GÉNESIS 27

Isaac omee mborerekua

1Isaac indechi yae ma jare jesa ogüe ma, mbaetɨ ma oecha yave, metei ara oenɨi taɨ Esaú jare jei chupe:

—¡Cheraɨ!

—Ko aï cheru —jei taɨ chupe.

2—Mase, ko chendechi yae ma, güɨramoiño ara outa oväe amano vaerä —jei Isaac—, 3eipɨɨ añave ndegüɨrapa jare uvɨ, jare ekua kaa kotɨ eeka eyuka mbae, jare eru cheve nderembia. 4Eyapo tembíu che ayúe rami, jare eru takaru, jae vaerä ñee kavi ndekotɨ ndei amano mbove.

5Ërei Rebeca oendu oï Isaac imiari Esaú pe vae; jare Esaú oë ojo kaa kotɨ omaepïaro vaerä, güeru vaerä jembia tu peguarä, 6jayave Rebeca jei imembɨ taɨkuegua Jacob pe:

—Mase, che aendu nderu imiari nderɨkeɨ Esaú ndive, jare jei chupe: 7“Eru cheve nderembia, jare eyapo tembíu akaru vaerä, jae vaerä ñee kavi ndekotɨ yandeYa jóvai, ndei amano mbove.” 8Añave nde chemembɨ, eyapo che jae ndeve vae: 9Ekua mɨmba ñogüɨnoia pe, jare eru cheve mókoi kavara raɨ ikɨra vae, jare che tayapo tembíu nderu jembiyúe rami. 10Jare eraja nderu pe, okaru vaerä, jei vaerä ñee kavi ndekotɨ ndei omano mbove.

11Ërei Jacob jei ichɨ Rebeca pe:

—Mase, cherɨkeɨ Esaú ko kuimbae javuku vae, jare che mbaetɨ. 12Güɨramoi opokota cheru cheré jare chekuaata, jare omaeta cheré oyuvanga katu vae ko che, jare ñee kavi jekovia pe aruta cheyé yepopeyu.

13Jare ichɨ jei chupe:

—Chemembɨ, cheré toï jókuae yepopeyu, eyapo che jae vae, ekua eru cheve kavara raɨ.

14Jayave jae ojo kavara raɨ oipɨɨ jare güeru ichɨ pe; jare ichɨ oyapo tembíu tu jembiyúe rami, 15jare Rebeca güɨnoe Esaú jemimonde jepɨ vae jare ikavigüe jae güɨnoi vae, jare omondeuka Jacob pe, imembɨ taɨkuegua pe. 16Jare oñova ipo jare iyayu jaambaea rupi kavara raɨ ipiregüe pe, 17jare omee imembɨ Jacob ipo pe tembíu jare mbɨyape oyapogüe. 18Jayave jae ojo tu pɨri jare jei:

—¡Cheru!

—Ko aï. ¿Kia nunga cheraɨ pa nde? —jei Isaac.

19Jayave Jacob jei tu pe:

—Esaú nderaɨ tenondegua ko che; ayapo nde rere cheve rami: Epüa añave eguapɨ jare jeu cherembia, jare ere ñee kavi chekotɨ.

20Jayave Isaac jei taɨ pe:

—¿Kërai pa jarembae mbatee reväe cheraɨ?

—YandeYa Tumpa chemborɨ aväe vaerä jarembae —jei tu pe.

21Jare Isaac jei Jacob pe:

—Eya katu cheré apoko vaerä nderé cheraɨ, Esaú ra nde ani ambuae ra.

22Jacob oya katu tu re opoko vaerä jese; opoko jese jare jei: “Neñee Jacob iñee, ërei ndepo Esaú ipo.”

23Jare mbaetɨ oikuaa, echa ipo javuku Esaú ipo rami; jare ndei ñee kavi jei ikotɨ mbove oparandu chupe:

24—¿Jae pa nde cheraɨ Esaú?

Jacob jei chupe:

—Jae ko che.

25Jare tu jei chupe:

—Eru katu cheve nderembia jau vaerä, jare tae ñee kavi ndekotɨ.

Jare Jacob güɨroya katu jese jare okaru Isaac; güeru vi chupe vino jare oɨu jese. 26Jare tu Isaac jei chupe:

—Eya katu cheré jare cherovapɨte cheraɨ.

27Jacob oya katu jese jare oovapɨte; jare Isaac oëtu vi jemimonde, jare jei ñee kavi ikotɨ, jei reve:

“Mase, cheraɨ ipiche renoi,

kaa, yandeYa iporerekua jese vae ipichegüe renoi.

