GÉNESIS 41

José omombeu mbae ko Faraón ipaɨu oipota jei vae

1Jare mókoi año ma oasa güire, Faraón opaɨu, ike pe oïecha ɨ̈aka jembeɨ pe; 2jare oecha oyeupi ɨ̈aka güi chiu guaka ipöra yae oyekuaa vae, jare ikɨra kavi vae. Jare yogüeru okaru ñogüɨnoi ɨ̈aka jembeɨ rupi. 3Jare jaɨkue rupi oyeupi vi ɨ̈aka güi chiu guaka pɨ̈chɨi jare ipiru yae vae; jare yogüeru oyemboɨ jókuae guaka ipöra yae vae reta iyɨpɨ pe, ɨ̈aka jembeɨ pe. 4Jare oecha kërai guaka pɨ̈chɨi jare ipiru yae vae reta opa jou jókuae chiu guaka ipöra jare ikɨra yae vae.

Jare Faraón osareko ipaɨu güi. 5Oke ye yave jekuae opaɨu ye: Ike pe oecha chiu jäka trigo jäɨ ngatu jare ipöra yae vae oë metei iɨ güiño. 6Jare oecha vi jaɨkue rupi oë chiu jäka trigo jäɨmbae jare opa ɨvɨtuakuvo oyuka vae; 7jare jaɨkue rupi trigo jäɨ kavimbae vae opa jou jókuae trigo jäɨ ngatu jare ipöra yae vae.

Jare Faraón osareko yave, oecha opaɨu yepe. 8Jare pɨareve pe ndeimbove yave Faraón ipɨakaviä yae, jare omondo oenɨiuka opaete ichoropa vae Egipto pegua, jare iyarakuaa katu vae reta, chupe oyeokuai vae reta; jayave omombeu chupe reta ipaɨu, ërei mbaetɨ kia ipuere oikuaauka chupe mbae ra Faraón ipaɨu oipota jei vae. 9Jayave oporoëɨ vae reta itenondegua omoë iñee jare jei Faraón pe:

—Añave ramo aipo chemaendúa ayavɨgüe re. 10Metei ara Faraón iyarasɨ orekotɨ yave, oreñono tembipɨɨrɨru sundaro ruvicha jëta pe oï vae pe, che jare mbɨyape iyapoa reta itenondegua vi. 11Jae jare che metei pɨ̈tu ropaɨu; jare metei ñavo orepaɨu oime mbae oipota jei. 12Jare oï joko pe ore ndive metei kunumi hebreo, sundaro reta juvicha jembiokuai; jare romombeu chupe, jare jae omombeu oreve mbae ko oipota jei orepaɨu vae; jökorai omombeu metei ñavo vae pe orepaɨu regua. 13¡Jare ou oasa jae jei oreve vae rami etei! Che ayu ye cheparavɨkɨa pe, jare jókuae ïru oyuvɨ reta.

14Jayave Faraón omondo oenɨiuka José; jare güɨnoe reta ɨmambae pegua tembipɨɨrɨru güi, jare José oñapi jendɨvaa, oipoepɨ jemimonde jare ou Faraón jóvai. 15Jare Faraón jei José pe:

—Che apaɨu, ërei mbaetɨ kia ipuere omombeu cheve mbae ra oipota jei chepaɨu vae; ërei aendu nderegua, kërai reendu yave mbaɨu, ndepuere reikuaa jare remombeu mbae ko oipota jei vae.

16Jayave José jei Faraón pe:

—Che aeño mbaetɨ ko anoi mbae cheyé; Tumpa etei ko oikuaauka kavita Faraón pe.

