN LUCAS 18
18
Imemano vae jare mburuvicha oporojäa vae re oyembojaanga vae
1Jare Jesús imiari ye jemimboe reta pe ombojaanga reve. Omboe vaerä kërai ikavi ko oyerure avei vaerä Tumpa pe jare agüɨye vaerä ikuérai. 2Jare jei chupe reta: “Oiko metei tëta guasu pe metei mburuvicha oporojäa vae. Oipoɨuä etei Tumpa güi jare iporomboeteä etei. 3Jare oiko vi jókuae tëta guasu pe metei kuña imemano vae; jae ojo avei mburuvicha oporojäa vae pe jei: ‘Chereepɨ cherovaicho güi.’ 4Mbovɨ ara rupi mburuvicha oporojäa vae mbaetɨ oyapo mbae oepɨ vaerä. Ërei jaɨkue rupi jei iyeupe: ‘Yepe tëi aipoɨuä Tumpa güi jare cheporomboeteä etei, 5ërei kuae kuña imemano vae chemoambeko yae ramo, aepɨta. Echa mbaetɨ yave, jekuaeñoi outa chemoambeko.’ ”
6Jayave yandeYa jei: “Jökorai jei jókuae mburuvicha oporojäa vae jupimbae. 7Ërei Tumpa, ¿Ngaraa pa oepɨ jembiparavo reta ara rupi jare pɨ̈tu rupi oyerure chupe vae? ¿Ipɨaguasuta ra oepɨ vaerä? 8Che jae peve, jarembae voi ko oepɨ retata. Ërei che Kuimbaerä ayeapo vae ayu ye yave, ¿aväeta ra oporogüɨrovia vae reta?”
Fariseo jare mburuvicha peguarä okovara vae re oyembojaanga vae
9Jare Jesús oïa pe ñogüɨnoi amogüe oyererovia katu jupi ko jare oporogüɨröɨro vae reta. Jesús jei chupe reta ombojaanga reve: 10“Mókoi kuimbae yogüɨraja tupao pe oyerure. Metei ko fariseo jare ïru mburuvicha peguarä okovara vae. 11Fariseo oyemboɨ jare oyerure oyembotuicha reve körai: ‘Cheru Tumpa, amee yasoropai ndeve. Echa che mbaetɨ aiko ïru kuimbae reta rami. Jókuae reta imonda, mbaetɨ jupi, oyapo aguasa. Mbaetɨ vi che kuae mburuvicha peguarä okovara vae rami. 12Che ayekuaku tembíu güi mókoi vese semana pe, jare amee ndeve diezmo opaete amongana vae güi.’ 13Ërei jókuae mburuvicha peguarä okovara vae oyemboɨ oï mombɨrɨño, mbaetɨ ikɨ̈reɨ jovaɨva kërai yepe ara kotɨ. Jaeño okua okua ipɨtía re jei reve: ‘CheRu Tumpa, cheparareko. Echa che cheyoa vae ko.’ 14Che jae peve, Tumpa iñɨ̈ro jókuae mburuvicha peguarä okovara vae pe iyoa re, jökorai ojo ye jëta pe. Ërei mbaetɨ iñɨ̈ro jókuae fariseo pe iyoa re. Echa kia nunga oyembotuicha vae, oñemomichiukata ko. Jare oñemomichi vae, oyembotuichaukata ko.”#Pr 19.23; Mt 23.12; Lc 14.11.
Jesús jei ñee kavi michia reta re
(Mt 19.13-15; Mc 10.13-16)
15Jare amogüe vae güeru Jesús oïa pe michia reta, Jesús oñono vaerä ipo jese reta. Ërei jemimboe reta oecha jókuae yave, oñeengata jókuae jerúa reta pe. 16Ërei Jesús oenɨi reta jare jei:
—Pemaeño michia reta re yogüeru vaerä chekotɨ. Agüɨye peyopia. Echa, kuae rami vae reta ko yogüɨreko Tumpa iporookuaía pe.
17Añete che jae peve, mbaetɨ yave pemboresive Tumpa iporookuaía metei michia rami, ngaraa peike Tumpa iporookuaía pe.
Taɨrusu oikokatu vae
(Mt 19.16-30; Mc 10.17-31)
18Jare metei mburuvicha oparandu Jesús pe, jei:
—Oporomboe vae, jupi vae. ¿Mbae pa ayapota anoi vaerä tekove opambae vae?