28Tumpa tomee ndeve ɨsápɨi ara güi,

jare mbaagüɨye ɨvɨ pegua,

jeta trigo jare uva tɨgüegüe.

29Toyeokuai ndeve opaete vae,

Tëtaguasu reta toyetavatɨka nderóvai;

eporookuai nerëtara reta re.

Ndesɨ imembɨ reta toyetavatɨka nderóvai.

Yepopeyu toï, oyepopeyu nderé vae re,

jare mborerekua toï jei ñee kavi ndekotɨ vae reta re.”#Gn 12.3. #Heb 11.20.

30Isaac opa jei ñee kavi Jacob kotɨ, jare Jacob oë ramo ete tu Isaac jóvai güi yave, Esaú ou oväe kaa kotɨ güi. 31Jare jae oyapo vi tembíu jëe ngatu vae, güɨraja tu pe, jare jei:

—Epüa cheru, jare jeu cherembia, jare ere ñee kavi chekotɨ.

32Jayave tu Isaac jei chupe:

—¿Kia pa nde?

Jae jei chupe:

—Che ko Esaú, nderaɨrɨpɨ.

33Isaac orɨrɨi yae reve jei:

—¿Kia pa güeru kuae pe jembia cheve, jare jau ndei reyu mbove? Che jae ma ñee kavi ikotɨ jare oiko kavita.

34Esaú oendu yave tu iñee, täta jäse oyaeo jasɨ katu reve jare osapúkai reve jei chupe:

—¡Cheru, ere vi cheve ñee kavi!

35Ërei Isaac jei chupe:

—Ou nderɨvɨ chembotavɨ, jare opɨ̈ro ñee kavi ndembaerä tëi vae.

36Esaú jei:

—¡Jaekavi pembojee Jacob! Echa mókoi ma opɨ̈ro chegüi, tenonde yave membɨrɨpɨyekou#Gn 25.29-34. jare añave ñee kavi.

Jei ye chupe:

—¿Mbaetɨ pa reñovatu kërai yepe ñee kavi cheve?

37Jayave Isaac jei chupe:

—Mase, che amee Jacob pe mbaepuere güɨnoi vaerä nderé, jare amee chupe opaete jëtara reta jembiokuairä, jeta trigo jare vino. ¿Mbae ye pa ayapota ndeve cheraɨ?

38Esaú jei tu pe:

—¿Cheru, metei peguaño pa renoi ñee kavi? ¡Ere ñee kavi chekotɨ cheru!

Jayave Esaú jäse oyaeo.#Heb 12.17.

39Jayave tu Isaac jei chupe:

“Mombɨrɨ reikota kuae ɨvɨ kavi güi,

jare ama ara güi oa vae güi.

40Reñeraroagüe reyereroasayepeta reiko, nderɨvɨ pe reyeokuaita,

jare ndembaepuere yae ma yave reyeyorata yeokuaiasɨ katu güi.”#Gn 36.8; 2 R 8.20. #Heb 11.20.

Jacob otekuarai Esaú güi

41Jare Esaú omotareɨ opɨta Jacob, tu omee ñee kavi chupe vae re, jei ipɨa pe: “Jarembaeño cheru omanota, jare oasa ma mbɨatɨtɨ yave tayuka cherɨvɨ Jacob.”

42Rebeca oikuaa yave Esaú iyemongeta, omondo oenɨiuka Jacob jare jei chupe:

—Mase, nderɨkeɨ Esaú oyemongeta ndeyuka vaerä. 43Jáeramo, añave eyeapɨsaka jare eyapo cheñee. Epüa ekua Harán kotɨ, chekɨvɨ Labán jëta pe. 44Eiko joko pe jae ndive mbovɨ ara rupi, nderɨkeɨ iyarasɨ poi regua, 45mbaetɨ ma iyarasɨ ndekotɨ yave, ñakañɨ ma ikavimbae reyapo chupe vae güi yave; che amondota rogüeruruka ye joko güi. Echa, ¿maera pa mókoi reve chemembɨ amokañɨta metei ara pe?

46Rebeca jei Isaac pe:

—Chekuérai ma aiko Het iñemuña tayɨ reta jeko kavimbae jeko pegua, añave Jacob omenda vi yave Het iñemuña tayɨ reta ndive, ¿maera ye pa aikoveta aiko?

Currently Selected:

GÉNESIS 27: GUABD

Highlight

Copy