17Jayave Faraón imiari körai José pe:

—Chepaɨu pe aïecha cheyeupe ɨ̈aka jembeɨ pe; 18jare jókuae ɨ̈aka güi oyeupi chiu guaka, ikɨra kavi jare ipöra yae vae, jare okaru ñogüɨnoi ɨ̈aka jembeɨ rupi. 19Kuae reta jaɨkue rupi oyeupi vi chiu guaka, ipiru jare pɨ̈chɨi yae oyekuaa vae; ipɨtu yae reta ipiru güi. ¡Mbaetɨi aecha kuae nunga reta rami vae, opaete kuae ɨvɨ Egipto rupi! 20Jare jókuae guaka ipiru jare pɨ̈chɨi yae vae reta opa jou jókuae ïru chiu guaka ikɨra vae; 21jare oike reta tëi japicha jɨe pe reve mbaetɨ etei mbae vae rami oyekuaa, echa jekuaeñoi ipiru reta tenonde rami.

“Jökorai ayu asareko. 22Apaɨu ye yave aecha ye chiu jäka trigo oë metei iɨ reño, jare jäɨ kavi jare ipöra yae reta. 23Jare kuae reta jaɨkue rupi oë vi chiu jäka trigo jäɨ kavimbae, ɨvɨtuakuvo pe oyemombiruka vae reta. 24Jare jókuae trigo jäɨ kavimbae vae reta opa jou jókuae chiu trigo jäɨ kavi vae; jare amombeu tëi ma ichoropa vae reta pe, ërei mbaetɨ kia ipuere omombeu chepaɨu regua.”

25Jayave José jei Faraón pe:

—Faraón ipaɨu metei vaeño tëi ko; Tumpa ko oechauka ndeve jae oyapota vae. 26Jókuae chiu guaka ipöra vae, chiu año ko; jare jókuae trigo chiu jäka ipöra vae, chiu año vi ko; kuae mbaɨu reta metei vaeño tëi ko. 27Jaeramiño vi jókuae chiu guaka ipiru jare pɨ̈chɨi yae vae reta taɨkue rupi yogüeru vae chiu año vi ko; jare jókuae chiu jäka trigo jäɨ kavimbae, ɨvɨtuakuvo opa oyuka vae reta, chiu año karuai oimeta vae ko. 28Kuae ko jae amombeu añave Faraón pe vae; Tumpa oyapota vae ko oechauka Faraón pe. 29Jayave, oimeta ou chiu año mbaagüɨye kavi opaete kuae ɨvɨ Egipto pe, 30jare jaɨkue rupi oimeta vi ou chiu año etei karuai; jare opaete Egipto pegua reta ñakañɨta tenonde yave jeta ko mbaagüɨye vae güi, jare karuai oporomombaraveteta oipota rupi. 31Jare kuae mbaarɨvo kavi opata ko karuai jeko pegua, echa ngaraa etei ikavi kuri karuai. 32Jare Faraón opaɨu mókoi ye ramo; Tumpa jei vae añetete oasata ko, jare Tumpa jaɨai yae oï oyapo vaerä kuaekuae reta.

33“Jáeramo ikavi mburuvicha guasu Faraón oeka vaerä iyeupe metei kuimbae iyarakuaa katu vae jare oikatu vae, jare eñono toyangareko opaete ɨvɨ Egipto re. 34Kuae toyapo Faraón, toñono mburuvicha reta ɨvɨ Egipto re; jare toñovatu reta jeta tembíu, pandepo ñavo güi toñovatu metei, kuae chiu año rupi ikavi yaeta mbaagüɨye vae güi. 35Tomboatɨ reta jeta tembíu, kuae año reta ikavi yaeta vae güi; jare tomboatɨ reta jeta trigo Faraón imbaepuere igüɨ pe, jare toñovatu reta oime vaerä tembíu tëta reta peguarä. 36Jare toñeñovatu toï jókuae tembíu kuae tëta guasu peguarä, jókuae chiu año karuai oimeta Egipto pe vae peguarä; jayave kuae tëta guasu pegua reta ngaraa jovaruru yɨmbɨaɨ güi.”

José oï mburuvicharä Egipto pe

37Jókuae ikavi yae Faraón pe jare iyɨvɨrigua reta pe. 38Jayave Faraón jei iyɨvɨrigua reta pe:

—¿Kia pe ye pa ñaväeta kuae kuimbae rami vae, Tumpa iespíritu oï jese vae?

