GÉNESIS 7

Ɨporu guasu

1Jaɨkue rupi yandeYa jei Noé pe: “Eike nde jare opaete ndero pegua reta ndive arca pe. Echa aecha ndeño jupi reguata cheróvai opaete vae reta güi. 2Mɨmba oyeu vae reta güi reiparavota chiu yoayu, mɨmba kuimbae jare mɨmba kuña. Ërei mɨmba oyeumbae reta güi reiparavota metei yoayuño, metei mɨmba kuimbae jare metei mɨmba kuña. 3Jaeramiño vi güɨra reta güi chiu yoayu, güɨra kuimbae jare güɨra kuña, jökorai jae reta vi oñemuña ye vaerä kuae ɨvɨ pe. 4Echa che amongɨta chiu araa pe, kuae ɨvɨ iárambo cuarenta ara jare cuarenta pɨ̈tu rupi. ¡Jökorai amokañɨteita ɨvɨ iárambo güi opaete oikove vae ayapogüe reta!” 5Jare Noé oyapo opaete yandeYa oyókuai rami.

6Jökorai Noé seisciento año ma güɨnoi yave ou ɨporu guasu ɨvɨ iárambo. 7Jare ɨporu guasu outa vae jeko pegua Noé oike arca#Mt 24.38-39; Lc 17.27. pe jembireko ndive jare opaete taɨ reta jembireko reve reve. 8Jaeramiño vi opaete mɨmba oyeu vae reta jare mɨmba oyeumbae reta, güɨra reta vi, jare opaete ipɨtía re oguata vae, 9mókoi mókoi päve oike arca pe Noé ndive; mɨmba kuimbae jare mɨmba kuña, Tumpa oyókuai Noé rami.

10Jökorai chiúa ara pe ou ɨporu guasu ɨvɨ iárambo. 11Noé seisciento año ma güɨnoi yave; mokoía yasɨ re, diecisiete araa pe etei. Jókuae ara osoro ɨguasu jɨru ɨvɨgüɨ güi, jare ara#2 P 3.6. güi oyepɨyere vi ama guasu. 12Jare okɨ ɨvɨ iárambo cuarenta ara jare cuarenta pɨ̈tu. 13Jókuae ara etei Noé oike arca pe jembireko ndive jare taɨ Sem, Cam jare Jafet oike reta jembireko reve reve. 14Jae reta, jare opaete mɨmba reta ñavo ambuaeyee oyougüi vae, ñana rupigua jare tëta rupigua, opaete ipɨtía re oguata vae jare opaete güɨra ñavo ambuaeyee oyougüi vae. 15Yogüeru arca pe Noé ndive opaete oikove vae mókoi mókoi päve. 16Yogüeru mɨmba kuimbae jare mɨmba kuña, Tumpa oyókuai vae rami. Jare yandeYa oyokenda öke chupe reta.

17Jare okɨ ɨvɨ re cuarenta ara; ɨ omboɨpɨ okuakuaa jare oupi arca; jare arca omboɨpɨ ovevɨi ɨ iárambo. 18Jare jeiete oyeupi ɨporu guasu, opaetei oyasoi ɨvɨ; jare arca ɨvate yae ma ovevɨi ɨ iárambo. 19Jare ɨporu guasu oyasoi ɨvɨ; opaete ɨvɨtɨ guasu ɨvate vae reta opa vi oyasoi. 20Ɨporu guasu opa güire oyasoi ɨvɨtɨ guasu, oyapɨraa ye chiu metro rupi. 21Omano opaete oikove vae ɨvɨ iárambo omɨi vae, jökorai vi güɨra reta, jare opaete mɨmba tëta rupigua, jare ñana rupigua, jare opaete ipɨtía re oguata vae, jare opaete kuimbae. 22Opaete ipɨ̈túe re oikove vae, opaete ɨvɨ ipo omano. 23Jökorai opa okañɨtei opaete oikove ɨvɨ iárambo vae: Kuimbae güive opaete mbaemɨmba, jare ipɨtía re oguata vae, jare güɨra reta. Jaeño jembɨre Noé jare opaete jae ndive arca pe oike vae reta. 24Jare ɨguasu tɨpa raiviä ɨvɨ iárambo güi ciento cincuenta ara rupi.

Currently Selected:

GÉNESIS 7: GUABD

Highlight

Copy