19Jayave Jesús jei chupe:
—¿Maera pa chereenɨi jupi vae pe? Mbaetɨ kia jupi vae, jaeño ko Tumpa. 20Nde reikuaa ko mborookuai reta: “Agüɨye eyuvanga menda re;#Ex 20.14; Dt 5.18. agüɨye eporoyuka;#Ex 20.13; Dt 5.17. agüɨye ndemonda;#Ex 20.15; Dt 5.19. agüɨye ere añetembae nderapicha kotɨ;#Ex 20.16; Dt 5.20. emboete nderu jare ndesɨ.”#Ex 20.12; Dt 5.16.
21Jayave jae jei chupe:
—Chetaɨrusu güive aiko opaete kuae mborookuai reta jeigüe rupi.
22Jesús kuae oendu yave, jei chupe:
—Oimeño mbae oata ndeve. Emee opaete mbaembae renoi vae, jare jepɨgüe emee paravete vae reta pe, jayave renoita mbaembae ara pe. Javoi eyu cherupíe.
23Ërei kuae oendu yave, ipɨatɨtɨ yae. Echa oikokatu yae ko. 24Jare Jesús oecha yave ipɨatɨtɨ, jei:
—Yavai yae ko oike vaerä Tumpa iporookuaía pe#Pr 11.28. mbaeyekou güɨnoi vae reta. 25Echa camello yavaiä oike yuu jesakua rupi oikokatu vae oike vaerä Tumpa iporookuaía pe vae güi.
26Jayave kuae oendu vae reta jei:
—Jökorai yave, ¿kia pa ipuereta oyemboasauka?
27Jayave Jesús jei chupe reta:
—Yavai yae ɨvɨ pegua reta pe vae, Tumpa pe mbaetɨ ko.
28Jayave Pedro jei Jesús pe:
—Mase, ore roeya opaete orembaembae royu vaerä nderupíe.
29Jare Jesús jei chupe reta:
—Añete che jae peve, oime yave kia oeya jo, ani tu reta, tɨkeɨ reta ani tɨvɨ reta, ani jembireko, ani imichia reta Tumpa iporookuaía jeko pegua vae, 30jeta yaeta ko jekovia chupe ɨvɨ pe oiko ramboeve, jare taɨkue rupi Tumpa omeeta chupe tekove opambae vae.
Jesús jekuae omombeu ye omanota ko vae
(Mt 20.17-19; Mc 10.32-34)
31Jayave Jesús oenɨi jókuae doce jemimboe reta, jare jei chupe reta: “Mase, ko yaja Jerusalén kotɨ, jare opaete ñeemombeúa reta oikuatía che Kuimbaerä oyeapo vae regua vae, oyembopota ko cheré. 32Jare chemeeta judiombae vae reta ipo pe. Jare jae reta cheyóyai yoyaita, oyapota ikavimbae vae cheve, jare ondɨvɨta cheré. 33Jare chenupa reta güire chikote pe cheyuka retata. Ërei mboapɨ araa pe aikove yeta.”
34Ërei jemimboe reta mbaetɨ etei oikuaa mbae ra oipota jei chupe reta vae. Echa jókuae ñee reta oñeomi oï chugüi reta. Yavai yae chupe reta oikuaa vaerä mbae ra oipota jei vae.
Kuimbae jesambae vae
(Mt 20.29-34; Mc 10.46-52)
35Jare Jesús köiño ma ou Jericó güi yave, metei jesambae vae oguapɨ oyerure oï mbae re tape jembeɨ pe. 36Jae oendu jeta vae oasa ñogüɨnoi jokoropi yave, oparandu jókuae re. 37Jayave omombeu reta chupe Jesús Nazaret-ɨgua ko oasa oï vae. 38Jayave jesambae vae osapúkai jei reve:
—¡Jesús, David taɨ, cheparareko!
39Jare tenonde yogüɨraja vae reta oñeengata chupe omokïrii vaerä. Ërei jesambae vae jeiete osapúkai:
—¡David taɨ, cheparareko!
40Jayave Jesús oyemboɨ, jare omondo güeru jae oïa pe. Jare jesambae vae ou yave Jesús oïa pe, oparandu chupe:
41—¿Mbae pa reipota ayapo ndeve?
Jesambae vae jei:
—CheYa, tamae.
42Jayave Jesús jei chupe:
—Emae. Rerovia cheré ramo rekuera.
43Jupivei omae, jare ojo Jesús jupíe omboete reve Tumpa. Jare opaete joko pe ñogüɨnoi vae reta kuae oecha yave, omboete Tumpa.
Currently Selected:
SAN LUCAS 18: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