39Faraón jei José pe:

—Tumpa etei oikuaauka kuaekuae ndeve, echa mbaetɨ ye kia iyarakuaa katu jare oikatu nde rami vae. 40Jare añave güive reïta cherëta pe#Hch 7.10. tenondeguarä jare nde rere rami toyeapo cheɨvɨ pe; jaeño ete che aïta ndetenondeguarä.

41Faraón jei ye José pe:

—Ko añave roñono opaete ɨvɨ Egipto iyangarekoarä.

42Jayave Faraón oekɨ ipoäka güi moäka-vera oñono José ipoäka re, jare omboemimondeuka temimonde tïiasɨ yae vae pe jare oñono mboɨ oro pegua iyayu re. 43Jare omboyeupiuka mburuvicha iguataka ïru pe jare osapúkai reta jenonde rupi körai: “¡Peyetavatɨka opaete vae!” Jökorai oñono mburuvicha guasurä opaete ɨvɨ Egipto re.

44Faraón jei José pe:

—Yepe tëi ko che Faraón mburuvicha guasu; ërei nde reporookuaimbae reve ngaraa etei kia ipo jare ipɨ omomɨi opaete kuae Egipto pe.

45Jare Faraón ombojee José Zafnat-panea pe, jare omee jembirekorä Asenat, jae ko sacerdote Potifera tëta On pegua tayɨ. Jare José oë oguata opaete ɨvɨ Egipto rupi. 46José güɨnoi treinta año, güeru reta Faraón mburuvicha guasu Egipto pegua jóvai yave.

Jare José oë Faraón jóvai güi jare opa omboapɨ oguata ɨvɨ Egipto. 47Jókuae chiu año rupi mbaagüɨye kavi yae, jare oarasai mbaembae reta. 48José omboatɨ jókuae chiu año rupi oime jeta mbaagüɨye kavi ɨvɨ Egipto pe vae güi. Jare oñovatu tëta ñavo rupi, iyɨ́vɨri kó reta ñogüɨnoi vae ñavo güi. 49José omboɨru jeta yae trigo, ɨguasu jembeɨ rupi ɨvɨkuitï oï vae rami; jare jeta yae vae jeko pegua mbaetɨ oyepapa, echa yaipapa rapeä mbaembae reta.

50Jökorai oa José pe mókoi taɨ reta, ndei ou mbove tenondegua año karuai; jae ko Asenat imembɨ reta; Asenat ko jae Potifera sacerdote tëta On pegua tayɨ. 51Jare José taɨrɨpɨ ombojee Manasés, echa jei iyeupe: “Tumpa etei chemoakañɨ opaete tembiporara reta güi jare opaete cherëtara reta güi.” 52Taɨ taɨkuegua ombojee Efraín, echa jei iyeupe: “Tumpa chemborɨ jare chemboyekou kuae ɨvɨ aiporaraa pe.”

53Jökorai opa oasa chiu año mbaeyekou iara oiko Egipto pe vae. 54Jare omboɨpɨ oväe chiu año rupi karuai yaeta vae,#Hch 7.11. José jei rami; jare ou karuai opaete tëtaguasu reta rupi, ërei opaete ɨvɨ Egipto pe oime tembíu.

55Jeiete yae ma karuai Egipto pe yave yogüeru opaete vae oeka tembíu Faraón pe; ërei Faraón jei Egiptoɨgua reta pe: “Pekua José oïa pe jare peyapo opaete jae iporookuai.”#Jn 2.5.

56Jare opaetei ɨvɨ Egipto rupi karuai. Jayave José oipea opaete tembiurɨru oime oïa rupi, jare omboɨpɨ omee tembíu Egiptoɨgua reta pe, echa jeiete yae ma ko karuai ɨvɨ Egipto pe. 57Jare opaete ketɨ ketɨ güi yogüeru Egipto pe ogua vaerä tembíu, echa karuai yae oï opaete ɨvɨ rupi.

Currently Selected:

GÉNESIS 41: GUABD

Highlight

Copy