GÉNESIS 47
47
1José ou oikuaauka Faraón pe, jare jei:
—Cheru jare cherɨkeɨ reta yogüeru oväe ɨvɨ Canaán güi, ivecha jare iguaka reta ndive, jare oime ñogüɨnoi ɨvɨ Gosén pe. 2Tɨkeɨ reta güi oiparavo pandepo güeru, oikuaauka vaerä Faraón pe. 3Jayave Faraón oparandu José tɨkeɨ reta pe:
—¿Mbaerero pa pe?
Jae reta jei:
—Ore nderembiokuai reta vecha iyangarekoa ko, oreñemuñagüe reta rami.
4Jei reta vi Faraón pe:
—Royu ko roiko vaerä kuae ɨvɨ pe; echa mbaetɨ kapii ore nderembiokuai reta ivecha peguarä, karuai jasɨ yae ko Canaán pe; jáeramo romoñera añave remaeño vaerä ore nderembiokuai reta yogüɨreko ɨvɨ Gosén pe.
5Jayave Faraón imiari José pe jei reve:
—Nderu jare nderɨkeɨ reta yogüeru ndépɨri. 6Ɨvɨ Egipto ndepo pe ko oï; ɨvɨ Gosén emee nderu pe jare nderɨkeɨ reta pe yogüɨreko vaerä pɨpe, jare chugüi reta maangarekoa ikavi vae, peñono cherɨmba iyangarekoa itenondeguarä.
7José güɨraja vi tu Jacob oikuaauka vaerä Faraón pe, Jacob oyapo maraetei Faraón pe omboete reve, 8jare Faraón oparandu chupe:
—¿Mbovɨ año pa renoi?
9Jacob jei chupe:
—Anoi ma ciento treinta año oipota rupi aguata vae, mbovɨ yae jare mbaetɨ ikavi ara reta cherekove pe, jare ndeiño aupitɨ cheñemuñagüe reta yogüɨreko rami.
10Jaɨkue rupi Jacob oyupavo Faraón pe jare oë ojo jóvai güi. 11Jökorai José omee yogüɨreko vaerä tu jare tɨkeɨ reta Egipto pe, ɨvɨ ikavi yae vae pe, Ramesés pe, Faraón jei rami. 12Jare José omongaru tu jare tɨkeɨ reta, opaete jo pegua reta ndive, imichia reta güɨnoi rupi.
José omaemee
13Mbaetɨ etei tembíu opaete ɨvɨ rupi, jare yɨmbɨaɨ jasɨ yae oï ɨvɨ Egipto pe jare ɨvɨ Canaán pe. 14Jare José omboatɨ opaetei korepoti ɨvɨ Egipto pegua jare Canaán pegua tembíu yogüeru ogua chugüi vae re; jare José oñovatu korepoti Faraón jo pe. 15Opa ma korepoti Egipto pe jare Canaán pe ave yave, Egipto pegua reta yogüeru jei José pe:
—Emee tembíu oreve; mbaetɨ jupi romano vaerä nderóvai opa ma korepoti oregüi güiño.
16José jei:
—Korepoti opa ko pegüi yave, peru perɨmba reta jare che tamee peve tembíu mɨmba regua.
17Jayave güeru reta José pe mɨmba, jare José omee chupe reta tembíu: Kavayu regua, vecha regua, guaka regua, jare mburika regua, jökorai jókuae año omee chupe reta tembíu opaete jɨmba reta regua. 18Oasa jókuae año jare omboɨpɨ mokoía año yave, yogüeru reta ye jei José pe:
—Mbaetɨ roikuaku ndegüi korepoti añetete opa ko oregüi vae, jare orerɨmba reta ndembae ma ko; mbaetɨ ye mbae opɨta, jaeño orerete jare oreɨvɨ. 19¿Maera pa romanota nderóvai oreɨvɨ ndive? Oregua jare egua oreɨvɨ tembíu regua, toroiko oreɨvɨ ndive Faraón jembiokuairä; jare emee oreve temitɨ romaetɨ vaerä, ɨvɨ agüɨye vaerä okañɨtei jare roikove vaerä.
20Jayave José ogua opaete ɨvɨ Egipto pegua Faraón imbaerä echa Egiptoɨgua reta omee iɨvɨ yɨmbɨaɨ jasɨ yae vae jeko pegua. Jökorai ɨvɨ ou opɨta Faraón imbaerä. 21Jare Egiptoɨgua reta opa opɨta tembiokuairä tëta guasu rupi, opaete ɨvɨ Egipto rupi. 22Jaeño ete sacerdote reta iɨvɨ mbaetɨ ogua, echa Faraón omee sacerdote reta jembiurä; jare okaru yogüɨreko Faraón omee chupe reta vae güi. Jáeramo mbaetɨ omee reta iɨvɨ.
23Jare José jei opaete vae pe:
—Mase, ko opa ma pogua peɨvɨ ndive Faraón imbaerä, añave ko oï temitɨ jäɨ peñotɨ vaerä. 24Mbaagüɨye reta ñavo güi pemeeta Faraón pe pandepo vae güi metei, jare irundɨ vae pembaerä, peñotɨ ye vaerä jare peiko jese vaerä, pero pegua reta ndive, okaru vaerä pemichia reta.
25Jae reta jei chupe:
—Remee ma roikove vaerä, jare ndepɨakavi oreve. ¡Toroiko Faraón jembiokuairä!
26Jayave José oñono kuae mborookuai opaete ɨvɨ Egipto re, pandepo vae güi metei Faraón peguarä mbaagüɨye reta ñavo güi; jaeño ete sacerdote reta mbaetɨta omee, echa jae reta iɨvɨ mbaetɨ ko opɨta Faraón imbaerä.
Jacob oiporu oyeapo chupe vaerä
27Jökorai Israel ou oiko Egipto pe, ɨvɨ Gosén pe; jare güɨnoi imbaembae pɨpe jare okuakuaa jare oñemuña reta jeta yeyé. 28Jare Jacob oiko Egipto pe diecisiete año; jare opaete reve Jacob oikove ciento cuarenta y siete año.
29Jare oväe ara Israel omano vaerä yave, oenɨi taɨ José, jare jei chupe:
—Añetete ndepɨakatu ko chekotɨ yave, romoñera reñono vaerä ndepo cheu päu pe, jare eyapo che ndive mboroparareko jare jupi vae. ¡Romoñera agüɨye vaerä cheñotɨ Egipto pe! 30Amano ma yave ayea vaerä cheñemuñagüe reta ndive, chereraja kuae Egipto güi jare cheñotɨ jae reta ndive.
Jare José#Gn 49.29-32; 50.6. jei chupe:
—Ayapota nde rere rami.
31Israel jei ye:
—¡Ere Tumpa rovake reyapota ko vae! Jare José jei Tumpa rovake oyapo vaerä.
Jayave Israel itindɨ jupa iñäkandɨta re.
Currently Selected:
GÉNESIS 47: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
